Read dyu Sarakalasebagaw ka kitabu 8 Bible Online

Sarakalasebagaw ka kitabu 8 - dyu bible

Sarakalasebagaw ka kitabu 8

¹Masaba y'a fɔ Musa ye ko:

²«Na ni Arɔn n'a dencɛw ye, n'u ka faniw, ni tulu min be kɛ mɔgɔ kan, ni tura min be kɛ hakɛ yafa saraka ye, ani sagajigi fila. Fununan te buru min na, i k'o fana ta cɛrɛ kɔnɔ ka na n'o ye,

³ka jama bɛɛ lajɛn Ɲɔgɔnkunbɛn fanibugu daa la.»

⁴Masaba ye min fɔ Musa ye, a y'o kɛ. Jama lajɛnna Ɲɔgɔnkunbɛn fanibugu daa la.

⁵Musa y'a fɔ jama ye ko: «Masaba ko min ka kan ka kɛ, o filɛ nin ye.»

⁶O kɔ, Musa gwɛrɛla ni Arɔn n'a dencɛw ye k'u ko ni jii ye.

⁷A ye forocaba don Arɔn na, k'a cɛɛ siri n'o cɛsirilan ye, ka forocadennin l'a kan, ka sarakalasebagaw kuntigi ka fani don a la, k'a cɛɛ siri n'o cɛsirilan ye.

⁸A ye disilafani siri a disi la ka *Urimu ni *Tumimu don disilafani na.

⁹O kɔ, a ye fani meleke Arɔn kuun na ka feeren jaa sanulaman kɛ o fani nin ɲafɛla la, i ko Masaba tun y'a fɔ a ye cogo min na. O feeren jaa ye taamasiɲɛ ye k'a yira ko a kɛra Masaba ta ye.

¹⁰Musa ye tulu nin ta k'a kɛ fanibugu n'a kɔnɔnafɛnw bɛɛ kan k'u kɛ Ala ta ye.

¹¹A y'a dɔ seriseri sarakabɔyɔrɔ kan siɲɛ wolonwula, ka dɔ kɛ sarakabɔyɔrɔ n'a minanw bɛɛ kan, ni jidaga n'a bilafɛn, k'u kɛ Ala ta ye.

¹²A ye tulu nin dɔ bɔn Arɔn kuun na janko k'a kɛ Ala ta ye.

¹³O kɔ, a gwɛrɛla ni Arɔn dencɛw ye. A ye forocaba don u la k'u cɛɛ siri ni cɛsirinanw ye, ka fani siri u kuun na, i ko Masaba tun y'a fɔ a ye cogo min na.

¹⁴O kɔ, a nana ni tura ye min bena kɛ hakɛ yafa saraka ye. Arɔn n'a dencɛw y'u bolo la o kuun na.

¹⁵Musa y'a kaan tigɛ k'a joli dɔ ta n'a bolokunnaden ye k'a mɔ sarakabɔyɔrɔ nɔnkɔnw kan janko ka sarakabɔyɔrɔ saniya. A y'o joli tɔɔ bɔn sarakabɔyɔrɔ juu kɔrɔ k'a kɛ Ala ta ye, k'a saniya.

¹⁶A ye tura kɔnɔnatulu bɛɛ bɔ, n'a biɲɛ yɔrɔ ɲanaman, n'a kɔkili fila n'u gɛrɛfɛ tulu, k'o jɛni sarakabɔyɔrɔ kan.

¹⁷Nga a ye tura nin jɛni jama sigiyɔrɔ kɔfɛ: a golo, a sogo, n'a boo, i ko Masaba tun y'a fɔ a ye cogo min na.

¹⁸O kɔ, a nana ni sagajigi ye, min bena kɛ saraka jɛnita ye. Arɔn n'a dencɛw y'u bolow la a kuun na.

¹⁹Musa y'a kaan tigɛ k'a joli seriseri sarakabɔyɔrɔ faan bɛɛ kan.

²⁰A ye sagajigi nin tigɛtigɛ, k'a kunkolo, n'a sogo tigɛninw, ani a tulu jɛni.

²¹A y'a nugu n'a seenw ko, ka sɔrɔ ka sagajigi nin bɛɛ jɛni sarakabɔyɔrɔ kan saraka jɛnita ye i ko Masaba tun y'a fɔ a ye cogo min na. Saraka lo min be jɛni Masaba ye pewu, a kasa ka di Masaba ye.

²²O kɔ, a nana ni sagajigi tɔ kelen ye, min bena kɛ saraka ye Arɔn n'a dencɛw donko la sarakalasebaara la. Arɔn n'a deenw y'u bolo la a kuun na.

²³Musa ye sagajigi kaan tigɛ k'a joli dɔ ta k'o mɔ Arɔn kinibolo tulo dakun kan, ka dɔ mɔ a kinibolo bolokunnadenba kan, ani ka dɔ mɔ a kinibolo senkunnadenba kan.

²⁴O kɔ, a gwɛrɛla ni Arɔn dencɛw ye ka joli nin dɔ mɔ u kinibolo tulo dakun na, ka dɔ mɔ u kinibolo bolokunnadenba kan, ani ka dɔ mɔ u kinibolo senkunnadenba kan. O kɔ, a ye joli nin tɔɔ seriseri sarakabɔyɔrɔ faan bɛɛ kan.

²⁵A y'a tulu ta, n'a kukala, ani a kɔnɔnatulu bɛɛ, n'a biɲɛ yɔrɔ ɲanaman, n'a kɔkili fila n'u gɛrɛfɛ tulu, ani a kinibolo woto.

²⁶Fununan te buru minw na, olu be don cɛrɛ min kɔnɔ n'a bilanin be Masaba ɲafɛ, a ye burumisɛn kelen bɔ o kɔnɔ, ni buru min dilanna ni tulu ye, o kelen, ani furufuru kelen, k'u la tuluyɔrɔw ni kinibolo woto kan.

²⁷A y'o bɛɛ don Arɔn n'a dencɛw bolo k'u k'u fifa Masaba ɲakɔrɔ.

²⁸O kɔ, a y'o fɛɛn nunu minɛ u bolo k'u jɛni sarakabɔyɔrɔ kan, ani saraka jɛnita. O kɛra saraka ye, Arɔn n'a dencɛw donko la sarakalasebaara la. Saraka lo min jɛnina Masaba ye pewu. A kasa ka di Masaba ye.

²⁹O kɔ, a ye sagajigi disi ta k'a fifa Masaba ɲakɔrɔ. O kɛra Musa niyɔrɔ ye sagajigi nin na, min bɔra saraka ye sarakalasebagaw donko la u ka baara la i ko Masaba tun y'a fɔ a ye cogo min na.

³⁰O kɔ, joli min tun be sarakabɔyɔrɔ kan, a y'o dɔ ta. U be tulu min kɛ fɛɛn kan, a y'o dɔ fana ta, k'u seriseri Arɔn n'a ka faniw kan, n'a dencɛw n'u ka faniw kan. A kɛra ten, a ye Arɔn n'a ka faniw, n'a dencɛw n'u ka faniw kɛ Ala ta ye.

³¹O kɔ, Musa y'a fɔ Arɔn n'a dencɛw ye ko: «Aw ka sogo nin tobi Ɲɔgɔnkunbɛn fanibugu daa la. Buru min be cɛrɛ kɔnɔ, n'a kɛra saraka ye, aw k'o ni sogo nin ɲimi o yɔrɔ la i ko ne y'a fɔ cogo min na ko: ‹Arɔn n'a dencɛw ka kan k'o ɲimi.

³²Ni sogo ni buru nunu tɔɔ tora, aw k'o jɛni.

³³Aw kana bɔ Ɲɔgɔnkunbɛn fanibugu daa la fɔɔ tile wolonwula, fɔɔ aw donlon sarakalasebaara la ka dafa, bari o be bɛn tile wolonwula le ma.

³⁴Koo min kɛra bii, Masaba le y'a fɔ k'o ka kɛ waasa k'aw ka hakɛ yafa daali.

³⁵Aw ka to Ɲɔgɔnkunbɛn fanibugu daa la ka tile wolonwula, ni suu wolonwula kɛ. Masaba ye min fɔ, aw k'o bato janko aw kana sa, bari a y'o cii nin fɔ ne ye.› »

³⁶Masaba tun ye koo min bɛɛ fɔ u ye Musa barika la, Arɔn n'a dencɛw y'o bɛɛ kɛ.