Read dyu Zeremi ka kitabu 1 Bible Online

Zeremi ka kitabu 1 - dyu bible

Zeremi ka kitabu 1

¹Sarakalasebaga Zeremi, Ilikiyawu dencɛ ka kuma, ka bɔ Anatɔti, Bɛnzamɛn mara la.

² Masaba kuman'a fɛ, Amɔn dencɛ Zoziyasi ka masaya saan tan ni sabanan la Zuda mara kunna.

³ O kɔ, Masaba kuman'a fɛ tugu Zoziyasi dencɛ Yoyakimu ka tile la Zuda mara kunna, fɔɔ Zoziyasi dencɛ Sedesiyasi saan tan ni kelennan na masaya la Zuda mara kunna, saan nin kalo duurunan na, Zeruzalɛmukaw minɛwaati la ka taga Babilɔni.

⁴Masaba y'a fɔ ne ye ko:

⁵«San'i baa k'i kɔnɔ ta, ne tun b'i lɔn. San'i ka wolo, ne tun y'i woloma k'i kɛ n ta ye, k'i kɛ kira ye siya wɛrɛw cɛma.»

⁶Ne y'a fɔ ko: «Aa! Matigi, Masaba ne ye denmisɛn ye dɛ! Ne te se kuma na.»

⁷Nga Masaba ko: «I kan'a fɔ ko i ye denmisɛn ye. Bari, ne mana e ci mɔgɔ o mɔgɔ fɛ, i ka taga. Ne mana cii o cii fɔ i ye, i k'a fɔ.

⁸I kana siran mɔgɔ si ɲa, bari ne be n'i ye k'i kisi. Ne Masaba le ko ten.»

⁹O kɔfɛ, Masaba y'a bolo kɛ ka maga ne daa la k'a fɔ ko: «O la, ne be ne ka kuma don i daa la.

¹⁰A filɛ, bii, ne be see d'i ma siyaw ani masaw kan, janko k'u bɔn, k'u fili, k'u halaki, k'u cɛn, k'u lɔ, k'u tutu.»

¹¹Masaba ye ne ɲininga ko: «Zeremi, e ɲaa be mun le la?» Ne y'a jaabi ko: «Ne ɲaa be amandiyiri bolo le la, min be den joona.»

¹²Masaba ko: «I y'a ye ka ɲa. Bari ne be kɔlɔsili kɛ janko ne ka kuma ka kɛ joona.»

¹³Masaba ye ne ɲininga tugu ko: «E ɲaa be mun le la?» Ne y'a jaabi ko: «Ne ɲaa be nigɛdagaba wiliwilitɔ la tasuma kan. A be kɔgɔdugu ɲafan fɛ ka jɛngɛ ka na ne faan fɛ.»

¹⁴O tuma na, Masaba y'a fɔ ne ye ko: «Kɔgɔdugu ɲafan fɛ le, balawu bena bɔ ka na jamanadenw bɛɛ sɔrɔ.

¹⁵Bari, ne bena kɔgɔdugu ɲafan maraw siyaw bɛɛ wele. Ne Masaba le ko ten. U ka masa kelen kelen bɛɛ bena na u ka masasigilanw bila Zeruzalɛmu dugu dondaw la. U bena wili dugu laminikogo kama, ka wili Zuda mara duguw bɛɛ kama.

¹⁶«Ne bena u ɲaa gwan u ka kɛwalijuguw bɛɛ kosɔn, bari u banna ne la, ka to ka joow sɔn. Olu yɛrɛ bolo ye fɛɛn min dilan, u b'o le bato.

¹⁷Ele kɔni, i k'i cɛ siri. Ne bena min fɔ i ye, i ka wili k'o bɛɛ fɔ u ye. I kana siran u ɲa dɛ! N'o tɛ, ne ben'a kɛ i be siran u ɲa.

¹⁸Ayiwa, bii yɛrɛ, ne y'i kɛ i n'a fɔ dugu barikaman, i n'a fɔ nigɛbere, ni kogo ziralaman jamana bɛɛ kama, ni Zuda mara masaw, n'a ka ɲamɔgɔw, n'a ka sarakalasebagaw ni jamanadenw kama.

¹⁹U bena i kɛlɛ. Nga u tena se i kɔrɔ. Bari ne be n'i ye waasa k'i kisi. Ne Masaba le ko ten.»