Read dyu Zeremi ka kitabu 11 Bible Online

Zeremi ka kitabu 11 - dyu bible

Zeremi ka kitabu 11

¹Masaba kumana Zeremi fɛ ko:

²«Aw ye bɛɛn nin kuma mɛn, k'o fɔ Zeruzalɛmukaw ni Zuda mara mɔgɔw ye.

³ A fɔ u ye ko ne Masaba, Isirayɛli ka Ala ko: Ni mɔgɔ min ma sɔn ka bɛɛn nin kuma bato, o tigi danganin lo,

⁴ne tun ye min fɔ u faaw ye tuma min na ne y'u bɔ tɔɔrɔba la Ezipiti jamana la. Ne tun y'a fɔ ko n'u ye mɛnni kɛ ne fɛ, ne bena min bɛɛ fɔ u ye, n'u y'o bɛɛ kɛ, o tuma na, u bena kɛ ne ka mɔgɔw ye, ne bena kɛ u ka Ala ye.

⁵O la, ne bena ne ka layidu dafa, n tun ye min ta u faaw ye ko ne bena jamana diman d'u ma, nɔnɔ ni lii ka ca min la kosɔbɛ, min kɛra u ta ye bii.» Ne y'a jaabi ko: «Amiina, Masaba!»

⁶Masaba y'a fɔ ne ye ko: «Taga o kuma nunu bɛɛ wango la Zeruzalɛmu bɔlɔnw la ani Zuda mara duguw tɔw kɔnɔ ko: ‹Aw ye mɛnni kɛ ne Masaba ka bɛɛn la, k'a sira taama.

⁷Bari, kabini ne y'aw faaw bɔ Ezipiti fɔɔ ka na se bii, ne tora k'a fɔ k'a gwɛlɛya u ye ko u ka mɛnni kɛ ne fɛ.

⁸Nga u ma sɔn k'u tulo malɔ. U y'u kuun gwɛlɛya k'u yɛrɛ sago kɛ ni kɔnɔfin ye. O la, ne ye bɛɛn nin sariya jalaki bɛɛ ben u kan, bari ne tun ye min fɔ u ye ko u k'u bato, u ma o bato.› »

⁹O kɔ, Masaba y'a fɔ ne ye ko: «Zeruzalɛmukaw ni Zuda mara mɔgɔw be janfa labɛnna.

¹⁰U faaw tun ye kojugu minw kɛ, olu fana y'u nɔɔ ta. Ufaa minw tun banna ka ne ka kuma bato. U ye batofɛn wɛrɛw sɔn k'u bato. O la, Isirayɛli ni Zuda mara mɔgɔw ye ne ka bɛɛn cɛn, ne tun ye min kɛ n'u faaw ye.

¹¹O kama, ne Masaba ko n bena bɔnɛ lase u ma, u tena bɔyɔrɔ sɔrɔ. U bena ne daali, nga ne tena mɛnni kɛ u fɛ.

¹²Zeruzalɛmukaw ni Zuda mara dugu tɔw mɔgɔw tun be joo minw sɔn, u bena dɛmɛ ɲini olu fɛ, nga olu tena se k'u kisi bɔnɛ waati la.

¹³Ee! Zuda mɔgɔw, aw ka duguw ka ca cogo min na, aw ka batofɛnw fana ka ca ten! Zeruzalɛmu dugu kɔnɔ siraw ka ca cogo min na, aw ka *Baali sɔnyɔrɔw ka ca ten, fɛɛn kuntan nin!

¹⁴«Ele Zeremi, kan'a fɔ ko e be don u ni ne cɛ fewu, kana ne daali u ye, kana u koo fɔ ne ɲana, kana dɛmɛ ɲini u ye yɛrɛ. Bari n'u nana kule ne nɔfɛ u ka bɔnɛ tuma na, ne tena na sɔn ka mɛnni kɛ.»

¹⁵Masaba ko: «Aw minw koo ka di ne ye, aw be mun le kɛra ne ka soo kɔnɔ? Aw ka kɛwaliw ma ɲi. Aw ka dadili ni begɛn sarakataw be se k'a to tɔɔrɔ be tɛmɛ aw kunna wa? N'aw be kojugu le kɛ, aw nisɔndiyanin lo.»

¹⁶Masaba tun ye tɔgɔ la aw kan ko: «Olivuyiriɲuman, i deenw cɛɛ ka ɲi.» Nga mankanba cɛma, tasuma bena aw furaburu jɛni, aw bolo be ja.

¹⁷Masaba, Setigi min tun y'aw tutu, ale lo ko bɔnɛ nin ka se aw ma bari Isirayɛli ni Zuda mara mɔgɔw ye kojugu kɛ, u ye *Baali sɔn k'ale dusu dimi.

¹⁸Masaba y'o koow yira ne la, ne y'u lɔn. O la, ne bɔra u ka koow kala ma.

¹⁹Ne tun be i n'a fɔ saga, u be tagara ni min ye fagayɔrɔ la. Ne tun m'a lɔn ko u be koo dɔ labɛnna ne kama. U tun ko: «An ka yirikɛnɛ nin faga, k'a tunu ka bɔ diɲɛ na. A tɔgɔ kana wele tugu!»

²⁰Masaba, Setigi, e min be kiti tigɛ ni hɔrɔnya ye, e min be adamaden kɔnɔnako n'a ka miiriyaw sɛgɛsɛgɛ, e bena min kɛ u la, ne bena o ye bari, ne ye n ka koo to i bolo.

²¹O le y'a to, Masaba be nin fɔ Anatɔtikaw kosɔn, minw be ne ka saya fɛ, n'u b'a fɔra ko: «Kana kiraya kɛ Masaba tɔgɔ la, n'o tɛ, anw yɛrɛ bena i faga!»

²²O kama, Masaba, Setigi ko: «Ne bena wili u kama. U bena u ka kanbelenw faga ni murujan ye, u deen cɛmanw ni musomanw bena sa kɔngo bolo.

²³Ni ne wilila Anatɔtikaw kama saan min na ka bɔnɛ lase u ma, u si tena to.»