Read dyu Zeremi ka kitabu 13 Bible Online

Zeremi ka kitabu 13 - dyu bible

Zeremi ka kitabu 13

¹Masaba y'a fɔ ne ye ko: «Taga cɛsirilan san min dilanna ni jese ɲanaman ye, k'i cɛɛ siri n'a ye. E kan'a don jii la!»

²Ne ye cɛsirilan nin san Masaba ka fɔcogo la ka n cɛɛ siri n'a ye.

³Masaba kumana ne fɛ a siɲɛ filanan na ko:

⁴«I ye cɛsirilan min san n'a sirinin be i cɛɛ la, o bɔ ka wili ka taga Efarati baji faan fɛ k'a dogo farawo dɔ la.»

⁵Ne tagar'a dogo o yɔrɔ la Masaba ka fɔcogo la.

⁶Waatijan tɛmɛnin kɔ, Masaba y'a fɔ ne ye ko: «Wili ka taga Efarati baji faan fɛ, e tun ye cɛsirilan min dogo yen, i k'a ta.»

⁷Ne wilila ka taga Efarati baji faan fɛ ka cɛsirilan nin yaala k'a bɔ a dogoyɔrɔ la. Nga a bɛɛ tun cɛnna. A tun te foyi ɲa tugu.

⁸O tuma na, Masaba y'a fɔ ne ye ko:

⁹«Ne Masaba ko: O cogo kelen na, ne bena Zuda mara ka yɛrɛboɲa ani Zeruzalɛmu ka yɛrɛboɲakojugu ban.

¹⁰Nin siyajugu, min banna ka ne ka kumaw mɛn k'u kuun gwɛlɛya k'u yɛrɛ sago kɛ ka boliboli batofɛn wɛrɛw kɔ janko k'u sɔn ani ka biri u ɲafɛ, a ka kɛ i n'a fɔ cɛsirilan nin, min te se ka foyi ɲa tugu.

¹¹Mɔgɔ be cɛsirilan kɛ k'a cɛ siri cogo min na, o cogo kelen na, ne tun ye Isirayɛli ni Zuda mara mɔgɔw kɛ ka n cɛ siri. Waasa u ka kɛ ne ka mɔgɔw ye, ka kɛ sababu ye ne tɔgɔ ka bɔ, ani ne ka tanuli sɔrɔ, ani kunkɔrɔta. Nga u ma mɛnni kɛ ne fɛ. Ne Masaba le ko ten.

¹²«A fɔ u ye ko ne Masaba, Isirayɛli ka Ala ko: ‹Dɔrɔdagaw bɛɛ ka ɲi ka fa ni dɔrɔ le ye.› U ben'a fɔ i ye ko: ‹An t'a lɔn ko dɔrɔdagaw bɛɛ ka ɲi ka fa ni dɔrɔ ye wa?›

¹³O tuma na, i k'a fɔ u ye ko ne Masaba ko n bena jamanadenw bɛɛ fafa ni dɔrɔ ye, minw be masaya la Dawuda nɔɔ na, olu ni sarakalasebagaw, ni kiraw ani Zeruzalɛmukaw bɛɛ,

¹⁴k'u nɔɔninɔɔni ɲɔgɔn kan, faaw ni deenw ɲɔgɔn fɛ. Ne Masaba le ko ten. Ne tena makari u la fewu, ne bena u halaki le.»

¹⁵Aw y'aw tulo malɔ kosɔbɛ, aw kana aw yɛrɛ boɲa, bari Masaba le be kumana.

¹⁶ Aw ka Masaba aw ka Ala boɲa, sanni a ka dibi don, sanni aw seen ka talon kuluw la, dibi kosɔn. Aw be kɛnɛ kɔnɔna, nga a bena o dibi, k'a yɛlɛma dibiba ye.

¹⁷ N'aw ma mɛnni kɛ, n bena dogo ka kasi aw ka yɛrɛboɲa kosɔn. N ɲaji bena woyo i ko jii. Bari, Masaba ka jama bena minɛ ka taga.

¹⁸Masaba y'a fɔ ne ye ko n k'a fɔ masacɛ n'a bamuso ye k'u ka jigi ka sigi duguma, bari u ka masafugulan nɔɔrɔmanw bɔra u kunna ka ben.

¹⁹Dugu minw be worodugu ɲafan fɛ, olu datugura, mɔgɔ te yen k'u yɛlɛ. Zuda mara mɔgɔw bɛɛ minɛna ka taga, u bɛɛ le tagara.

²⁰Zeruzalɛmu, i ɲaa kɔrɔta ka mɔgɔw natɔ filɛ ka bɔ kɔgɔdugu ɲafan fɛ. Jama min kalifara i ma, a be min? Min tun ye i ka kunkɔrɔtafɛn ye.

²¹I bena mun le fɔ ni e ye mɔgɔ minw deli i la, ni olu nana wili i kama ka kɛ i kuntigiw ye? Tɔɔrɔ tena i sɔrɔ i ko muso jigibagatɔ ta wa?

²²I bena i yɛrɛ ɲininga ko: «Mun na nin be kɛra ne la?» I ka kojugu caaman kosɔn lo, o b'i ka tafe sama ka yɛlɛ sanfɛ ka fanga la i kan.

²³Etiyopika be se k'a fari ɲaa yɛlɛma wa? Waraninkala be se k'a fari tɔnitɔni nɔɔ yɛlɛma wa? Aw minw delila kojugu la, aw bena se ka koɲuman kɛ wa?

²⁴«Ne Masaba bena aw yɛrɛkɛ i ko kongo kɔnɔ fɔɲɔ be kala murumuru yɛrɛkɛ cogo min na.

²⁵O le latigɛra aw ye, ne ye niyɔrɔ min bila aw ye. Bari aw ɲinɛna ne kɔ, k'aw jigi la galonfɛnw kan. Ne Masaba le ko ten.

²⁶Ne yɛrɛ bena i ka tafe sama ka yɛlɛ fɔɔ i ɲada kan, janko u k'i maloyayɔrɔ ye.

²⁷I ye kakalaya minw kɛ, an'i ka nisɔndiyakan nunu, i ye kokolon minw kɛ kuluw kan ani kongow kɔnɔ, ne ye olu ye. Ne y'i ka nɔgɔw ye. Ee! Zeruzalɛmu, i t'i yɛrɛ saniya! E bena to tan fɔɔ tuma jumɛn?»