Read dyu Zeremi ka kitabu 19 Bible Online

Zeremi ka kitabu 19 - dyu bible

Zeremi ka kitabu 19

¹Masaba y'a fɔ ne ye ko: «Zeremi, wili ka taga dagadilanla fɛ ka jidaga san, ka cɛkɔrɔba damani wele, ani sarakalasebaga cɛkɔrɔbaw damani.

² Donda min be wele ko Dagakolonda, i ka bɔ n'u ye o daa fɛ, ka taga Bɛninɔmu kɔkɛnɛ faan fɛ. Ne bena kuma min fɔ i ye, i k'o wango la yen.

³A fɔ u ye ko: ‹Zuda mara masacɛw ni Zeruzalɛmukaw, aw ye mɛnni kɛ Masaba ka kuma la. Masaba, Setigi, Isirayɛli ka Ala ko: Ne bena bɔnɛba lase yɔrɔ nin na fɔɔ mɔgɔ o mɔgɔ mana o kibaruya mɛn, a be kɛ i n'a fɔ saan le pɛrɛnna o tigi tulo kɔrɔ.

⁴Bari u banna ne la, u ye yɔrɔ nin kɛ cogo dɔ la fɔɔ mɔgɔ be fili a ma. U ye siya wɛrɛw ka joow sɔn yen, olu n'u faaw ani Zuda mara masacɛw ma minw lɔn. U ye yɔrɔ nin fa ni mɔgɔ jalakibaliw joli ye.

⁵ U ye *Baali sɔnyɔrɔw lalaga, waasa k'u deenw kɛ sɔnnifɛnw ye k'u jɛni Baali ye. Ne ma o ɲini o fɛ. N m'o fɔ ka ye, n m'o miiri ka ye!›

⁶Ayiwa, loonw be na, ne Masaba le ko ten, yɔrɔ nin tena wele tugu ko Tafɛti, walima Bɛninɔmu kɔkɛnɛ. A bena wele ko Mɔgɔfaga kɔkɛnɛ.

⁷«O yɔrɔ la, n bena Zeruzalɛmukaw ni Zuda mara mɔgɔw ka kolatigɛninw cɛn. U jugu minw b'u fagayɔrɔ ɲinina, ne ben'a to olu b'u faga ni murujanjanw ye. Ne bena o suuw kɛ kɔnɔw ni kongosogow ka dumuni ye.

⁸Ne bena duguba nin kɛ siranyayɔrɔ ni lɔgɔbɔyɔrɔ ye. Fɛɛn o fɛɛn mana tɛmɛ a kɔrɔ k'o cɛnni ye, o tigi dabari be ban.

⁹Ne ben'a to olu b'u deen cɛmanw ni musomanw sogo ɲimi, olu bena to ka ɲɔgɔn ɲimi, k'o sababu kɛ bɔnɛ ni dusukasi ye, u juguw ye min la u kan. Olu minw b'u ka saya fɛ.

¹⁰«O kɔ, mɔgɔ minw tagara n'i ye, i be jidaga nin ci olu ɲana,

¹¹k'a fɔ u ye ko ne Masaba, Setigi ko: ‹Ne bena siya nin halaki, ka duguba nin ci, i n'a fɔ mɔgɔ be daga ci cogo min na. N'a cira, a te se ka dilan. Suuw donyɔrɔ tanya kama, u bena taga suuw don Tafɛti.

¹²Ne bena o le kɛ nin yɔrɔ n'a mɔgɔw la. Ne bena dugu nin kɛ i n'a fɔ Tafɛti. Ne Masaba le ko ten.

¹³Zeruzalɛmu ni Zuda mara masaw ka boonw bena nɔgɔ i n'a fɔ Tafɛti, u ye sɔnni kɛ boon minw bɛɛ sanfɛ ka lolow bato, ani ka batofɛn wɛrɛw sɔn ni jii ye.› »

¹⁴O kɔ, ne kɔsegira ka bɔ Tafɛti, Masaba tun ye ne ci ka taga kirayakuma fɔ yɔrɔ min na, ka na lɔ Masaba ka soo luu kɔnɔ k'a fɔ jama bɛɛ ye ko:

¹⁵«Masaba, Setigi, Isirayɛli ka Ala ko: ‹Ne tun ye bɔnɛ min koo fɔ dugu nin kosɔn, ne bena o bɛɛ lase ale n'a gɛrɛfɛduguw bɛɛ ma sisan. Bari u y'u tulo gwɛlɛya, u ma sɔn ka mɛnni kɛ ne fɛ.› »