Read dyu Zeremi ka kitabu 2 Bible Online

Zeremi ka kitabu 2 - dyu bible

Zeremi ka kitabu 2

¹Masaba y'a fɔ ne ye ko:

²«Ta'a fɔ Zeruzalɛmukaw ye ko ne Masaba ko: ‹Kanuya min tun b'aw dusu la aw denmisɛn tuma na, ne hakili b'o la, tuma min na aw tun be ne kanu i ko muso min furula kura ye. Aw tun be ne kɔ kongokolon kɔnɔ, danni te se ka ɲa yɔrɔ min na.

³Isirayɛlidenw, aw tun kɛra ne Masaba ta ye, i ko sɛnɛfɛn deen fɔlɔw. Ni mɔgɔ o mɔgɔ tun y'o dumu, o tigi tun be jalaki, sɛgɛn tun be o tigilamɔgɔ sɔrɔ. Ne Masaba le ko ten.› »

⁴Yakuba ka somɔgɔw, aw ka mɛnni kɛ Masaba fɛ, Isirayɛli ka somɔgɔw bɛɛ.

⁵ Masaba ko: «Aw faaw ye jalakiyɔrɔ jumɛn ye ne la fɔɔ ka ban ne la, ka tugu fɛɛn fufafuw kɔ, fɔɔ olu yɛrɛ nana kɛ fɛɛn fufafuw ye?

⁶U ma u yɛrɛ ɲininga ko: ‹Masaba min y'an bɔ Ezipiti jamana la, ka bila an ɲa kongokolon kɔnɔ, jamana lakolon, dingɛkolon yɔrɔ nin, yɔrɔ janin, jamanajugu, mɔgɔ si te tɛmɛ yɔrɔ min na, mɔgɔ si siginin te yen, o Masaba nin be min?›

⁷K'a sɔrɔ ne nana n'aw ye nɛɛma jamana kɔnɔ, waasa aw k'o yɔrɔ fɛnɲumanw diya bɔ. Nga aw dontɔ yen, aw ye ne ka jamana nɔgɔ. Ne be tigiya kɛ jamana min na, aw y'o kɛ yɔrɔ goman ye.

⁸Sarakalasebagaw ma u yɛrɛ ɲininga ko: ‹Masaba be min?› Sariya lɔnbagaw ma ne lɔn. Ɲamɔgɔw murutira ne ma. Kiraw kumana *Baali tɔgɔ la, u tugura fɛɛn fufafuw kɔ.

⁹O le kosɔn, ne bena aw jalaki tugu. Ne bena aw kɔmɔgɔw jalaki. Ne Masaba le ko ten.

¹⁰Aw ka taga kɔlɔsili kɛ Kitimu mara la, aw ka mɔgɔw ci ka taga ɲiningali kɛ ka ɲa Kedari mara la, [1] k'a filɛ n'u be aw ta ɲɔgɔn kɛ:

¹¹Siya jumɛn b'a ka batofɛnw yɛlɛma? K'a sɔrɔ batofɛn ɲanamanw yɛrɛ tɛ. Nga ne ka mɔgɔw y'u kunkɔrɔtabaga falen ni fɛɛn fufafuw ye.

¹²O le kosɔn, sankolokɔnɔfɛnw ka kabakoya, ani ka muruku siranya bolo. Ne Masaba le ko ten.

¹³Bari ne ka mɔgɔw ye kojuguba fila le kɛ: U banna ne la, ne min ye ɲanamaya jii bɔyɔrɔ ye. U tagara jii marayɔrɔw sogi u yɛrɛ ma, woo be minw na, jii te se ka to minw kɔnɔ.

¹⁴Isirayɛlidenw ye jɔɔnw ye wa? Walima u wolola jɔnya soo kɔnɔ wa? Mun na u minɛna kɛlɛyɔrɔ la?

¹⁵ Jaraw ŋunanna olu kama kosɔbɛ. U y'u ka jamana halaki, u ka duguw jɛnina, u lakolon lo.

¹⁶Hali Manfisikaw ni Tapanɛkaw y'aw kuun li.

¹⁷Aw yɛrɛ le m'o ɲini wa? Bari aw banna ne Masaba aw ka Ala la. K'a sɔrɔ ne le tun b'aw bilara sira.

¹⁸Ayiwa, mun na aw be taga Ezipiti janko ka Nili baji min? Mun na aw be taga Asiri jamana la janko ka Efarati baji min?

¹⁹Aw ka juguya sara k'aw ɲaa gwan, aw ka tilenbaliya sara k'aw tɔɔrɔ. Aw k'a ye k'a faamu ko n'aw banna ne Masaba aw ka Ala la, n'aw te siran ne ɲa tugu, k'o bena kɛ tɔɔrɔ ni dusukasi ye aw fɛ. Ne Matigi, Masaba, Setigi le ko ten.»

²⁰Masaba ko: «Isirayɛlidenw, kabini waatijan, aw murutira ne ma, k'an ka bɛɛn cɛn. Aw y'a fɔ ko: ‹An tena sɔn jɔnya la tugu.› K'a sɔrɔ, kulujan o kulujan, ani yiritu o yiritu, aw be kakalaya kɛ. [2]

²¹K'a sɔrɔ ne tun y'aw tutu tuma min na, aw tun be i ko *ɛrɛzɛnsun ɲanaman. A do kɛra di aw yɛlɛmana ka kɛ ɛrɛzɛnsunkolon ye?

²²Hali n'aw kora ni sigɛn ye ka safuna mɔ kosɔbɛ, o tena aw ka kojugu nɔɔ bɔ ne ɲakɔrɔ. Ne Matigi, Masaba le ko ten.

²³Aw be se k'a fɔ cogo di ko: ‹An ma nɔgɔ dɛ! An ma tugu *Baali kɔ dɛ!› Aw ye min kɛ lɛɛ la, aw k'o filɛ. Aw ka sɔn aw ka kɛwaliw ma. Aw tun be i ko ɲɔgɔmɛmuso min be boliboli faan bɛɛ la.

²⁴Aw tun be i ko kongofali, min delila kongokolon na. N'a yɛlɛtuma sera, a be fɔɲɔ fɛ. Jɔn le bena se k'a bali a nigɛlako la? Ni cɛman min b'a fɛ, baasi t'a la. A b'a sɔrɔ joona a yɛlɛtuma na.

²⁵Aw k'aw yɛrɛ kɔlɔsi, n'o tɛ, aw seen lakolon bena taama. Aw kaan kɔrɔla bena ja. Nga, aw ko: ‹Ayi, kana i yɛrɛ sigɛn. An kɔni be lonanw ka batofɛnw le fɛ, an do bena boli u kɔ.›

²⁶Ni soon minɛna, a be maloya cogo min na, o cogo kelen na, Isirayɛlidenw bena maloya. Olu n'u ka masaw, n'u ka ɲamɔgɔw, n'u ka sarakalasebagaw, an'u ka kiraw,

²⁷minw bɛɛ b'a fɔ yirikuru ye ko: ‹Ele lo ye ne faa ye.› Minw b'a fɔ kabakuru ye ko: ‹Ele le y'a kɛ ne nana diɲɛ na.› U ma u ɲaa sin ne ma, u y'u kɔɔ le sin. Nga u ka tɔɔrɔ waati la, u be kule ne ma k'a fɔ ko: ‹Wili k'an kisi!›

²⁸Aw ye joo minw dilan, olu be min? N'u be se, u ka wili k'aw kisi tɔɔrɔwaati la kɛ. Bari, Zuda mara mɔgɔw, aw ka joow ka ca i ko aw ka duguw.

²⁹Mun na aw be ne jalaki la? Aw bɛɛ murutira ne ma. Ne Masaba le ko ten.

³⁰«Ne y'aw bugɔ, nga o ma foyi ɲa. Aw ma sɔn o kololi ma. Aw ka murujanjanw ye kiraw faga i ko jara fariman.

³¹Aw bii mɔgɔw, aw ka mɛnni kɛ ne Masaba ka kuma na. O tuma, ne kɛra siranfɛn ye, i ko kongokolon Isirayɛlidenw fɛ wa? Walima dibiyɔrɔ? Mun na ne ka mɔgɔw b'a fɔ ko: ‹An kɛra an yɛrɛ ta ye. An tena segi e ma tugu›?

³²Sunguru be se ka ɲinɛ a ka masirifɛnw kɔ wa? Kɔnyɔmuso be ɲinɛ a ka cɛsirinan kɔ wa? Nga ne ka mɔgɔw ɲinɛna ne kɔ kabini tumajan.

³³Haan! Aw do ye kanuya siraɲuman ta dɛ! Kojugu le kɛra aw delilako ye.

³⁴Fantan jalakibaliw joli b'aw ka faniw dagolo kan. K'a sɔrɔ aw ma bari u si la soɲali kɛyɔrɔ la aw fɛ.

³⁵O bɛɛ n'a ta, aw b'a fɔ ko: ‹An jalakinin tɛ, a kana dimi ne kɔrɔ tugu.› Ayiwa, ne b'aw kiti, bari aw y'a fɔ ko aw ma kojugu si kɛ.

³⁶Mun na aw be teliya k'aw ka sira bila ten? Ezipitikaw bena maloya bila aw la, i ko Asirikaw y'aw maloya cogo min na.

³⁷Aw bena aw bolo fila le bila aw kuun na ka bɔ yen. Bari aw y'aw jigi la minw kan, ne Masaba banna olu la, aw te se ka taga ɲa n'olu ye.