Read dyu Zeremi ka kitabu 21 Bible Online

Zeremi ka kitabu 21 - dyu bible

Zeremi ka kitabu 21

¹Masaba ye kuma min fɔ Zeremi ye, tuma min na masacɛ Sedesiyasi tun ye Malikiya dencɛ Pasewuri ni sarakalasebaga Sefaniya, Maaziya dencɛ ci Zeremi fɛ, o filɛ. A ko:

² «Masaba ɲininga an ye. Bari Babilɔni masacɛ Nabukodonozɔri b'an kɛlɛla. N'a sɔrɔ Masaba ben'a ka kabakow dɔ kɛ k'an dɛmɛ janko a ka taga ka bɔ an kɔrɔ.»

³Zeremi y'u jaabi ko: «Aw ye ta'a fɔ Sedesiyasi ye ko

⁴Masaba, Isirayɛli ka Ala ko: ‹Kɛlɛkɛminan minw b'aw bolo, n'aw b'o kɛra ka Babilɔni masacɛ ni Babilɔnikaw kɛlɛ, minw b'aw ka dugu datugura dugu laminikogo kɔfɛ, ne bena o kɛlɛkɛminan nunu yɛlɛma ka sin aw ma, k'o lajɛn dugu kɔnɔ.

⁵Ne yɛrɛ le bena aw kɛlɛ, n bena n bolo fariman kɔrɔta aw kama ni dimiba ye.

⁶Ne bena dugu nin kɔnɔ fɛɛnw halaki, cɛɛw fara begɛnw kan. Fɔɲɔbana bena u faga.

⁷O kɔ, mɔgɔ minw kisira dugu nin kɔnɔ fɔɲɔbana, ni murujan ani kɔngɔ ma, ne bena olu ni Zuda mara masacɛ Sedesiyasi n'a ka dakɔrɔsigiw don Babilɔni masacɛ Nabukodonozɔri bolo. N bena u don u juguw bolo, minw b'a fɛ k'u faga. A bena u halaki ni murujan ye. A tena makari u la fewu.›

⁸«A fɔ jama nin ye ko ne Masaba ko: Ne be ɲanamanya sira ni saya sira bila u ɲa.

⁹Ni mɔgɔ min tora dugu nin kɔnɔ, o tigi bena sa murujan, ni kɔngɔ, walima fɔɲɔbana sababu la. Nga min bena bɔ k'a yɛrɛ di Babilɔnikaw ma, minw nana aw datugu, o tigi bena to nii na. A ka tɔnɔ bena kɛ a nii kisiko ye.

¹⁰Bari ne bena wili dugu nin kama ka n ɲaa sin a ma, ne tena hɛrɛ kɛ a ye, ne bena bɔnɛ lase a ma. Ne ben'a don Babilɔni masacɛ bolo, ale ben'a jɛni! Ne Masaba le ko ten!»

¹¹A fɔ Zuda mara masacɛ ka somɔgɔw ye k'u ka mɛnni kɛ ne Masaba ka kuma la.

¹²A fɔ ko: «Dawuda ka somɔgɔw, Masaba ko: ‹Loon o loon, aw ka kiti tilennin kɛ. Aw ka mɔgɔ tɔɲɔninw bɔ u tɔɲɔbagaw bolo. N'o tɛ, n ka fariya bena wili aw kama i ko tasuma, mɔgɔ si tena sɔrɔ min b'a faga. O bena kɛ aw ka kojuguw le kosɔn.

¹³Zeruzalɛmu, a be ne ni e le cɛ sisan, ele min be fara kan, kɔkɛnɛ sanfɛ. Aw minw b'a fɔra ko: Jɔn le bena jigi anw kama, ka don fɔɔ an sigiyɔrɔ la? Ne Masaba ko ten.

¹⁴Ne bena aw ɲaa gwan ka kɛɲɛ ni aw ka kɛwaliw ye. Ne bena tasuma don aw ka tuu la, k'aw lamini bɛɛ jɛni! Ne Masaba le ko ten!› »