Read dyu Zeremi ka kitabu 29 Bible Online

Zeremi ka kitabu 29 - dyu bible

Zeremi ka kitabu 29

¹ Nabukodonozɔri ye cɛkɔrɔbaw ni sarakalasebagaw ni kiraw, ani mɔgɔ minw minɛ Zeruzalɛmu ka taga Babilɔni, kira Zeremi tora Zeruzalɛmu ka sɛbɛ ci u ma.

²O kɛra masacɛ Yekoniya n'a bamuso, n'a ka luu kɔnɔ baaraɲamɔgɔw, ni Zeruzalɛmu faamaw, ni Zuda mara taw, ani bololabaarakɛlaw ani numuw bɔnin kɔ Zeruzalɛmu dugu kɔnɔ,

³Zuda mara masacɛ Sedesiyasi tun be Safan dencɛ Eleyaza ni Ilikiya dencɛ Gemariya cira Babilɔni masacɛ Nabukodonozɔri fɛ, Zeremi tun y'a ka sɛbɛ di olu le ma. A tun fɔr'a kɔnɔ ko:

⁴«Masaba, Setigi, Isirayɛli ka Ala ko: ‹Aw minw bɛɛ minɛna ka taga, ne ye aw minw bɔ Zeruzalɛmu ka taga Babilɔni,

⁵aw ka soow lɔ ka don u kɔnɔ, ka nankɔw bɔ k'u kɔnɔfɛnw dumu,

⁶ka musow furu ka dencɛw ni denmusow sɔrɔ. Aw ka musow ɲini aw deenw ye, k'aw denmusow di furu la, waasa olu ka dencɛ ni denmusow sɔrɔ fana. Aw ka buguya o yɔrɔ la, aw kana dɔgɔya.

⁷Ne y'aw bɔ ka taga dugu min kɔnɔ, aw k'o ɲa ɲini. Aw ka ne daali a ye. Bari n'a ɲana, aw fana ta le ɲana.›

⁸Masaba, Setigi, Isirayɛli ka Ala, ko: ‹Aw kan'a to kira minw be aw cɛma, walima aw ka lagwɛlikɛlaw, k'aw lafili. Aw kana u ka sikow jati.

⁹Bari u be galonkiraya le kɛra aw ye ne tɔgɔ la. Ne m'u ci.› » Masaba le ko ten.

¹⁰ Masaba ko: «Ni Babilɔni masaya dafara saan bi wolonwula, ne bena janto aw la. Ne tun ye n daa di aw ma ɲumanya min la ko aw bena segi ka na yan minkɛ, ne ben'a kɛ aw be segi ka na yan yɔrɔ la.

¹¹Ne ye min ŋaniya ta aw kosɔn, ne b'o lɔn. Ne Masaba le ko ten. Aw ka hɛrɛko lo, aw ka bɔnɛko tɛ, janko ka labankoɲuman d'aw ma.

¹²N'aw nana ne daali, ne bena mɛnni kɛ aw fɛ.

¹³ Aw bena ne yɔrɔ ɲini, aw bena ne ye, ni aw b'o kɛ n'aw dusu bɛɛ ye.

¹⁴Ne ben'a to aw be n ye. Ne bena aw ka mɔgɔ minɛninw kɔsegi. Ne tun y'aw gwɛn ka taga siya minw bɛɛ cɛma, ani yɔrɔ minw bɛɛ la, ne bena aw lajɛn ka bɔ yen. Ne tun ye aw gwɛn ka bɔ yɔrɔ min na, ne bena aw kɔsegi ka na o yɔrɔ la. Ne Masaba le ko ten.

¹⁵«Aw b'a fɔra ko Masaba ye kiraw di aw ma Babilɔni dugu kɔnɔ.

¹⁶«Masaba be kumana masacɛ kosɔn, min ye Dawuda nɔɔ ta a ka masasigilan kan, ani mɔgɔ minw bɛɛ be dugu nin kɔnɔ, aw balima minw ma minɛ ka taga n'aw ye.

¹⁷Masaba, Setigi ko: ‹Ne be murujan, ni kɔngo ani fɔɲɔbana ci u ma. Ne b'u kɛ i n'a fɔ toro tolinin minw te se ka dumu u cɛnnin kojugu kosɔn.

¹⁸Ne bena tugu u kɔ ni murujan ye, ni kɔngo ani fɔɲɔbana ye. Ne bena u kɛ siranyafɛnw ye dugukolo kan jamanaw bɛɛ fɛ. Ne bena u kɛ dangafɛnw, ni kabafɛnw, ani yɛlɛfɛnw ni lɔgɔbɔfɛnw ye siyaw bɛɛ cɛma, ne bena u gwɛn ka taga yɔrɔ minw na.

¹⁹Bari, u ma ne ka kuma lamɛn. K'a sɔrɔ ne tora ka n ka baarakɛlaw, kiraw ci u ma. Nga, u ma sɔn k'u tulo malɔ n fɛ.› Masaba le ko ten.

²⁰Aw minw minɛna ka bɔ Zeruzalɛmu ka taga Babilɔni, aw k'aw tulo malɔ Masaba ka kuma la.»

²¹«Kolaya deen Akabu ni Maaziya deen Sedesiyasi minw be galonkiraya kɛra aw ye ne tɔgɔ la, Masaba, Setigi, Isirayɛli ka Ala b'a fɔra olu kosɔn ko: ‹Ne bena u don Babilɔni masacɛ Nabukodonozɔri bolo, a bena u halaki aw yɛrɛ ɲana.

²²Zuda mara mɔgɔ minw bɛɛ minɛna ka taga Babilɔni, olu bɛɛ bena u cogo ta ka to ka dangali kɛ n'o ye k'a fɔ ko: Masaba k'i kɛ i n'a fɔ Sedesiyasi ni Akabu, Babilɔni masacɛ ye minw jɛni.

²³Bari u tun ye kojuguba kɛ Isirayɛlidenw cɛma: U ye ɲamɔgɔya kɛ n'u sigiɲɔgɔnw ka musow ye, ka galon tigɛ ni ne tɔgɔ ye. K'a sɔrɔ ne ma o sira d'u ma. Ne b'o kala ma, ne yɛrɛ le y'o ye.› » Masaba le ko ten.

²⁴Semayawu min be bɔ Neelamu, i ben'a fɔ ale ye ko:

²⁵«Masaba, Setigi, Isirayɛli ka Ala, ko: E ye sɛbɛw ci i tɔgɔ la Zeruzalɛmukaw bɛɛ ma, ni Maaziya dencɛ, sarakalasebaga Sefaniya ma, ani sarakalasebaga tɔw bɛɛ ma. A tun sɛbɛnna Sefaniya ye ko:

²⁶‹Masaba le y'i kɛ sarakalasebaga ye Yewoyada nɔɔ na k'i kɛ Masaba ka soo kɔlɔsibaga ye. Fatɔ min mana wili k'a yɛrɛ kɛ kira ye, i ka kan k'o tigi kolo ni jɔrɔkɔ ani kandonnigɛ ye.

²⁷Mun na i ma foyi kɛ Anatɔtika Zeremi la? Min ko a ye kira ye aw cɛma.

²⁸A ye cii bila ka n'a fɔ Babilɔni ko an bena mɛn yan, ko an ka soow lɔ ka don u kɔnɔ, ka nankɔw bɔ k'o kɔnɔfɛnw dumu.› »

²⁹Sarakalasebaga Sefaniya y'o sɛbɛ nin kalan kira Zeremi ɲana.

³⁰O tuma na, Masaba kumana Zeremi fɛ ko:

³¹«Mɔgɔw minw bɛɛ minɛna ka taga, i ka cii bila ka ta'a fɔ u ye Neelamuka Semayawu kosɔn, ko ne Masaba ko: Semayawu be kiraya kɛra u ye, k'a sɔrɔ ne m'a ci, ani k'aw nigɛ minkɛ,

³²ne bena wili Neelamuka Semayawu n'a kɔmɔgɔw kama. A ka mɔgɔ si tena to jama nin cɛma. Ne bena hɛrɛ min kɛ n ka jama ye, a tena o ye fana. Bari a b'a fɔra mɔgɔw ye ko u ka muruti ne Masaba ma. Ne Masaba le ko ten.»