Read dyu Zeremi ka kitabu 3 Bible Online

Zeremi ka kitabu 3 - dyu bible

Zeremi ka kitabu 3

¹«Ni cɛɛ y'a muso furu sa, n'a fana tagara furu cɛɛ wɛrɛ ma, cɛɛ fɔlɔ nin be se ka segi ka ta'a minɛ tugu wa? Ayi, o bena jamana nɔgɔ. Isirayɛlidenw, aw minw ye kakalaya kɛ ni fɛɛn caaman ye, aw be tila k'a fɔ ko aw bena segi ne fɛ tugu wa? Ne Masaba le ko ten.

²Aw k'aw ɲaa kɔrɔta ka kulujanw filɛ, u jumɛn be yen n'aw ma kakalaya kɛ yen? Aw tun be sigi siradaw la k'aw ka kakalaɲɔgɔn kɔnɔ, i ko Arabu be sigi kongokolon kɔnɔ cogo min na. Aw ye jamana nɔgɔ n'aw ka tilenbaliya, n'aw ka kakalaya ye.

³O la, sanji te nana tugu. Nga aw y'aw ɲaa ja i ko kakalamuso, aw yɛrɛ ma maloya.

⁴Nga sisan, aw te nin ye n'aw be kulera ne nɔɔ fɛ wa? K'a fɔ ko: ‹An Faa, an denmisɛn waati teri lo.

⁵A ka dimi te ban wa? A bena o mara fɔɔ tuma bɛɛ wa?› Aw b'o le fɔ, k'a sɔrɔ aw be tugu ka kojugu kɛ.»

⁶ Masaba y'a fɔ ne ye Zoziyasi ka masaya tile la ko: «Isirayɛli mara mɔgɔ tilenbaliw ye min kɛ, i y'o ye kɛ. A ka mɔgɔw tun tagara kulujanjanw bɛɛ kan, ani yirituw kɔnɔ ka kakalaya kɛ.

⁷Ne tun b'a fɔra n yɛrɛ kɔnɔ ko: ‹N'a tilara o bɛɛ la, a ben'a ɲaa yɛlɛma n faan fɛ.› Nga, a ma o kɛ fewu. A balimamuso Zuda janfamɔgɔ nin y'o ye.

⁸Ne ye Isirayɛli mara mɔgɔ tilenbaliw ka furu sa, u ka kakalaya bɛɛ kosɔn. A balimamuso Zuda mara janfamɔgɔ nin y'a ye, o bɛɛ n'a ta, a ma siran. Ale fana tor'a ka kakalaya la.

⁹Isirayɛli mara mɔgɔw ye kakalaya kɛ ka kabakuru ni lɔgɔw sɔn joow ye, u yɛrɛ ma maloya, o sababu la, jamana nɔgɔra.

¹⁰O bɛɛ kɔ, a balimamuso Zuda mara janfamɔgɔ nunu ma u ɲaa sin ne ma n'u kɔnɔ bɛɛ ye. U y'o kɛ ni kɔnɔfin ye. Ne Masaba le ko ten.»

¹¹Masaba y'a fɔ ne ye ko: «Isirayɛli mara mɔgɔ tilenbali nunu fana bele ka fisa ni Zuda mara janfamɔgɔ nunu ye.

¹²Taga wango la kɔgɔdugu ɲafan fɛ ko: Isirayɛli mara mɔgɔ tilenbaliw, sɔn ne ma. Ne Masaba le ko ten. Ne tena n ɲaa sisi aw ma tugu, bari, ne ye makaritigi ye. Ne Masaba le ko ten. Ne diminin tena to kudayi.

¹³Aw ka sɔn aw filiyɔrɔ ma: Aw murutira ne Masaba aw ka Ala ma. Aw tun bolibolila lonanw ka joow kɔ yirituw bɛɛ kɔrɔ. O la, aw ma mɛnni kɛ ne fɛ. Ne Masaba ko ten.

¹⁴«Deen tilenbali nunu! Aw ye sɔn ne ma. Ne Masaba le ko ten. Bari, ne le ye aw tigi ye. Ne bena mɔgɔ kelen bɔ dugu dɔ la, ka fila bɔ fadenyabolo dɔ la, ka na n'aw ye *Siyɔn dugu kɔnɔ.

¹⁵Ne bena ɲamɔgɔɲumanw di aw ma ne yɛrɛ sago la. Minw bena janto aw la ni lɔnniya ni hakilitigiya ye.

¹⁶«N'aw nana buguya kosɔbɛ jamana kɔnɔ tuma min na, ne Masaba le ko ten. U tena Masaba ka layidu taamasiɲɛ kɛsu koo fɔ tugu. U tena miiri a la tugu, u hakili tena jigi a la tugu. U mako tena kɛ a la tugu, u ten'a bɔɲɔgɔnko wɛrɛ dilan tugu.

¹⁷O tuma na, u bena Zeruzalɛmu wele ko: ‹Masaba ka masasigilan.› Siyaw bɛɛ bena na ɲɔgɔn lajɛn Zeruzalɛmu, janko ka ne Masaba tɔgɔ boɲa. U tena u jaa gwɛlɛya ka tugu u ka miirijuguw kɔ tugu.

¹⁸O tuma na, Zuda ni Isirayɛli mara mɔgɔw bena jɛn ka bɔ kɔgɔdugu ɲafan jamana fɛ ka na nin jamana nin kɔnɔ, ne ye min di u faaw ma.

¹⁹«Ne tun y'a fɔ n kɔnɔ ko: ‹Ne bena aw jati n dencɛw cɛma, ka jamanaɲuman di aw ma, min ka ɲi ni siyaw bɛɛ sigiyɔrɔw ye.› Ne tun ko: ‹Aw bena ne wele ko aw Faa. Ko aw tena bɔ ne kɔ tugu.›

²⁰Nga, aw Isirayɛlidenw ye ne janfa, i ko muso b'a cɛɛ janfa cogo min na. Ne Masaba le ko ten.»

²¹Mankan dɔw be wilila kulujanw kunna, Isirayɛlidenw kasikan n'u daalilikan lo. Bari, u ye sirajugu ta ka ɲinɛ ne Masaba u ka Ala kɔ.

²²«Deen tilenbali nunu! Aw ye segi. Ne bena aw dɛmɛ ka tilenbaliya dabila.» Tiɲɛ na, an be nana i fɛ, bari e le ye Masaba ye, an ka Ala.

²³Tiɲɛ na, kuluw kan fɛɛnw n'a mankanw bɛɛ ye fuu ye. Sɔbɛ la, Isirayɛli ka kisili be bɔ Masaba an ka Ala le fɛ.

²⁴*Baali sɔnko ye an faaw ka baara tɔnɔ bɛɛ cɛn kabini an denmisɛnman, u ka begɛnw bɛɛ, ani u deen cɛman ni musomanw.

²⁵An ka kan ka maloya k'an kuun surun. Bari, an ye Masaba an ka Ala hakɛ ta, anw, n'an faaw, kabini an denmisɛn tuma fɔɔ ka n'a bila bii la. An ma mɛnni kɛ Masaba an ka Ala fɛ.