Read dyu Zeremi ka kitabu 30 Bible Online

Zeremi ka kitabu 30 - dyu bible

Zeremi ka kitabu 30

¹Masaba kumana Zeremi fɛ ko:

²«Ne Masaba, Isirayɛli ka Ala ko: Ne be kuma minw fɔra i ye, o bɛɛ sɛbɛn sɛbɛ dɔ kɔnɔ.

³Loonw be na, ne ben'a kɛ ne ka mɔgɔ minw minɛna ka taga Isirayɛli ni Zuda mara mɔgɔw cɛma be kɔsegi. Ne tun ye dugukolo min di u faaw ma, ne ben'a kɛ u be segi o kan. A be kɛ u ta ye tugu.» Masaba le ko ten.

⁴Masaba ye kuma minw fɔ Isirayɛli ni Zuda maraw kosɔn, o filɛ nin ye:

⁵Masaba ko: «An be jatigɛkulekan mɛnna. Tɔɔrɔ lo, hɛrɛ te yen.

⁶Aw ka ɲiningali kɛ k'a filɛ, yala cɛɛ be wolo wa? Ne do ɲaa be cɛɛw la, u bolo b'u soron la i ko muso min b'a fɛ ka wolo? Mun na bɛɛ ɲaa kumuna?

⁷Bɔnɛ lo! Nin ye lonba ye, min ɲɔgɔn te yen. Tɔɔrɔ waati lo Yakuba kɔmɔgɔw fɛ, nga u bena bɔ a la.

⁸«O loon na, ne bena u ka zuu kari ka bɔ u kaan na, k'u ka juruw tigɛ. Lonanw tena u bila jɔnya la tugu. Ne Masaba, Setigi le ko ten.

⁹U bena baara kɛ Masaba u ka Ala, ani u ka masacɛ Dawuda ye, ne bena min sigi u kunna.

¹⁰ Ne ka baarakɛlaw Yakuba kɔmɔgɔw, aw kana siran. Isirayɛlidenw, aw kan'a to aw hakili be ɲagami. Ne Masaba le ko ten. Bari ne bena aw kisi ka bɔ jamanajan la. Aw deenw minɛna ka taga yɔrɔ min na, ne bena u kisi ka bɔ yen. Yakuba kɔmɔgɔw bena segi ka na. U bena to lafiya ni hakilisigi la. Mɔgɔ si te na na u hakili ɲagami tugu. Ne Masaba le ko ten.

¹¹Bari ne be n'aw ye waasa k'aw kisi. Ne Masaba le ko ten. Ne tun y'aw jɛnsɛn ka taga siya minw bɛɛ cɛma, ne bena olu bɛɛ halaki pewu, nga n tena aw halaki pewu. N bena aw ɲaa gwan ni tilenninya ye. N te se k'aw to gwansan.»

¹²Masaba ko: «Fura te aw halakiko la, aw ka joli dimi ka bon.

¹³Mɔgɔ te yen min bena lɔ n'aw ka koo ye, ka fura kɛ aw ka joli la. Aw ka joli nin fura te yen.

¹⁴I ɲamɔgɔcɛw bɛɛ ɲinɛna i kɔ, u t'i yɔrɔ ɲini tugu, bari ne y'aw bugɔ i ko mɔgɔ b'a jugu bugɔ cogo min na. N ye ladili fariman le di aw ma, aw ka kojugu caya n'a juguya kosɔn.

¹⁵Mun na aw be kasira aw ka dimiyɔrɔ kosɔn? Aw ka dimi te banta ye do. Aw ka kojuguba n'aw ka kojugu caaman le kosɔn, ne ye nin kɛ aw la.

¹⁶Nga aw halakibagaw bɛɛ bena halaki. Aw juguw bɛɛ bena minɛ ka taga. Minw y'aw ka minanw bɔsi, olu fana ka minanw bena bɔsi. Minw tun benna aw kan, dɔw bena ben olu fana kan.

¹⁷Ne bena aw kɛnɛya, ne bena aw ka jolidaw kɛnɛya. Ne Masaba le ko ten. U be aw minw wele ko: ‹Mɔgɔdanganinw, *Siyɔnka nunu, mɔgɔ si te minw yɔrɔ ɲini.› »

¹⁸Masaba ko: «Yakuba kɔmɔgɔ minw tun minɛna ka taga, ne bena olu kɔsegi. N bena makari u ka gwasow la. Dugu kelen kelen bɛɛ bena sigi a tomow kan. Bonɲuman bɛɛ bena lɔ a lɔyɔrɔkɔrɔ la.

¹⁹U bena barika la, nisɔndiyakan bena bɔ. Ne bena u buguya, u tena na dɔgɔya tugu. Ne bena kunkɔrɔta d'u ma, o tena u mafiɲɛya tugu.

²⁰Yakuba kɔmɔgɔw bena kɛ i ko u tun be cogo min na ka kɔrɔ. A ka jama bena sigicogoɲuman sɔrɔ ne ɲakɔrɔ. Ne bena u tɔɔrɔbagaw bɛɛ ɲaa gwan.

²¹U ɲamɔgɔ bena kɛ u yɛrɛw dɔ ye, u kuntigi bena bɔ olu cɛma. Ne ben'a wele, a bena gwɛrɛ ne la. Jɔn le be se ka gwɛrɛ ne la a yɛrɛ ma ten? Ne Masaba le ko ten.

²²Aw bena kɛ ne ka mɔgɔw ye, ne bena kɛ aw ka Ala ye.»

²³Masaba ka sanfɔɲɔba wilila, a ka dimi lo, a ka fari i ko fununfunun. O be mɔgɔjuguw le kunna.

²⁴Masaba b'a fɛ ka min kɛ, n'a m'o kɛ ka dafa, a ka dimikojugu te tɛmɛ. Loon dɔ, aw bena na o koow faamu.