Read dyu Zeremi ka kitabu 33 Bible Online

Zeremi ka kitabu 33 - dyu bible

Zeremi ka kitabu 33

¹Ka Zeremi datugunin to kɔlɔsilikɛbagaw ka luu kɔnɔ, Masaba kuman'a fɛ tugu ko:

²«Masaba min ye dugukolo dan k'a dilan, ka barika don a la, ale min tɔgɔ ko Masaba, a ko:

³‹I ka ne daali, ne bena i jaabi. N bena kobabaw yira i la, minw dogonin be, i te minw lɔn.›

⁴Bari ne Masaba, Isirayɛli ka Ala b'a fɔra dugu nin soow ani Zuda mara masaw ka koo la, u be minw walakara ka dugu laminikogo lalaga n'u kabakuruw ye janko k'u juguw bali ka yɛlɛ ka don dugu kɔnɔ yɛlɛyɔrɔw la ka kɛlɛ kɛ

⁵ni Babilɔnikaw ye. Soo nunu bena fa suuw la, ne bena minw halaki dimikojugu fɛ. Ne bena n yɛrɛ dogo dugu nin na a ka juguya bɛɛ kama.

⁶«Nga ne bena fura ni kɛnɛya di dugu nin ma, ne bena n ka mɔgɔw kɛnɛya ani ka hɛrɛ ni hakilisigi d'u ma.

⁷Zuda ni Isirayɛli mara mɔgɔw minw minɛna ka taga, ne bena olu kɔsegi ka na. Ne bena u sigi i n'a fɔ u tun be cogo min na fɔlɔfɔlɔ.

⁸U filila ne ma koo min bɛɛ la, ne bena u saniya k'o nɔgɔ nin bɛɛ bɔ u la. U filila ka muruti ne ma koo min bɛɛ la, ne bena o bɛɛ yafa u ma.

⁹Ne bena koɲuman minw bɛɛ kɛ Zeruzalɛmu ye, ni diɲɛ kɔnɔ siyaw bɛɛ y'o kibaru mɛn tuma min na, dugu nin bena kɛ ne tɔgɔ bɔ sababu ye, ani nisɔndiya ni tanuli, ani kunkɔrɔta sababu ye ne fɛ u ɲana. Ne bena hɛrɛ min bɛɛ kɛ Zeruzalɛmu ye, u bena kabakoya ani ka yɛrɛyɛrɛ o kosɔn.

¹⁰ «Masaba ko: ‹Aw b'a fɔra ko yan ye dusukasiyɔrɔ ye, ko mɔgɔ te yen, begɛn te yen. Nga Zuda mara duguw kɔnɔ, ni Zeruzalɛmu bɔlɔnw kɔnɔ, mɔgɔ ni begɛn te yɔrɔ minw na, ɲanagwɛ ni nisɔndiyaba mankan, ani kɔɲɔcɛ ni kɔɲɔmuso ka dɔnkililakan bena mɛn yen tugu, ni mɔgɔw dɔnkililakan minw be tagara foli saraka bɔ Masaba ye a ka soo kɔnɔ ka to k'a fɔ ko: Aw ka barika la Masaba, Setigi ye, bari a ka ɲi, a ka ɲumanya te ban abada. Tiɲɛ na, ne bena jamana nin lalaga kura ye, k'a kɛ i n'a fɔ fɔlɔ.› Masaba le ko ten.

¹²«Masaba, Setigi ko: ‹Dusukasiyɔrɔ nin, fɔɔ mɔgɔ ni begɛn te yen nin, wɛɛrɛw bena lalaga a duguw bɛɛ kɔnɔ tugu. Begɛndɛndɛbagaw ben'u ka sagaw gwɛn ka don yen ka lafiɲɛ.

¹³Dugu minw be kuluyɔrɔ la, ni kulujukɔrɔ mara la, ani worodugu ɲafan fɛ, ni minw be Bɛnzamɛn mara la, ni Zeruzalɛmu lamini na, ani Zuda mara la, sagaw bena tɛmɛ u jatibaga ɲafɛ yen tugu.› Masaba le ko ten.»

¹⁴ Masaba ko: «Loonw be na, ne tun ye n daa di Isirayɛli ni Zuda mara mɔgɔw ma ɲumanya min la, n n'o kɛ.

¹⁵O waati yɛrɛ la tigitigi, ne ben'a kɛ mɔgɔtilennin be wili Dawuda kɔmɔgɔw la, ale bena jamana mara tilenninya ni hɔrɔnya la.

¹⁶O waati la, Zuda mara mɔgɔw bena kisi, Zeruzalɛmu be to hakilisigi la. Dugu nin tɔgɔ bena wele ko: ‹An ka koɲanabɔbaga ye Masaba lo ye.› » Masaba le ko ten.

¹⁷ Masaba ko: «Mɔgɔ tena dɛsɛ tuma si Dawuda kɔmɔgɔw la min bena sigi a ka masasigilan kan Isirayɛlidenw kunna.

¹⁸ Sarakalasebaga tena dɛsɛ Levi kɔmɔgɔw la min bena to ka lɔ ne ɲakɔrɔ ka saraka jɛnitaw bɔ, ka wusulan jɛni, ni suman sarakaw, ani ka saraka bɔ loon o loon.»

¹⁹O kɔ, Masaba kumana Zeremi fɛ tugu.

²⁰A ko: «Ne ye min latigɛ tile ni suu kosɔn, n'aw sera k'o cɛn, fɔɔ dugu te gwɛ a gwɛwaati la, suu te ko a kowaati la fana,

²¹o tuma na, ne ye bɛɛn min kɛ ni n ka baarakɛla Dawuda ye, o bena se ka cɛn. O la, a deen tena sɔrɔ ka sigi a nɔɔ na masaya la. A bena kɛ ten fana sarakalasebagaw fɛ, minw be ne ka baara la.

²²Mɔgɔ te se ka lolow ani kɔgɔjida la cɛncɛnkisɛ jati k'u daa lɔn cogo min na, o cogo kelen na, ne bena n ka baarakɛla Dawuda kɔmɔgɔw caya, ani Levi taw, olu minw be ne ka baara la.»

²³Masaba kumana Zeremi fɛ ko:

²⁴«Mɔgɔ nunu be min fɔra, i t'o mɛnna wa? U ko: ‹Masaba ye gwaso fila [1] minw woloma k'u kɛ a taw ye, a y'u fili.› O la, u te ne ka mɔgɔw jati, u t'u jatira siya ye tugu.

²⁵Masaba ko: ‹N'a y'a sɔrɔ ko ne le ye suu ni tile dan ani ka sankolo ni dugukolo sariyaw sigi,

²⁶o tuma na, ne te na ban Yakuba ni n ka baarakɛla Dawuda kɔmɔgɔw la, ka ban k'a deenw dɔw ta k'u sigi Ibrayima ni Isiyaka ani Yakuba kɔmɔgɔw kunna! Bari ne bena u mɔgɔw kɔsegi ka na, minw tun minɛna ka taga, ka makari u la.› »