Read dyu Zeremi ka kitabu 34 Bible Online

Zeremi ka kitabu 34 - dyu bible

Zeremi ka kitabu 34

¹ Ka Babilɔni masacɛ Nabukodonozɔri n'a ka kɛlɛbolo bɛɛ, ani a ka mara kɔnɔ jamana mɔgɔw bɛɛ ni siyaw bɛɛ to kɛlɛ la ni Zeruzalɛmu n'a gɛrɛfɛduguw bɛɛ ye, Masaba kumana Zeremi fɛ ko:

²«Masaba, Isirayɛli ka Ala ko: taga kuma Zuda mara masacɛ Sedesiyasi fɛ k'a fɔ a ye ko: Ne Masaba ko ne bena dugu nin don Babilɔni masacɛ bolo, a ben'a jɛni.

³Ele kɔni tena bɔ a bolo! I bena minɛ ka don a bolo. I ɲaa bena Babilɔni masacɛ ye, a bena kuma i fɛ daa ni daa. I bena taga Babilɔni.

⁴«Zuda mara masacɛ Sedesiyasi, i tulo malɔ Masaba ka kuma na. Masaba b'a fɔra i ka koo la ko: I tena faga ni murujan ye.

⁵I bena sa hɛrɛ la. U tun ye fɛɛn kasadimanw jɛni i faaw ye, masa minw tɛmɛna i ɲa, k'u sanga kɛ cogo min na, o cogo kelen na, o bena i sanga kɛ ka to k'a fɔ ko: ‹Ee, ne kuntigi!› Bari ne ye min fɔ, ne y'o fɔ.» Masaba le ko ten.

⁶Kira Zeremi y'o kuma nunu bɛɛ fɔ Zuda mara masacɛ Sedesiyasi ye Zeruzalɛmu.

⁷O y'a sɔrɔ Babilɔni masacɛ ka kɛlɛbolo b'a la ka Zeruzalɛmu kɛlɛ, ani u ma se Zuda mara dugu minw kɔrɔ fɔlɔ, Lakisi ni Azeka. Olu dama tun tora Zuda mara dugu barikamanw cɛma.

⁸Masaba kumana Zeremi fɛ, o y'a sɔrɔ masacɛ Sedesiyasi tun ye bɛɛn kɛ ka ban ni Zeruzalɛmukaw bɛɛ ye ko u ka jɔɔnw hɔrɔnyali wango la.

⁹Ni eburu be jɔnya la mɔgɔ o mɔgɔ fɛ, a mana kɛ cɛɛ ye, walima muso ye, o tigi k'u hɔrɔnya. Mɔgɔ si man kan tugu k'a balima zuwifu mara jɔnya la.

¹⁰Jamana ɲamɔgɔw bɛɛ ni mɔgɔ minw bɛɛ y'o bɛɛn nin kɛ k'u bena u ka jɔɔn cɛmanw ni musomanw hɔrɔnya, ko u tena u mara tugu jɔnya la, u y'o kuma bato ka jɔɔnw hɔrɔnya.

¹¹Nga, o kɔfɛ, u ka jɔɔn nunu u tun ye minw hɔrɔnya, u y'u minɛ k'u bila jɔnya la tugu.

¹²O la, Masaba kumana Zeremi fɛ, Masaba ko:

¹³«Ne Masaba, Isirayɛli ka Ala ko: Ne y'aw faaw bɔ loon min na Ezipiti jamana ka jɔnya la, ne n'aw faaw tun bɛnna nin na ko:

¹⁴ ‹N'aw balima eburu dɔ y'a yɛrɛ feere aw dɔ ma ka kɛ jɔɔn ye, saan wolonwula tɛmɛnin kɔ, a ka kan ka hɔrɔnya. A bena to i ka jɔnya la saan wɔɔrɔ, o kɔ, i b'a hɔrɔnya.› Nga aw faaw ma ne ka kuma bato, u ma mɛnni kɛ n fɛ.

¹⁵Aw tun nimisara ka faran aw ka kojugu la ka kotilennin kɛ n ɲakɔrɔ. Aw balima jɔɔn minw b'aw fɛ, aw kelen kelen bɛɛ ye olu hɔrɔnyali wango la. Aw yɛrɛ ye layidu ta ne ɲakɔrɔ soo kɔnɔ, ne tɔgɔ be min kan.

¹⁶Nga sisan aw y'aw kɛcogo yɛlɛma, ka ne tɔgɔ cɛn. Aw tun ye cɛɛ ni muso minw hɔrɔnya, aw kelen kelen bɛɛ ye aw taw minɛ, k'u kɛ aw ka jɔɔnw ye tugu.»

¹⁷Masaba ko: «Aw ma mɛnni kɛ ne fɛ k'aw balimaw hɔrɔnyali wango la. O la, ne bena hɔrɔnyali wango la ni murujan, ni kɔngɔ, ani fɔɲɔbana ye aw kama. Ne bena aw kɛ siranyafɛnw ye jamanaw bɛɛ mɔgɔw fɛ. Ne Masaba le ko ten.

¹⁸Mɔgɔ minw ye bɛɛn kɛ ne ɲakɔrɔ ka tila k'a cɛn, n'u ma o bato, ne bena olu kɛ i n'a fɔ misi, u ye min cɛtigɛ fila ka tɛmɛ u cɛma.

¹⁹Zuda mara ɲamɔgɔw, ni Zeruzalɛmu taw, ni luu kɔnɔ mɔgɔbabaw, ani sarakalasebagaw, ni jamanaden minw bɛɛ tɛmɛna misiden cɛtigɛninw cɛma,

²⁰ne bena olu don u juguw bolo, minw b'a fɛ k'u faga. U suu bena kɛ kɔnɔw ni kongosogow ka dumuni ye.

²¹N bena Zuda mara masacɛ Sedesiyasi n'a ka dakɔrɔsigiw don u juguw bolo, minw b'a fɛ k'u faga. Ne bena u don Babilɔni masacɛ ka kɛlɛdenw bolo, minw taatɔ lo ka bɔ aw kɔrɔ.

²²Ne bena sira di o be kɔsegi ka na dugu nin kama. U ben'a kɛlɛ ka se a kɔrɔ, u ben'a jɛni. N bena Zuda mara duguw kɛ dusukasiyɔrɔ ye, mɔgɔ te yɔrɔ min na. Ne Masaba le ko ten.»