Read dyu Zeremi ka kitabu 37 Bible Online

Zeremi ka kitabu 37 - dyu bible

Zeremi ka kitabu 37

¹ Babilɔni masacɛ Nabukodonozɔri ye Zoziyasi deen Sedesiyasi sigi masaya la Zuda mara kunna, Yoyakimu dencɛ Koniyawu [1] nɔɔ na.

²Ale, n'a ka dakɔrɔsigiw, ni jamanadenw tun te mɛnni kɛ Masaba ka kuma na kira Zeremi fɛ.

³Masacɛ Sedesiyasi ye Selemiya deen Yewukali ni Sefaniya, sarakalasebaga Maaziya deen ci, k'u ka ta'a fɔ kira Zeremi ye ko: «Masaba an ka Ala daali an ye.»

⁴O y'a sɔrɔ u tun ma Zeremi datugu kaso la fɔlɔ, a tun be yaalayaala mɔgɔw cɛma.

⁵O waati la, Ezipiti masacɛ ka kɛlɛbolo bɔra Ezipiti jamana na. Babilɔnika minw tun nana Zeruzalɛmu datugu, olu y'o mɛn minkɛ, u bɔr'a kɔrɔ.

⁶Masaba kumana kira Zeremi fɛ ko:

⁷«Ne Masaba, Isirayɛli ka Ala ko aw k'a fɔ Zuda mara masacɛ ye, min y'aw ci ka na ne ɲininga, ko: ‹Ezipiti masacɛ ka kɛlɛbolo min bɔra Ezipiti jamana na k'u be na aw dɛmɛ, olu be kɔsegira u ka jamana na, Ezipiti.

⁸Babilɔnikaw bena segi ka na dugu nin kɛlɛ, k'a minɛ, k'a jɛni.›

⁹Ne Masaba ko: ‹Aw kan'aw yɛrɛ nigɛ k'a miiri ko Babilɔnikaw bena taga k'aw to ten, bari u te na taga!

¹⁰Hali n'aw sera aw kɛlɛɲɔgɔn Babilɔnika nunu kɔrɔ, k'u tɔɔ to mɔgɔ mandiminin damani ye, olu bena wili u ka fanibuguw kɔnɔ ka na dugu nin jɛni.› »

¹¹Babilɔnikaw ka kɛlɛbolo tun wilila ka bɔ Zeruzalɛmu tuma min na Ezipiti masacɛ ka kɛlɛbolo kosɔn,

¹²Zeremi bɔra Zeruzalɛmu ko a be taga Bɛnzamɛn mara la, janko k'a niyɔrɔ minɛ fɛɛn tilanta dɔ la a ka mɔgɔw cɛma.

¹³A tagara se Bɛnzamɛn ka daa la. Daa kɔlɔsibagaw ɲamɔgɔ dɔ tun be o yɔrɔ la, min tɔgɔ ko Yiriya, Ananiya deen Selemiya deen tun lo. Ale ye kira Zeremi minɛ k'a fɔ ko: «I be farala Babilɔnikaw kan kɛ!»

¹⁴Zeremi y'a fɔ ko: «Tiɲɛ tɛ, ne te farala Babilɔnikaw kan dɛ!» Nga Yiriya ma sɔn ka mɛnni kɛ Zeremi fɛ. A y'a minɛ ka taga n'a ye ɲamɔgɔw fɛ.

¹⁵Olu dimina Zeremi kɔrɔ kosɔbɛ, u y'a bugɔ ka ta'a datugu sɛbɛnnikɛla Yonatan ka soo kɔnɔ, u ye yɔrɔ min kɛ kasobon ye.

¹⁶U ye Zeremi datugu ten kaso la, dugukolo jukɔrɔbon dɔ la. A tora yen fɔɔ waatijan.

¹⁷Masacɛ Sedesiyasi ye mɔgɔ bila ka taga Zeremi bɔ ka na n'a ye. Masacɛ y'a ɲininga dogo la a ka soo kɔnɔ ko: «Yala, Masaba ye fɛɛn dɔ fɔ wa?» Zeremi y'a jaabi ko: «Ɔnhɔn.» O kɔ, a ko: «Masaba bena e don Babilɔni masacɛ bolo.»

¹⁸Zeremi tilara k'a fɔ a ye ko: «Ne ye kojugu jumɛn le kɛ ele n'i ka dakɔrɔsigiw ni jama na, ni aw ye ne don kaso la?

¹⁹Kira minw tun b'a fɔra aw ye ko Babilɔni masacɛ tena se aw ma, ani jamana ma, olu be min?

²⁰Masacɛ, ne matigi, sisan, sabali, mɛnni kɛ ne fɛ, ne ka daalili lamɛn. Kana ne bila ka taga Yonatan sɛbɛnnikɛla ka soo tugu, n'o tɛ, ne bena sa yen.»

²¹Masacɛ Sedesiyasi ye sira di k'u ka Zeremi mara kɔlɔsilikɛbagaw ka luu kɔnɔ, ka to ka burukala kelen d'a ma ka bɔ burujɛnibagaw fɛ loon o loon fɔɔ ni dumuni dɛsɛra dugu kɔnɔ waati min na. A kɛra ten, Zeremi tora kɔlɔsilikɛbagaw ka luu kɔnɔ.