Read dyu Zeremi ka kitabu 38 Bible Online

Zeremi ka kitabu 38 - dyu bible

Zeremi ka kitabu 38

¹Matan deen Sefatiya ni Pasewuri deen Gedaliyawu ani Sɛmɛliyawu deen Yukali ni Malikiya deen Pasewuri ye Zeremi ka kuma mɛn, a tun be minw fɔra jama bɛɛ ye ko:

²«Masaba ko: ‹Mɔgɔ min bena to dugu nin kɔnɔ, murujan, ni kɔngɔ ni fɔɲɔbana le bena o tigi faga. Nga ni mɔgɔ min bɔra k'a yɛrɛ di Babilɔnikaw ma, o tigi bena kisi ka to nii na.

³Ne bena dugu nin don Babilɔni masacɛ ka kɛlɛbolo bolo, ko u ben'a minɛ. Siga t'a la.› »

⁴Ɲamɔgɔ nunu y'a fɔ masacɛ ye ko: «Fɔɔ cɛɛ nin ka faga le, bari kɛlɛden tɔɔ minw tora dugu kɔnɔ, a be olu ni jama bɛɛ fari fagara. Cɛɛ nin te siya nin ka hɛrɛ fɛ fɔɔ a ka halaki.»

⁵Masacɛ Sedesiyasi y'u jaabi ko: «A b'aw bolo, ne te se ka foyi kɛ aw la.»

⁶U ye Zeremi minɛ k'a jigi ni juru ye masacɛ deen Malikiya ka dingɛ kɔnɔ, min tun be kɔlɔsilikɛbagaw ka luu kɔnɔ. Jii tun te dingɛ nin kɔnɔ, pɔtɔpɔtɔ le tun be yen. Zeremi jigira o bɔgɔ nin kɔnɔ.

⁷Etiyopika dɔ tun ye dakɔrɔsigi ye masacɛ ka soo kɔnɔ, a tɔgɔ ko Ebɛdimelɛki. Ale y'a mɛn ko u ye Zeremi don kaso dingɛ kɔnɔ. Ka masacɛ to Bɛnzamɛn ka daa la,

⁸Ebɛdimelɛki bɔra masaso kɔnɔ ka ta'a fɔ masacɛ ye ko:

⁹«Masacɛ, ne kuntigi, mɔgɔ nunu ye kojugu dɔrɔn le kɛ kira Zeremi la! U y'a fili dingɛ kɔnɔ, kɔngɔ ben'a faga yen, bari, dumuni te dugu kɔnɔ tugu.»

¹⁰Masacɛ y'a fɔ Etiyopika Ebɛdimelɛki ye ko: «Mɔgɔ bi saba minɛ ka fara i kan, aw ka taga kira Zeremi bɔ kaso dingɛ nin kɔnɔ yanni a ka sa.»

¹¹Ebɛdimelɛki tagara n'o mɔgɔ nunu ye, u donna masacɛ ka soo kɔnɔ, ka taga boon dɔ kɔnɔ, nafolo marayɔrɔ jukɔrɔ ka fanikolon dɔw tɔmɔ yen k'u siri juru la k'u jigi Zeremi ye dingɛ kɔnɔ.

¹²O kɔ, a y'a fɔ Zeremi ye ko: «Fanikolon nunu don i gaman kɔrɔ juru nunu sanfɛ.» Zeremi y'a kɛ ten.

¹³U ye Zeremi sama ni juru ye k'a bɔ dingɛ nin kɔnɔ. Zeremi tora kɔlɔsilikɛbagaw ka luu kɔnɔ.

¹⁴Masacɛ Sedesiyasi ye cii di k'u ka taga kira Zeremi ɲini ka na n'a ye ale fɛ Masaba ka soo donda sabanan na. A y'a fɔ Zeremi ye ko: «Ne bena i ɲininga fɛɛn kelen na. Kana foyi dogo n la.»

¹⁵Zeremi y'a jaabi ko: «Ni ne ye tiɲɛ fɔ i ye, i tena ne faga wa? Ni ne y'i ladi, i tena mɛnni kɛ!»

¹⁶O tuma na, masacɛ Sedesiyasi ye layidu ta Zeremi ye gundo la ko: «Masaba kosɔn, ale min be nii don an na, ne tena i faga. Mɔgɔ minw b'a fɛ k'i faga, n tena i don olu bolo.»

¹⁷O kɔ, Zeremi y'a fɔ Sedesiyasi ye ko: «Masaba, Setigi Ala, Isirayɛli ka Ala ko: ‹N'i bɔra k'i yɛrɛ di Babilɔni masacɛ ka kɛlɛkuntigiw ma, i bena kisi, dugu nin fana tena na jɛni. E n'i ka somɔgɔw bena to niin la.

¹⁸Nga, n'i ma bɔ k'i yɛrɛ di u ma, ne bena dugu nin don Babilɔnikaw bolo, u ben'a jɛni. Ele kɔni, i tena bɔ u bolo.› »

¹⁹Masacɛ Sedesiyasi ye Zeremi jaabi ko: «Zuwifu minw farala Babilɔnikaw kan, ne hakili ɲagaminin lo olu le kosɔn. U kana n don u bolo u be n tɔɔrɔ.»

²⁰Zeremi y'a jaabi ko: «I tena don u bolo. Ne be Masaba ka kuma min fɔra i ye, i tulo malɔ o la, e ta bena ɲa, i bena kisi.

²¹N'i banna k'i yɛrɛ di, Masaba ye min yira ne la, o filɛ:

²²Muso minw tora Zuda mara masacɛ ka soo kɔnɔ, u bena olu bɛɛ minɛ ka taga n'u ye Babilɔni masacɛ ka kɛlɛkuntigiw fɛ. Muso nunu bena to k'a fɔ ko: ‹I terisɔbɛw y'i nigɛ ka se i kɔrɔ. Gwɛlɛya sera i ma, i teriw y'i bila.›

²³«U bena i ka musow n'i deenw bɛɛ minɛ ka taga n'u ye Babilɔnikaw fɛ. Ele fana tena bɔ u bolo, Babilɔni masacɛ bena i minɛ, dugu nin bena jɛni.»

²⁴Sedesiyasi y'a fɔ Zeremi ye ko: «An ye kuma min fɔ ɲɔgɔn ye sisan, kan'a to mɔgɔ si k'o mɛn. N'o tɛ, i bena sa.

²⁵Ni n ka kɛlɛkuntigiw y'a mɛn ko an kumana ɲɔgɔn fɛ, n'u nana i ɲininga ko: ‹I ye min fɔ masacɛ ye, o fɔ an ye. Kana foyi dogo an la, n'o tɛ, an bena i faga. Masacɛ ye mun le fɔ i ye?›

²⁶I bena u jaabi ko: ‹Ne ye masacɛ daali ko a kana n bila ka taga Yonatan ka soo, n'o tɛ, n bena sa yen.› »

²⁷Masacɛ ka kɛlɛkuntigiw bɛɛ nana Zeremi fɛ k'a ɲininga. A y'u jaabi i ko masacɛ tun y'a fɔ a ye cogo min na. O la, u tagara ka Zeremi to. Mɔgɔ si tun ma masacɛ ni Zeremi ka baro mɛn.

²⁸ Zeremi tora kɔlɔsilikɛbagaw ka luu kɔnɔ fɔɔ Zeruzalɛmu dugu minɛlon. Zeruzalɛmu minɛna cogo min na, o filɛ: