Read dyu Zeremi ka kitabu 4 Bible Online

Zeremi ka kitabu 4 - dyu bible

Zeremi ka kitabu 4

¹«Isirayɛlidenw, n'aw kɔsegira ne ma, ne Masaba le ko ten, n'aw y'aw ka joow fili ka bɔ ne ɲakɔrɔ, n'aw te yaalayaala aw kunfɛ tugu,

²n'aw kalila ne Masaba tɔgɔ la, hɔrɔnya, ni tilenninya la, ne Masaba bena siyaw ta ɲa, u bena kunkɔrɔta sɔrɔ ne kosɔn.»

³ Masaba b'a fɔra Zeruzalɛmukaw, ni Zuda mara mɔgɔw ye ko: «Aw ka forokura waga sasa aw yɛrɛ ye, aw kana foyi dan biin na.

⁴Zeruzalɛmukaw, ni Zuda mara mɔgɔw, miirijugu min b'aw dusu la, aw k'o bɔ yen ka kɛ Masaba taw ye. Aw ka kojugu miiri bɔ aw dusu la. N'o tɛ, n dusu bena dimi, a do bena kɛ i ko tasuma aw ma mɔgɔ si tena se ka min faga, aw ka kɛwalijuguw kosɔn.

⁵«Aw ka nin wango la Zuda mara la, aw k'a to Zeruzalɛmu k'o mɛn, aw ka buru fiyɛ jamana kɔnɔ, aw k'aw kaan kɔrɔta k'a fɔ ko u ka lajɛn, an ka taga dugu barikamanw kɔnɔ!

⁶K'u ka taamasiɲɛ dɔ kɔrɔta *Siyɔn sanfɛ. K'u ka boli, u kana lɔ. Bari ne bena balawu ci ka bɔ kɔgɔdugu ɲafan fɛ, halakiliba lo.»

⁷Jara bɔr'a layɔrɔ la, siyaw halakibaga ye taama daminɛ. A bɔr'a ka sigiyɔrɔ la, waasa ka na aw ka jamana kɛ tomo ye. A bena aw ka dugubabaw halaki k'o mɔgɔw ban.

⁸O la sa, aw ka dusukasifaniw don aw kaan na, ka kasi ka ŋunan, bari, Masaba diminin be an kɔrɔ kosɔbɛ halibi.

⁹Masaba ko: «O loon na, masacɛ ni ɲamɔgɔ tɔw tena jagwɛlɛya sɔrɔ. Sarakalasebagaw bena kabakoya, kiraw kɔnɔ bena gwan.»

¹⁰O la, ne ko: «Ee! Matigi, Masaba, o tuma na, i ye siya nin ni Zeruzalɛmu nigɛ kɛ? E tun y'a fɔ ko: ‹Aw bena hɛrɛ sɔrɔ›, nga murujan do be sera an nii ma!»

¹¹O waati la, u ben'a fɔ siya nin ani Zeruzalɛmukaw ye ko: «Fɔɲɔ gwanninman dɔ be nana ka bɔ kulujanw kan, kongokolon kɔnɔ. A be nana n ka mɔgɔw kan, suman fiyɛta tɛ.

¹²Fɔɲɔba lo, n be bɔra n'a ye yanfɛ. Sisan, ne yɛrɛ le bena kiti tigɛ u kan.»

¹³A natɔ filɛ i ko sankabaw! A ka wotorow be i ko sanfɔɲɔ. A ka soow ka teli ni sɛgɛn ye. Bɔnɛ ye anw ta ye, an ta cɛnna.

¹⁴Zeruzalɛmu, i dusu saniya ka miirijuguw dabila waasa i ka kisi. I bena o to i kɔnɔ fɔɔ tuma jumɛn?

¹⁵Bari u be wango lara kabini Dan mara la, balawu ŋunuŋunuko be mɛnna kabini Efarayimu kulu kan.

¹⁶«Aw k'a fɔ siyaw ye, aw ka Zeruzalɛmu lasɔmi ko duguminɛla dɔw be nana ka bɔ jamanajan la, u be kulera ka na Zuda mara duguw kama.

¹⁷U ye Zeruzalɛmu lamini i ko forokɔlɔsibagaw b'a kɛ cogo min na. Bari, a murutira ne ma. Ne Masaba le ko ten.

¹⁸I taamacogo n'i ka kɛwaliw le y'o lase i ma. I ka juguya sara lo. Tiɲɛ lo, a ka gwɛlɛ, a b'i dusu cɛn kosɔbɛ.»

¹⁹Kɔnɔgwan, o kɔnɔgwan! Tɔɔrɔ be n kan. N dusu tɔɔrɔnin be! N kɔnɔ gwannin lo, n te se ka je. Bari, ne ye buru fiyɛkan mɛn, kɛlɛdenw pɛrɛnkan.

²⁰U b'a fɔra ko bɔnɛ o bɔnɛ, jamana bɛɛ halakira. N ka soow bɛɛ cira ɲatugu n'a yɛlɛ cɛ.

²¹Fɔɔ tuma jumɛn ne bena to ka kɛlɛkɛtaamasiɲɛ ye ani ka buru fiyɛkan mɛn?

²²«Ne ka mɔgɔw ye nalomanw ye, u te ne lɔn. Hakilitanw lo, u te foyi faamu. U be se kojugukɛ dama le la, u te koɲumankɛ lɔn.»

²³Ne ye dugukolo filɛ, a labɛnnin tɛ, a lakolon lo. Ne ye sankolo filɛ, yeelen t'a la tugu.

²⁴Ne ye kuluw filɛ, u be yɛrɛyɛrɛla, tintinw bɛɛ be yuguyugura.

²⁵Ne ye filɛli kɛ, mɔgɔ tun te yen tugu. Hali kɔnɔw, u bɛɛ tununa.

²⁶Ne ye filɛli kɛ, yiri yɔrɔw kɛra yɔrɔlakolonw ye, o yɔrɔ duguw bɛɛ cɛnna Masaba dimikojugu fɛ.

²⁷Masaba y'a fɔ ko: «Jamana bɛɛ bena cɛn, nga n ten'a halaki pepewu.

²⁸O kama, dugukolo bena kɛ sanga la, sankolo bena dibi. Bari, ne kumana, n tena bɔ n ka kuma kan. Ne y'o latigɛ ka ban, n te segi kɔ fana.»

²⁹Dugu mɔgɔw bɛɛ be bolila sotigiw ni kalatigiw ka mankan ɲa. U be boli ka don tuuw kɔnɔ, ka yɛlɛ faraw kan. O ye dugu bɛɛ labila. Mɔgɔ te dugu kɔnɔ tugu.

³⁰Fɛɛn halakinin, i bena mun le kɛ? Hali n'i be dakamanafaniw le don, ka sanu masirifɛnw don, ka kale la i ɲaa na, e b'i yɛrɛ lalagara fu. I ka ɲamɔgɔcɛw mako t'i la, u b'i ka saya le fɛ.

³¹Tiɲɛ na, ne be kulekan dɔ mɛnna, i ko muso jigibagatɔ ta. Ne be ŋunankan dɔ mɛnna, i ko muso min b'a ka jigiko fɔlɔ kɛra. *Siyɔnkaw kasikan lo, u ninakili degunna, u b'u bolow fɛnsɛnna. U ko: «We! An ta cɛnna! An be halakira mɔgɔfagalaw bolo!»