Read dyu Zeremi ka kitabu 40 Bible Online

Zeremi ka kitabu 40 - dyu bible

Zeremi ka kitabu 40

¹Masaba kumana Zeremi fɛ tuma min na masacɛ kɔlɔsibagaw kuntigi Nebuzaradan tun y'a bila ka bɔ Arama. Mɔgɔ minw bɛɛ tun minɛna Zeruzalɛmukaw ni Zuda mara mɔgɔw cɛma ka taga Babilɔni, a tun ye Zeremi minɛ ka bɔ olu cɛma. O y'a sɔrɔ a tun sirinin be ni jɔrɔkɔ ye.

²Kuntigi nin ye Zeremi minɛ k'a fɔ a ye ko: «Masaba i ka Ala tun ye bɔnɛ min latigɛ yɔrɔ nin kama.

³A ye o le kɛ i ko a tun y'a fɔ cogo min na. Nin bɛɛ kɛra bari aw ye y'a hakɛ ta. Aw ma mɛnni kɛ a fɛ.

⁴Nga sisan, a filɛ, jɔrɔkɔ min b'i bolo la, ne be o bɔ yen bii. N'i b'a fɛ ka taga ni ne ye Babilɔni, i ka na, ne bena janto i la. Nga, n'i t'a fɛ ka taga fana, i be se ka to. Jamana nin bɛɛ filɛ i ɲafɛ, taga i sagolayɔrɔ la.»

⁵A y'a fɔ ko: «Taga Safan dencɛ Ayikamu deen Gedaliya fɛ, Babilɔni masacɛ ye min bila Zuda mara duguw kunna. Taga to n'ale ye jama cɛma, walima yɔrɔ o yɔrɔ y'i diya, taga yen.» O kɔ, masacɛ kɔlɔsibagaw kuntigi ye dumunifɛn ni fɛɛn wɛrɛ d'a ma, k'a bila ka taga.

⁶Zeremi tagara Ayikamu deen Gedaliya fɛ Misipa. Jama min tun tora jamana kɔnɔ, a tora ni Gedaliya ye olu cɛma.

⁷ Kɛlɛkuntigiw bɛɛ n'u ka mɔgɔ minw tun be kongo kɔnɔ olu y'a mɛn ko Babilɔni masacɛ ye Ayikamu deen Gedaliya kɛ lasigiden ye, ka cɛɛw ni musow, ani denmisɛnw, jamana dɛsɛbagatɔw kalifa a ma, minw ma minɛ ka taga Babilɔni.

⁸U n'u kɔmɔgɔw nana Gedaliya fɛ Misipa: Netaniyawu deen Yisimayɛli, ni Kareya deenw, Yowanan ni Yonatan, ani Tanumɛti deen Seraya, ni Ofayi deenw ka bɔ Netofa, ani Yezaniyawu, Makakan deen,

⁹Safan dencɛ Ayikamu deen Gedaliya kalila k'a fɔ u ye ko: «Aw ka sɔn Babilɔnikaw ka fanga ma, aw kana siran. Aw ka to jamana nin kɔnɔ, ka baara kɛ Babilɔni masacɛ ye, aw bena hɛrɛ sɔrɔ.

¹⁰Ne yɛrɛ bena to Misipa dugu kɔnɔ ka kuma Babilɔnikaw fɛ aw tɔgɔ la, minw bena na an fɛ. Aw kɔni, aw ye taga duvɛn ni yiridenw ni tulu bɔ, ani k'u mara aw ka minanw kɔnɔ, aw ye dugu minw minɛ, aw ka to yen.»

¹¹Zuwifu minw bɛɛ tun be Mowabu mara la, ni Amɔn, ni Edɔmu mara la, ani jamana tɔw bɛɛ kɔnɔ y'a mɛn ko Babilɔni masacɛ ye mɔgɔ damani to Zuda mara la, ani ka Safan dencɛ Ayikamu ka deen Gedaliya bila u kunna,

¹²u tun jɛnsɛnna yɔrɔ minw bɛɛ la, u bɛɛ bɔra yen ka segi ka na Zuda mara la Gedaliya fɛ Misipa. U ye duvɛn ni yiriden caaman sɔrɔ.

¹³Kareya dencɛ Yowanan ni kɛlɛkuntigi minw bɛɛ tun be kongo kɔnɔ, olu nana Gedaliya fɛ Misipa,

¹⁴k'a fɔ a ye ko: «I b'a kala ma ko amoniw ka masacɛ Baalisi ye Netaniya deen Yisimayɛli ci ko a ka na i faga wa?» Nga Ayikamu deen Gedaliya ma la u ka kuma na.

¹⁵O la sa, Kareya deen Yowanan y'a fɔ Gedaliya ye dogo la Misipa dugu kɔnɔ ko: «Sira di ne ma, ne be taga Netaniya deen Yisimayɛli faga, mɔgɔ si tena bɔ a kala ma. Mun na ale bena i faga k'a kɛ zuwifu minw bɛɛ lajɛnnin be i kɔrɔ bena jɛnsɛn ani Zuda tɔɔ ka ban?»

¹⁶Ayikamu deen Gedaliya ye Kareya deen Yowanan jaabi ko: «I kan'o kɛ! I be min fɔra Yisimayɛli koo la, tiɲɛ tɛ!»