Read dyu Zeremi ka kitabu 44 Bible Online

Zeremi ka kitabu 44 - dyu bible

Zeremi ka kitabu 44

¹Masaba kumana Zeremi fɛ zuwifuw bɛɛ kosɔn, minw tagara sigi Ezipiti jamana la. Dɔw tun be Migidɔli dugu kɔnɔ, ni Tapanɛ, ni Manfisi, ani Patɔrɔsi mara la. [1]

²Masaba, Setigi, Isirayɛli ka Ala ko: «Ne ye sigɛn min bɛɛ la Zeruzalɛmu ni Zuda mara dugu tɔw bɛɛ kan, aw y'o ye. U kɛra tomow ye bii, mɔgɔ si te yen.

³U ka kojuguw kama lo u ye minw kɛ ka ne dimi. U tagara joow sɔn, k'u bato, u tun te minw lɔn, aw n'aw faaw fana ma minw lɔn.

⁴Ne tora ka n ka baarakɛlaw bɛɛ, kiraw ci aw ma k'a fɔ aw ye ko aw kana kojuguba nin kɛ min man di ne ye fewu.

⁵U m'u tulo malɔ, u ma mɛnni kɛ, k'u ka juguya dabila, k'u ka josɔnko dabila.

⁶O kama, ne dimina ka fariya Zeruzalɛmu bɔlɔnw ni Zuda mara dugu tɔw ma, k'u halaki i n'a fɔ tasuma. U kɛra tomo ye, ani dusukasiyɔrɔw ye bii.

⁷«Ayiwa, sisan, ne Masaba, Setigi Ala, Isirayɛli ka Ala ko: Mun na aw b'a la ka kojuguba nin ɲɔgɔn kɛ aw yɛrɛ la ten, k'a kɛ Zuda mara mɔgɔw halakira, cɛɛw, ni musow, ni denmisɛnw, ani denɲɛninw, fɔɔ tɔɔ si ma to aw la?

⁸Aw be ne dusu dimi n'aw ka kɛwaliw ye. Aw be joo sɔn Ezipiti jamana la, aw nana sigi yɔrɔ min na. Aw ben'a kɛ ten fɔɔ aw be halaki, ani ka kɛ dangafɛn ni maloyafɛnw ye dugukolo kan siyaw bɛɛ fɛ.

⁹Aw faaw, ni Zuda mara masacɛw, n'u ka musow, aw yɛrɛ n'aw ka musow, aw bɛɛ ye kojugu minw kɛ Zeruzalɛmu bɔlɔnw kɔnɔ ni Zuda mara la, aw ɲinɛna o kɔ wa?

¹⁰Fɔɔ ka na se bii ma, u ma nimisa o la ka ye. U ma siran, u ma n ka sariya bato, u ma n ka kuma jati, ne ye min di olu n'uw faaw ma.

¹¹«Ayiwa, o kama, ne Masaba, Setigi, Isirayɛli ka Ala ko: Ne y'a latigɛ ka bɔnɛ lase aw ma, ka Zuda mara mɔgɔw bɛɛ halaki.

¹²Zuda mara mɔgɔ tɔɔ minw tun y'a latigɛ ko u be taga sigi Ezipiti jamana la, ne bena wili olu bɛɛ kama, u bɛɛ bena sa Ezipiti jamana la. Murujan ni kɔngɔ le bena u faga: U bɛɛ, denmisɛn fara mɔgɔkɔrɔba kan, murujan ni kɔngɔ le bena u faga. U bena kɛ dusukasifɛnw, ni dangafɛnw, ani nɛnifɛnw ye.

¹³Minw siginin be Ezipiti jamana la, ne bena na wili olu kama ni murujan ye, ani ka kɔngɔ bila u la, ni fɔɲɔbana, i n'a fɔ ne y'a kɛ Zeruzalɛmukaw la cogo min na.

¹⁴Zuda mara mɔgɔ tɔɔ minw tora n'u nana sigi Ezipiti jamana kɔnɔ, olu si tena bɔ, u si tena to nii la ka segi ka taga sigi Zuda mara la, min ka di u ye haali! Mɔgɔ damani dɔrɔn le bena kɔsegi yen.»

¹⁵Cɛɛ minw tun b'u musow ka josɔnkow kala ma, ni muso caaman minw tun be yen ani mɔgɔ minw bɛɛ tagara sigi Ezipiti jamana ni Patɔrɔsi mara la, olu ye Zeremi jaabi ko:

¹⁶«I ye kuma min fɔ an ye Masaba tɔgɔ la, an t'a fɛ k'u mɛn.

¹⁷An ye koo minw ŋaniya ta, an bena o bɛɛ le kɛ. An bena Sankolo kɔnɔ masamuso [2] sɔn, ani ka jii bɔn a ye, i n'a fɔ an tun y'a kɛ cogo min na Zeruzalɛmu bɔlɔnw kɔnɔ ni Zuda mara dugu tɔw la. Anw, n'an faaw, n'an ka masaw, ani an ɲamɔgɔw. Dumuni tun te dɛsɛ an fɛ, an tun be lafiya la, an tun te gwɛlɛya lɔn.

¹⁸Kabini an y'a sɔnko dabila, ani ka jii bɔnko dabila, fɛɛn bɛɛ be dɛsɛ an fɛ, murujan ni kɔngɔ b'a la k'an faga!»

¹⁹Musow ye dɔ fara o kan ko: «Anw be Sankolo kɔnɔ masamuso sɔn, ka jii bɔn a ye, a fɔra ko an cɛɛw ma sɔn o ma wa? U b'a kala ma ko an be to ka ŋɔmi dilan ka kɛ i ko a jaa yɛrɛ, k'u yiran ani ka jii bɔn a ye.»

²⁰O tuma na, Zeremi y'a fɔ jama bɛɛ ye, cɛɛw ni musow, minw tun b'a jaabira ten ko:

²¹«Aw ye sɔnni min kɛ Zeruzalɛmu bɔlɔnw la, ani Zuda mara dugu tɔw kɔnɔ, aw, n'aw faaw, n'aw ka masaw, ani aw ɲamɔgɔw, ni jamanadenw, yala Masaba ɲinɛna o kɔ wa? A hakili t'a la wa?

²²Aw ka kɛwalijuguw n'aw ka kokolonw kosɔn, Masaba ma se ka muɲu tugu. O kama le aw ka jamana kɛra dangafɛn, ni tomo ye, dusukasiyɔrɔ. A kɛra yɔrɔlakolon ye, mɔgɔ te yen, i n'a fɔ a be cogo min na bii.

²³Nin bɔnɛ nin be sera aw ma bii bari aw ye joow sɔn ka Masaba hakɛ ta, aw ma mɛnni kɛ a fɛ, aw m'a ka sariyaw n'a ka latigɛkow bato.»

²⁴O kɔ, Zeremi y'a fɔ jama bɛɛ ani musow bɛɛ ye tugu ko: «Aw Zuda mara mɔgɔ minw bɛɛ be Ezipiti jamana la, aw ye mɛnni kɛ Masaba ka kuma na.

²⁵Masaba, Setigi, Isirayɛli ka Ala ko: Aw, n'aw musow ye dajuru ta ko aw bena Sankolo kɔnɔ masamuso sɔn ka jii bɔn a ye. Aw ye min fɔ, tiɲɛ na, aw y'o le kɛ. «Ayiwa, aw k'aw ka dajuru sara!

²⁶Ayiwa, aw zuwifu minw siginin be Ezipiti jamana la, aw ye Masaba ka kuma lamɛn. A ko: Ne b'a fɔ aw ye tiɲɛ na ko: Zuda mara mɔgɔ si tena ne tɔgɔ wele tugu ka kali k'a fɔ ko: ‹Matigi, Masaba kosɔn!›

²⁷Ne b'u kɔlɔsira, bɔnɛ kama lo, u ka ɲa kama tɛ. Zuwifu minw bɛɛ siginin be Ezipiti jamana la, olu bɛɛ bena halaki pewu ni murujan, ni kɔngo ye.

²⁸Mɔgɔ damani dɔrɔn bena kisi murujan ma. U bena bɔ Ezipiti jamana la ka kɔsegi Zuda mara la. Nga Zuda mara mɔgɔ tɔɔ minw bɛɛ tun siginin be Ezipiti jamana la, olu ben'a lɔn min ka kuma le bena kɛ, ne ta, walima olu ta.

²⁹«Ayiwa, taamasiɲɛ filɛ, min ben'a yira ko ne bena aw tɔɔrɔ yan yɔrɔ nin na janko aw k'a lɔn ko ne ye bɔnɛ min koo fɔ aw kosɔn, k'o bena kɛ. Ne Masaba le ko ten.

³⁰ Ne bena Ezipiti masacɛ Ofara don a juguw bolo, minw b'a fagayɔrɔ ɲinina i n'a fɔ n ye Zuda mara masacɛ Sedesiyasi don a jugu Babilɔni masacɛ Nabukodonozɔri bolo cogo min na. Min tun b'a fɛ k'a faga.» Masaba le ko ten.