Read dyu Zeremi ka kitabu 46 Bible Online

Zeremi ka kitabu 46 - dyu bible

Zeremi ka kitabu 46

¹Masaba ye kuma min fɔ kira Zeremi ye siya wɛrɛw kosɔn, o filɛ:

² Ezipiti jamana n'a ka masacɛ Neko ka kɛlɛbolo ka koo. Ka Ezipiti masacɛ to Efarati baji daa la Karikɛmisi, Babilɔni masacɛ Nabukodonozɔri nan'a kɛlɛ ka s'a kɔrɔ. O y'a sɔrɔ Zoziyasi deen Yoyakimu tun b'a ka masaya saan naaninan na Zuda mara kunna.

³«Aw ye nigɛkunbɛnnanw labɛn, fitiniw fara belebelew kan. An ka taga kɛlɛ la!

⁴Aw ye soow labɛn! Sotigiw, aw ye yɛlɛ! Aw k'aw ka kɛlɛkɛfugulanw biri k'aw lɔyɔrɔw ta! Aw k'aw ka tamanw dabɔ! Aw k'aw ka nigɛkunbɛnnanw siri!

⁵Ne be mun le yera? U jaa tigɛnin lo, u be segira. See sɔrɔla u ka cɛfariw kan. U be boli fɔɔ u t'u kɔɔ filɛ. Siranya be faan bɛɛ. Ne Masaba le ko ten.

⁶Min seen ka teli u cɛma, ale tena se k'a yɛrɛ bɔsi. Cɛfariw tena se ka kisi. U be talon ka ben Efarati baji daa la, kɔgɔdugu ɲafan fɛ.

⁷Jɔn le be wili i ko Nili baji? Jɔn be wili i ko baa funufununin min be bɔ a daa la?

⁸Ezipiti le be i ko Nili baji, i ko baa funufununin min be bɔ a daa la. A tun ko: ‹Ne bena bɔ ka dugukolo bɛɛ minɛ. Ne bena duguw n'u kɔnɔ mɔgɔw halaki.›

⁹Soow, aw ye girin ka taga! Wotorow, aw ye girin ka taga ni dimi ye! Cɛfariw ka bɔ: Etiyopikaw, Putikaw, aw minw be nigɛkunbɛnnan minɛcogo lɔn. Ludikaw, aw minw be se kalabon la.»

¹⁰O loon nin ye Matigi, Masaba, Setigi ta ye. A ka dimi bɔlon lo. A ben'a dimi bɔ a juguw la. Murujan bena joli min fɔɔ ka fa. O bena kɛ saraka ye Matigi, Masaba, Setigi fɛ kɔgɔdugu ɲafan jamana na, Efarati baji daa la.

¹¹«Ezipitikaw, aw ye taga fura ɲini Galaadi mara la. Aw be fura caaman kɛra gwansan, aw tena kɛnɛya sɔrɔ.

¹²Siyaw bena aw maloyako mɛn. Aw kasikan bena mɛn dugukolo faan bɛɛ la. Cɛfari bena talon a tɔɲɔgɔn na, u fila bɛɛ be ben ɲɔgɔn fɛ.»

¹³ Masaba ye kuma min fɔ kira Zeremi ye Babilɔni masacɛ Nabukodonozɔri ka nako la ka Ezipiti jamana kɛlɛ, o filɛ:

¹⁴«A ka nin fɔ Ezipiti jamana kɔnɔ, aw k'a wango la Migidɔli, ni Manfisi, ani Tapanɛ. Aw k'a fɔ ko: Aw ye taga aw lɔyɔrɔw ta, aw k'aw yɛrɛ labɛn bari murujan be fagali kɛra aw lamini na!

¹⁵Mun na aw ka joo [1] Api bolila? Mun na aw ka tura ma se ka lɔ? Masaba le y'a ben.

¹⁶A y'a kɛ mɔgɔ caaman talonna ka ben ɲɔgɔn kan. U b'a fɔra ɲɔgɔn ye ko: ‹An ka wili ka segi an ka mɔgɔw fɛ an faso la, k'an yɔrɔ jaɲa fagalikɛmurujan la.›

¹⁷U ye Ezipiti masacɛ tɔgɔ la ko: ‹Mankan ye, min y'a to waatiɲuman tɛmɛna.› »

¹⁸Masacɛ min tɔgɔ ko Masaba, Setigi, ale lo ko: «Ka ne to yen, Tabɔri kulu ka jan kuluw cɛma cogo min na, Karimɛli kulu ka jan kɔgɔjida la cogo min na, jugu bena na ten fana.

¹⁹Ezipitikaw, aw y'aw ka minanw labɛn, bari aw bena minɛ ka taga. Manfisi dugu bena kɛ makari yɔrɔ ye, a bena jɛni, mɔgɔ tena to yen.

²⁰Ezipiti be i ko misiɲuman. Nga limɔgɔ dɔ be bɔra kɔgɔdugu ɲafan fɛ ka na a kama.

²¹A ye kɛlɛden minw ta baara la, u tun ye olu minɛ ka ɲa. Nga olu bɛɛ fana bena u kɔɔ di ka boli, olu fana tena se ka lɔ, bari u halakituma sera. U sarawaati le sera.

²²Ezipitikaw be bolila hali u mankan yɛrɛ te mɛn, i ko saa, bari u juguw be nana caaman ni jendew ye u kama i ko lɔgɔtigɛbagaw.

²³U ben'a tuu tigɛ. K'a sɔrɔ mɔgɔ te se ka don tuu nin kɔnɔ, bari u ka ca ni tɔɔnw ye, u daa te se ka lɔn. Ne Masaba le ko ten.

²⁴Ezipitikaw maloyara. U donna siya bolo, min bɔra kɔgɔdugu ɲafan na.»

²⁵Masaba, Setigi, Isirayɛli ka Ala ko: «Ne bena wili Amɔn kama, joo min be Tɛbɛ, ani Ezipiti masacɛ ni Ezipiti n'a ka joow bɛɛ, n'a ka masaw, ni mɔgɔ minw jigi be Ezipiti masacɛ kan.

²⁶Ne bena u don mɔgɔw bolo minw b'u fagayɔrɔ ɲinina. Ne bena u don Babilɔni masacɛ Nabukodonozɔri n'a ka dakɔrɔsigiw bolo. O kɔ, mɔgɔw bena sigi Ezipiti jamana la i n'a fɔ fɔlɔ la. Masaba le ko ten.

²⁷ Nga, aw Yakuba kɔmɔgɔw, ne ka baarakɛlaw, aw kana siran. Isirayɛlidenw, aw kana aw hakili ɲagami, ne bena aw kisi ka bɔ yɔrɔjan na. Aw minɛna ka taga jamana min kɔnɔ, ne bena aw kɔsegi ka bɔ yen. Yakuba kɔmɔgɔw hakili siginin bena kɔsegi. Aw bena lafiya sɔrɔ, mɔgɔ si tena siranya bila aw la tugu.

²⁸Ne ka baarakɛlaw Yakuba kɔmɔgɔw, aw kana siran. Ne Masaba le ko ten. Ne be ni aw ye. Ne y'aw jɛnsɛn siya minw bɛɛ cɛma, ne bena o mɔgɔ nunu halaki pewu. Nga n tena aw halaki pewu. N b'i kolo ni tilenninya ye. N te se k'i to ten i ko mɔgɔ min ma fɛɛn cɛn.»