Read dyu Zeremi ka kitabu 5 Bible Online

Zeremi ka kitabu 5 - dyu bible

Zeremi ka kitabu 5

¹«Aw ka Zeruzalɛmu dugu yaala, k'a filɛ, ka kɔlɔsili kɛ. Aw ka filɛli kɛ a forobayɔrɔw bɛɛ la. Ni aw ye mɔgɔ kelen sɔrɔ yen min tilennin lo, min b'a fɛ a ka koo ka tilen, ne be yafa Zeruzalɛmu ma. Ne Masaba le ko ten.

²Hali n'u be to k'a fɔ u ka kalili la ko: ‹Masaba kosɔn›, u be kali k'a la galon le kan.»

³Masaba, e b'a fɛ i ɲaa ka la tiɲɛ le kan kɛ? E y'u tɔɔrɔ, nga o ma kɛ foyi ye u fɛ. E y'u halaki, nga u ma sɔn ladili ma. U y'u tulo gwɛlɛya i ko fara, u banna ka segi e ma.

⁴Ne tun y'a fɔ n kɔnɔ ko: «Nunu ye fantanw ye, u be koo kɛ u kunfɛ. Bari, u ma Masaba ka sira lɔn, u ka Ala be min fɛ, u m'o lɔn.

⁵O la, n bena taga mɔgɔbabaw fɛ, ka kuma ni olu ye. Olu kɔni be Masaba ka sira lɔn, u ka Ala be min fɛ, u b'o lɔn.» Nga olu fana tun murutinin lo. U ma sɔn ka kolo Ala ye.

⁶O kama, jara be bɔ tuba kɔnɔ k'u faga, kongowulu be bɔ kongo la k'u halaki, waraninkala dogora u ka dugu kɔrɔ, ni mɔgɔ o mɔgɔ bɔra, a b'o tigi faranfaran. Bari u ka murutiko cayara, u ka tilenbaliya ye barika sɔrɔ.

⁷Zeruzalɛmu, ne bena yafa i ma ka la mun kan? I deenw banna ne la, ka to ka kali joow kan. Ne tun y'u makoyafɛnw bɛɛ d'u ma, O n'a ta bɛɛ, u be tila ka kakalaya kɛ. U fanin lo sungurubabaw ka soow kɔnɔ.

⁸U kɛra i ko soo kɔgɔninw, u yɛlɛtuma na, o kelen kelen bɛɛ b'u nunfiɲɛ bɔ u tɔɲɔgɔnw ka musow nɔɔ fɛ.

⁹Ne man kan ka wili u kama o kosɔn wa? Ne Masaba le ko ten. Ne man kan ka n mɔnɛ bɔ o siya nin ɲɔgɔn na wa?

¹⁰«U ka don a ka *ɛrɛzɛnforow la ka halakili kɛ. Nga aw kana o cɛn pepewu. Aw ka ɛrɛzɛn bolow tigɛ. Bari, ne Masaba ta tɛ.

¹¹Tiɲɛ na, u ye ne janfa yɛrɛ le, Isirayɛli ni Zuda mara mɔgɔw.» Masaba le ko ten.

¹²U banna Masaba la, k'a fɔ ko: «A te se ka foyi kɛ! Kojugu si tena an sɔrɔ, murujan ni kɔngɔ tena an sɔrɔ.

¹³Kiraw be i ko fɔɲɔ, u ka kuma te Ala ka kuma ye. U be min fɔ, o ka se u yɛrɛ ma!»

¹⁴O la, Masaba, Setigi Ala ko: «U kumana ten minkɛ, ne ka kuma min be e Zeremi daa la, n bena o kɛ tasuma ye, ka olu kɛ lɔgɔsiri ye k'a jɛni.

¹⁵Ne bena siya dɔ bila ka bɔ fɔɔ yɔrɔjan ka na aw Isirayɛlidenw kama. Ne Masaba le ko ten. Siya min lo, a fanga te ban, a buruju bɔyɔrɔ ka jan. Aw t'u ka kaan mɛn, u be min fɔ, aw t'o faamu.

¹⁶U ka toon ye kaburu dayɛlɛnin le ye, u bɛɛ kɛra kɛlɛdenŋanaw ye.

¹⁷U bena aw ka sumanw, n'aw ka dumuni bɛɛ dumu, k'aw deenw n'aw ka begɛnw bɛɛ halaki, k'aw ka ɛrɛzɛnsunw, ni toroyiriw bɛɛ cɛn. Aw jigi be aw ka dugu barikama minw kan, u bena o halaki ni murujan ye.

¹⁸«O n'a ta bɛɛ, n tena aw sii ban o loon na. Ne Masaba le ko ten.

¹⁹N'o ye ɲinigali kɛ tuma min na ko: ‹Mun na Masaba an ka Ala ye nin bɛɛ kɛ anw na ten?› E k'u jaabi ko: ‹Aw banna aw ka Ala la ka siya wɛrɛw ka joow sɔn aw yɛrɛ ka jamana kɔnɔ cogo min na, o cogo kelen na, aw bena baara kɛ siya wɛrɛw ye jamana wɛrɛ la min t'aw ta ye.›

²⁰«Aw ka nin wango la Yakuba kɔmɔgɔw cɛma, aw k'a to a ka mɛn Zuda mara la, aw k'a fɔ ko:

²¹ ‹Siya hakilitan faamubali, ɲaa b'aw fɛ, nga aw te yeli kɛ, tulo b'aw fɛ, nga aw te mɛnni kɛ.

²² O tuma na, aw tena siran ne ɲa wa? Ne Masaba le ko ten. Aw tena yɛrɛyɛrɛ ne ɲa wa? Ne min ye kɔgɔji daan bɔ ni cɛncɛn ye, a tena tɛmɛ o daan nin kan abada. Kɔgɔji be funu ka funu, nga a tena tɛmɛ o daan nin kan.›

²³Nga siya nin mɔgɔw ye tulogwɛlɛnw ye, mɔgɔmurutininw lo. U be ne ka sira bila ka taga.

²⁴U yɛrɛ m'a fɔ u kɔnɔ ko: ‹An ka siran Masaba an ka Ala ɲa. Ale min be sanji fɔlɔ n'a laban di a diwaati la, ka suman tigɛwaati di.›

²⁵Ɲagamini donna o la aw ka kɛwalijuguw kosɔn, aw ka kojuguw y'aw bali ka fɛnɲumanw sɔrɔ.

²⁶Bari, mɔgɔjuguw be ne ka siya cɛma, u birinin be i ko donsow. U be jaanw la, ka mɔgɔw minɛ n'o ye.

²⁷Sansaran be fa cogo min na kɔnɔw la, u ka soow fanin be ten ni namarafɛnw ye. O seen fɛ le, u be kɛ nafolotigiw ni mɔgɔbabaw ye.

²⁸U ka bonbon, u be manamana! U ɲɔgɔn te yen juguya la. Falatɔ ka kan ni min ye, u t'o d'a ma. Nga olu ka koow le be yiriwa. Dɛsɛbagatɔw ka kan ni min ye, u t'o kɛ.

²⁹Ne man kan k'u kɛlɛ o kosɔn wa? Ne Masaba le ko ten. Ne man kan ka n mɔnɛ bɔ o siya nin ɲɔgɔn na wa?

³⁰Kojugu, koo dagabali be kɛra jamana kɔnɔ.

³¹Kiraw be galonkiraya kɛ, sarakalasebagaw b'o ka nafa dɔrɔn le ɲinina. O le ka di ne ka mɔgɔw ye. Nga aw bena mun kɛ a laban na?»