Read dyu Zeremi ka kitabu 52 Bible Online

Zeremi ka kitabu 52 - dyu bible

Zeremi ka kitabu 52

¹Sedesiyasi sigira masaya la a sii tun be saan mugan ni kelen. A ye saan tan ni kelen kɛ masaya la Zeruzalɛmu. A bamuso tɔgɔ tun ko Amutali, Yirimeyawu deen tun lo ka bɔ Libina.

²Sedesiyasi ye kojugu kɛ Masaba ɲakɔrɔ i n'a fɔ Yoyakimu tun y'a kɛ cogo min na.

³Koo minw tun be kɛra Zeruzalɛmu, ni Zuda mara la, o kɛra sababu ye Masaba dimina fɔɔ a y'o yɔrɔ mɔgɔw bila ka taga yɔrɔjan. Sedesiyasi tun murutira Babilɔni masacɛ ma.

⁴ Sedesiyasi ka masaya saan kɔnɔntɔnnan na kalo tannan tile tannan loon, Babilɔni masacɛ Nabukodonozɔri wilila ka na n'a ka kɛlɛdenw bɛɛ ye Zeruzalɛmu kama. U nana sigi a dafɛ ka bɔgɔ cɛ k'o tonton dugu laminikogo kɔrɔ k'a lamini.

⁵U ye Zeruzalɛmu dugu datugu fɔɔ ka taga se masacɛ Sedesiyasi ka masaya saan tan ni kelennan ma.

⁶O saan kalo naaninan tile kɔnɔntɔnnan na, kɔngɔ tun digira dugu mɔgɔw la kosɔbɛ, dumuni si tun te dugudenw bolo tugu.

⁷ Babilɔnikaw ye dugu laminikogo sɔgɔ. Suu kora tuma min na, Zuda mara kɛlɛdenw bɛɛ bolila. O y'a sɔrɔ Babilɔnikaw tun ye dugu lamini. O n'a ta bɛɛ, daa min be dugu laminikogo fila cɛ, masacɛ ka nankɔ faan fɛ, u sera ka tɛmɛ o fɛ ka Zurudɛn baji sira minɛ.

⁸Babilɔnikaw ka kɛlɛdenw tugura masacɛ Sedesiyasi kɔ ka ta'a sɔrɔ Zeriko kɔkɛnɛ la. A ka kɛlɛdenw bɛɛ bolila k'a to.

⁹U y'a minɛ ka taga n'a ye Babilɔni masacɛ fɛ Iribila, Amati jamana la, a y'a kiti o yɔrɔ la.

¹⁰Babilɔni masacɛ ye Sedesiyasi deenw kaan tigɛ a yɛrɛ ɲana. A ye Zuda mara ɲamɔgɔw bɛɛ kaan tigɛ fana Iribila.

¹¹ O kɔ, a ko u k'ale Sedesiyasi ɲadenw ci, k'a siri ni zirajɔrɔkɔ ye, ka taga n'a ye Babilɔni, k'a don kaso la yen fɔɔ a salon.

¹²Babilɔni masacɛ Nabukodonozɔri ka masaya saan tan ni kɔnɔntɔnnan, kalo duurunan tile tannan loon na, a kɔlɔsibagaw kuntigi Nebuzaradan, min tun be masacɛ ka baara la, ale donna Zeruzalɛmu.

¹³ A ye Masaba ka soo jɛni, ni masacɛ ka soo, ani Zeruzalɛmu dugu kɔnɔ boonw bɛɛ. Boon o boon tun kɛra mɔgɔbaba ta ye, a ye olu bɛɛ jɛni.

¹⁴A ka kɛlɛdenw ye Zeruzalɛmu laminikogo bɛɛ ci.

¹⁵Masacɛ kɔlɔsibagaw kuntigi Nebuzaradan ye dɛsɛbagatɔ dɔw minɛ ka taga n'u ye, ani mɔgɔ tɔɔ minw tora dugu kɔnɔ, ni minw tun y'u yɛrɛ di Babilɔni masacɛ ma, ani bololabaarakɛlaw tɔɔ.

¹⁶Nga, a ye jamana dɛsɛbagatɔ dɔw to yen, olu ka *ɛrɛzɛnforow ni foro tɔw sɛnɛ.

¹⁷ Tutunan ziralaman minw tun be Masaba ka soo daa la, ani wotoroninw ni dagaba ziralaman minw tun be luu kɔnɔ, Babilɔnikaw ye olu ci k'o ta ka taga n'u ye Babilɔni.

¹⁸U ye bugurigwɛ cɛfɛnw, ni pɛluw, ani fitinɛ juru tigɛminanw, ni jifilenw ta, ani u tun be to ka baara kɛ ni minan ziralaman minw bɛɛ ye Masaba ka soo kɔnɔ.

¹⁹Masacɛ ka kɔlɔsibagaw kuntigi ye fiyɛw fana ta, ni wusulandagaw, ni jifilenw, ni dagaw, ni fitinɛw, ni dagaw ani filenw, fɛɛn o fɛɛn tun dilanna ni sanu ani warigwɛ ye, a y'o bɛɛ ta.

²⁰Solomani tun ye tutunan fila, ni tasaba, n'a jukɔrɔ tura jaa ziralaman tan ni fila, ani wotoronin minw dilan Masaba ka soo kama, olu zira hakɛ tun ma se ka lɔn.

²¹Tutunan nunu kelen kelen jaɲa tun be mɛtɛrɛ kɔnɔntɔn bɔ. Juru min tun b'a lamini, ale jaɲa tun be se mɛtɛrɛ wɔɔrɔ ma. Woo tun b'a cɛmancɛ la, a dagolo boɲa tun be se bolokunnaden naani ma.

²²Fɛɛn ziralaman min tun siginin be tutunan nunu kelen sanfɛ, ale jaɲa sanfɛ tun be mɛtɛrɛ fila ni tilan ɲɔgɔn bɔ. A tun masirinin be ni masirifɛn dɔ ye, gerenadiyiriden jaa ziralaman tun y'a lamini. Tutulan kelen nin n'a gerenadiyiridenw fana tun be ten.

²³Gerenadiyiriden jaaw tun ye bi kɔnɔntɔn ni wɔɔrɔ ye k'a lamini. Masirifɛn min tun b'a lamini, gerenadiyiriden jaa kɛmɛ tun be ale sanfɛ.

²⁴Masacɛ kɔlɔsibagaw kuntigi nin ye sarakalasebagaw kuntigi Seraya, n'a ka lankan Sefaniya, ani Masaba ka soo daa kɔlɔsibaga mɔgɔ saba minɛ.

²⁵Mɔgɔ minw tora dugu kɔnɔ, olu cɛma, a ye kɛlɛdenw ka ɲamɔgɔ dɔ minɛ, ani masacɛ ka dakɔrɔsigi mɔgɔ wolonwula, ni sɛbɛnnikɛla min tun be kɛlɛdenw wolomako kunna, ani mɔgɔbaba wɛrɛ bi wɔɔrɔ.

²⁶A y'u minɛ ka taga n'u ye Babilɔni masacɛ fɛ Iribila.

²⁷Masacɛ y'u faga Iribila, Amati mara la. Zuda mara mɔgɔw cɛra ten ka bɔ u ka jamana la ka taga yɔrɔjan na.

²⁸Nabukodonozɔri tagara ni mɔgɔ minw ye, olu daa filɛ: Saan wolonwulanan na, zuwifu mɔgɔ waa saba ni mɔgɔ mugan ni saba (3 023).

²⁹Nabukodonozɔri ka masaya saan tan ni seeginan na, Zeruzalɛmuka mɔgɔ kɛmɛ seegi ni bi saba ni fila.

³⁰A ka masaya saan mugan ni sabanan na, a kɔlɔsibagaw kuntigi Nebuzaradan ye zuwifu mɔgɔ kɛmɛ wolonwula ni bi naani ni duuru minɛ ka taga n'u ye. U bɛɛ lajɛnnin tun ye mɔgɔ waa naani ni kɛmɛ wɔɔrɔ (4 600) ye.

³¹Zuda mara masacɛ Yoyakin minɛna ka taga, o saan bi saba ni wolonwulanan kalo tan ni filanan tile mugan ni duurunan loon, Babilɔni masacɛ Ewili Merodaki yafara Yoyakin ma k'a bɔ kaso la. O kɛra Ewili Merodaki ka masaya saan fɔlɔ la.

³²A y'a koladiya ka lɔyɔrɔ d'a ma min ka fisa ni masacɛ tɔw taw ye, minw tun be n'a ye Babilɔni.

³³A ye sira d'a ma k'a ka kasodenfaniw bɔ. K'a ta o loon ma, Yoyakin tun be to ka dumuni kɛ a fɛ a sii bɛɛ la.

³⁴O cogo la, Babilɔni masacɛ tun be to ka Yoyakin ka makoyafɛn d'a ma loon o loon a sii bɛɛ la.