Read dyu Zeremi ka kitabu 7 Bible Online

Zeremi ka kitabu 7 - dyu bible

Zeremi ka kitabu 7

¹Masaba kumana ne Zeremi fɛ ko:

²«Taga lɔ n ka soo daa la ka kuma nin wango la: ‹Aw Zuda mara mɔgɔ minw bɛɛ be don ni daa nunu ye ka Masaba bato, aw bɛɛ ka tulo malɔ ne ka kuma la.

³Masaba, Setigi, Isirayɛli ka Ala ko aw ka yɛlɛmani don aw taamacogo n'aw ka kɛwaliw la, k'o la, ale ben'a to aw be sigi jamana nin kɔnɔ.

⁴Aw kana aw yɛrɛ nigɛ ni namarakuma ye ka to k'a fɔ ko: Yan ye Masaba ka soo ye, yan ye Masaba ka soo ye, yan ye Masaba ka soo ye!

⁵N'aw y'aw taamacogo n'aw ka kɛwaliw yɛlɛma sɔbɛ la, n'aw be hɔrɔnya kɛ aw mɔgɔɲɔgɔnw faan fɛ,

⁶n'aw te lonanw tɔɲɔ, ni falatɔw, ani firiyamusow, n'aw te mɔgɔ jalakibaliw faga yɔrɔ nin na, n'aw ye batofɛn wɛrɛw ye k'u to yen, min be bɔnɛ se aw ma,

⁷ne bɛn'a to aw ka sigi yan yɔrɔ la, ne tun ye jamana min di aw faaw ma kudayi.

⁸Nga aw b'aw jigi la namarakuma le kan, kuun te kuma minw na.

⁹« ‹Mun! Aw be soɲali kɛ, ka mɔgɔw faga, ka kakalaya kɛ, ka kɛ seere galontigɛlaw ye. Aw be *Baali sɔn, aw te batofɛn minw lɔn, aw be taga u minɛ siya wɛrɛw fɛ.

¹⁰O bɛɛ kɔ, aw be sɔrɔ ka na lɔ ne ɲakɔrɔ soo nin kɔnɔ, ne tɔgɔ lara min kan, ka to k'a fɔ ko: An kisira, ka tila ka kojugu nunu bɛɛ ɲɔgɔn kɛ tugu.

¹¹ Aw ka miiri la, ne ka soo nin ye soonw ka yɔrɔ ye wa? Ne ɲaa b'o le la. Ne Masaba le ko ten.

¹² « ‹Aw ka taga ne ka yɔrɔ la Silo, ne y'a kɛ ne tɔgɔ kɔnna ka to min kan. Ne ye min kɛ a la ne ka jama Isirayɛli ka juguya kosɔn, aw ka taga o filɛ.

¹³Ne Masaba ko: K'aw to koo nunu bɛɛ la, ne tora ka kuma aw fɛ, nga aw ma mɛnni kɛ, ne y'aw wele, nga aw ma jaabili kɛ.

¹⁴O kama, ne tɔgɔ lara soo min kan, aw b'aw jigi la min kan, ne ye yɔrɔ min di aw n'aw faaw ma, ne bena o kɛ i ko ne ye Silo kɛ cogo min na.

¹⁵Ne bena aw gwɛn ka bɔ ne ɲakɔrɔ i n'a fɔ ne y'aw badenw bɛɛ, Efarayimu kɔmɔgɔw bɔ n ɲakɔrɔ cogo min na.›

¹⁶«Zeremi, e kana ne daali u ye, kana tintin u ka koo la ne fɛ, bari ne tena mɛnni kɛ i fɛ.

¹⁷U be min kɛra Zeruzalɛmu bɔlɔnw na, ani Zuda mara dugu tɔw la, i ɲaa t'o la wa?

¹⁸ Deenw be lɔgɔ ɲini, faaw be tasuma mana, musow be mugu nɔɔni ka ŋɔmi yiran k'o di joo ma min be wele ko Sankolo kɔnɔ masamuso, [1] ani ka jii bɔn ka batofɛn wɛrɛw sɔn janko ka ne dusu dimi.

¹⁹U be ne lo dimina wa? Ne Masaba le ko ten. U t'u yɛrɛ ka koo nagasira ka maloya lase u yɛrɛ ma wa?

²⁰O kama, ne Matigi, Masaba ko: Ne bena dimi. N ka dimi fariya bena sin yɔrɔ nin ma, ani mɔgɔw, ni begɛnw, ni yiriw, ani sɛnɛfɛnw ma. A bena kɛ i ko tasuma min te faga.»

²¹Masaba, Setigi, Isirayɛli ka Ala ko: «Aw y'aw ka saraka jɛnita ni saraka tɔw sogo kori k'a ɲimi!

²²Bari ne tun y'aw faaw bɔ Ezipiti jamana na waati min na, ne tun ma foyi fɔ u ye, n ma foyi ɲini u fɛ o saraka jɛnitaw ni saraka wɛrɛw la.

²³Nga ne ye min ɲini u fɛ, o ye nin ye: N ko: ‹Aw ka mɛnni kɛ ne fɛ, o la, ne bena kɛ aw ka Ala ye, aw bena kɛ ne ka mɔgɔw ye. Ne ye sira min don aw seen kɔrɔ, aw k'o taama ka ɲa, aw bena hɛrɛ sɔrɔ.›

²⁴Nga u ma mɛnni kɛ, u m'u tulo malɔ. U y'u tulo gwɛlɛya ka taama u yɛrɛ sago la ka kɛɲɛ n'u ka miiriyajuguw ye. Sanni u ka taga ɲa, u segira kɔfɛ.

²⁵«Kabini loon min na aw faaw bɔra Ezipiti jamana la fɔɔ ka na se bii ma, ne tora ka n ka baarakɛlaw, kiraw bɛɛ ci aw fɛ loon o loon.

²⁶Nga u ma mɛnni kɛ ne fɛ, u m'u tulo malɔ. U y'u tulo gwɛlɛya, ka kojugu kɛ ka tɛmɛ u faaw kan.

²⁷«I bena kuma nin bɛɛ fɔ u ye, u tena mɛnni kɛ i fɛ. I bena u wele, u tena i jaabi.

²⁸O la, a fɔ u ye ko: ‹A ye, siya nin te mɛnni kɛ Masaba a ka Ala fɛ, a te sɔn ladili ma. Tiɲɛ tununa pewu! Tiɲɛkuma t'u daa la tugu.›

²⁹«Aw kunsigi minw b'a yira ko aw ye ne taw ye, aw ka olu tigɛ ka fili, ka dusukasidɔnkili la kuluw kan. Bari ne Masaba te *filankuru fɛ min be ne dusu dimi.

³⁰«Zuda mara mɔgɔw ye kojugu kɛ ne ɲakɔrɔ. Ne Masaba le ko ten. Ne tɔgɔ lara soo min kan, u y'o ka joow bila o kɔnɔ, k'o nɔgɔ.

³¹ U ye sɔnnikɛyɔrɔ lalaga Bɛninɔn kɔkɛnɛ na, min tɔgɔ ko Tafɛti, waasa k'u dencɛw n'u denmusow kɛ sɔnnifɛnw ye k'u jɛni o yɔrɔ la. Ne m'o sira di, ne ma miiri o la ka ye.

³²«O la, loonw be na, ne Masaba le ko ten, mɔgɔ si ten'a fɔ tugu Tafɛti ni Bɛninɔmu kɔkɛnɛ, U ben'a wele ko Mɔgɔfaga kɔkɛnɛ. Tafɛti bena kɛ sudonyɔrɔ ye yɔrɔtanya kama.

³³Siya nin suuw bena kɛ kɔnɔw ni sogow ka dumuni ye, mɔgɔ si tena u gwɛn.

³⁴ Ne ben'a to nisɔndiya ni ɲanagwɛ be dabila, ni kɔɲɔya dɔnkiliw, Zeruzalɛmu bɔlɔnw na ni Zuda mara dugu tɔw kɔnɔ. Bari, jamana nin bena kɛ tomo ye.