Read dyu Zeremi ka kitabu 8 Bible Online

Zeremi ka kitabu 8 - dyu bible

Zeremi ka kitabu 8

¹«O waati la, ne Masaba le ko ten: ‹Zuda mara masacɛw n'a ɲamɔgɔw, ni sarakalasebagaw, ni kiraw, ani Zeruzalɛmukaw kolow bena wɔgɔbɛ ka bɔ o ka kaburuw kɔnɔ.

²O kolow bena yɛrɛkɛ tile kɔrɔ, ni kalo, ani lolow. Minw koo tun diyara u ye, u ye minw bato, ka tugu u kɔ ka to k'u ɲininga, ani k'u bato. Kolo nunu tena cɛ ka don kaburu kɔnɔ tugu, u bena kɛ nɔgɔ ye dugukolo kan.

³Ne ye siyajugu nin gwɛn ka taga yɔrɔ minw na, saya koo bena diya u tɔɔ bɛɛ ye o yɔrɔ la ka tɛmɛ ɲanamanya kan. Ne Masaba, Setigi le ko ten.›

⁴«A fɔ u ye ko ne Masaba ko: ‹Ni mɔgɔ benna, a te wili wa? Ni mɔgɔ filil'a ka sira la, a te segi kɔ wa?

⁵Mun na siya nin murutinin be? Mun na Zeruzalɛmukaw be tagara n'u ka murutili ye ɲa? U be tagara ɲa n'u ka josɔnko ye. U t'a fɛ ka segi ne ma.

⁶Ne ye n tulo malɔ ka mɛnni kɛ, u te kuma bɛrɛ fɔ. Mɔgɔ si t'a ka juguya dabilara k'a fɔ ko: Ne ye mun le kɛ ten? U kelen kelen bɛɛ b'u ka boliboli la, i ko soo min be tagara kɛlɛkɛyɔrɔ la.

⁷Cankoli ka kan ka tɛmɛ waati min na, a yɛrɛ b'o lɔn. Tubanin ani naganagani, ani kunangwɛ b'u segiwaati lɔn u layɔrɔw la. Nga ne ka mɔgɔw te ne Masaba ka sariya lɔn.›

⁸«Aw be se k'a fɔ cogo di ko: ‹An ye lɔnnikɛlaw ye, Masaba ka sariya b'an fɛ.› K'a sɔrɔ sariya karamɔgɔw y'a yɛlɛma ka galon le sɛbɛn.

⁹Lɔnnikɛlaw maloyara, u sirannin lo, u minɛna. U te Masaba ka kuma jati. U ka lɔnniya be min sa?

¹⁰ «O kama, ne bena u ka musow di mɔgɔ wɛrɛw ma, k'u ka forow di tigi wɛrɛw ma. Bari, denmisɛn fara mɔgɔkɔrɔba kan, u bɛɛ b'u ka tɔnɔ dɔrɔn le ɲinina. Kiraw ni sarakalasebagaw bɛɛ be namara le kɛ.

¹¹ U ma u sɔbɛ don ne ka mɔgɔw ka tɔɔrɔko la. U tora k'a fɔ ko: ‹Hɛrɛ o hɛrɛ.› K'a sɔrɔ hɛrɛ te yen.

¹²«O tun ka ɲi ka maloya u ka kɛwalijuguw kosɔn, nga u ma maloya hali dɔɔni. O kama, u bena kɛ halakininw cɛma, u bena u yɛrɛ sɔrɔ duguma, tuma min na u ɲaa bena gwan.» Masaba le ko ten.

¹³Masaba ko: «Ne b'a fɛ k'u koo ban. Deen si te *ɛrɛzɛnsun kan, deen si te torosun kan. Hali u furaburuw fɔnsɔnfɔnsɔnna. Ne b'u di mɔgɔw ma minw bena u dɔndɔn.

¹⁴«Mun na an be sigi ka to? An ka ɲɔgɔn lajɛn k'an ka dugu barikamanw sɛgɛrɛ waasa ka sa yen! Bari, Masaba an ka Ala le y'an to saya bolo, a be bagaji dira an ma minji ye. Bari an y'a hakɛ ta.

¹⁵An be hɛrɛ laɲini, nga fewu. An be nɔgɔya laɲini, nga jatigɛ be na.

¹⁶U ka soow mankan be mɛnna Dan mara faan fɛ. U ka soo cɛmanw kasikan fɛ, dugukolo bɛɛ be yɛrɛyɛrɛla. U be nana jamana halakiyɔrɔ, n'a kɔnɔfɛnw bɛɛ, ni dugu n'a kɔnɔ mɔgɔw bɛɛ.»

¹⁷Masaba ko: «Ne be saa farimanw cira aw kama, mɔgɔ ka namara te se minw kɔrɔ. U bena aw cin.»

¹⁸Ne dusu kasira kosɔbɛ, fura t'a la, fɔɔ ne jigi tigɛra.

¹⁹Ne ka mɔgɔw kasikan be bɔra k'u to fɔɔ yɔrɔjan. U ko: «Masaba te *Siyɔn dugu kɔnɔ tugu wa? Dugu masacɛ te yen tugu wa?» Mun na mɔgɔ nunu be ne dusu dimi n'u ka josɔnko ye? Joo minw ye siya wɛrɛw ta ye.

²⁰Sumantigɛ waati tɛmɛna, tilemana banna, halibi an do ma bɔ bolo la fɔlɔ.

²¹Ne ka mɔgɔw ka tɔɔrɔ kosɔn, ne barika banna. Ne dusu kasinin lo. Siranya be n na.

²²Fura si te sɔrɔ Galaadi mara la tugu wa? Furakɛla si te yen wa? Mun na ne ka mɔgɔw ka diminɔ te ban?

²³Ni ne kungolo tun fanin be jii la, ni n ɲaji tun ka ca kosɔbɛ, ne tun bena kasi, suu fara tile kan, n ka mɔgɔ saninw kosɔn.