Read dyu Zeremi ka kitabu 9 Bible Online

Zeremi ka kitabu 9 - dyu bible

Zeremi ka kitabu 9

¹Ni lonanjigiso tun be ne tɔgɔ la kongokolon kɔnɔ, ne be se ka bɔ n ka mɔgɔw cɛma ka taga yɔrɔ min na, o tun be diya ne ye! Bari, u bɛɛ kɛra kakalaw ye, janfamɔgɔw lo.

²«U nɛnden kɛra i ko kala, a tigi bolo. U ka setigiya nin jamana kɔnɔ ma sɔrɔ tilenniya la, [1] bari u be kojuguw kɛ ka la kojugu kan, u ma ne lɔn. Ne Masaba le ko ten.

³Bɛɛ k'a yɛrɛ kɔlɔsi a teri la, mɔgɔ si kana la a balima la. Bari balima bɛɛ ye janfamɔgɔ le ye, teri bɛɛ b'a fɛ ka galon tigɛ ka mɔgɔ tɔgɔ cɛn.

⁴U be ɲɔgɔn janfa, u te tiɲɛ fɔ. U y'u yɛrɛ deli galontigɛ la, u b'u seko bɛɛ kɛ ka kokolon kɛ.

⁵Ele kɔni siginin be namaramɔgɔw cɛma. Namara kama lo, u t'a fɛ ka n lɔn.» Masaba le ko ten.

⁶O la, Masaba, Setigi ko: «Ne bena u sɛgɛsɛgɛ k'u sɛnsɛn. N'o tɛ, ne bena mun le kɛ u ka juguya kama?

⁷U nɛɛn kɛra biɲɛ fariman ye, u ka fɔta ye namara ye. U be hɛrɛ laɲini ɲɔgɔn ye n'u daa ye, k'a sɔrɔ u be jaan la ɲɔgɔn kama.

⁸Ne man kan k'u tɔɔrɔ o kosɔn wa? Ne Masaba le ko ten. Ne man kan ka n mɔnɛ bɔ o siya nin ɲɔgɔn na wa?»

⁹Ne bena kasi ka kule kuluw kosɔn, ne bena dusukasidɔnkili la kongo kosɔn. Bari u jɛnina, mɔgɔ si te tɛmɛ yen tugu. Begɛn kasikan te mɛnna yen tugu, kɔnɔw, ni kongosogow bolila, u bɛɛ tununa.

¹⁰Masaba ko: «Ne bena Zeruzalɛmu kɛ tomo ye, a be kɛ kongowuluw layɔrɔ ye. Ne bena Zuda mara duguw kɛ dusukasiyɔrɔw ye, mɔgɔ tena kɛ yen.»

¹¹Jɔn ye lɔnnikɛla ye n'a be nin faamu? Masaba kumana min fɛ, o tigi ka nin fɔ. Mun na jamana kɛra tomo ye, ka jɛni fɔɔ k'a kɛ lakolon ye ni mɔgɔ te tɛmɛna yen tugu?

¹²Masaba ko: «Bari u ye ne ka sariya labila, ne tun ye min sigi u ye. U ma mɛnni kɛ ne fɛ. U ma ne ka sariya bato.

¹³Nga u tugura u yɛrɛw ka miiriya juguw kɔ, ka *Baali sɔn yɔrɔ caaman na. U ye min lɔn u faaw sababu la.

¹⁴O kama, ne Masaba, Setigi, Isirayɛli ka Ala ko: Ne bena u balo ni kunakuna ye, ka bagaji di u ma minji ye.

¹⁵Ne bena u jɛnsɛn siya wɛrɛw cɛma, olu yɛrɛw n'u faaw ma minw lɔn. N bena murujan bila u kɔ, fɔɔ n ka tila u la.»

¹⁶Masaba, Setigi ko: «Aw ka miiri! Ka cii sama muso sangakasilaw ma, k'u ka na. Minw daa ka di, aw ka mɔgɔw bila ka taga olu kɔ, u ka se yan.

¹⁷U ka teliya ka na kasi an kosɔn fɔɔ an ɲaaw ka fa jii la ka woyo.

¹⁸Kasikan be bɔra *Siyɔn ko: ‹Ebe! An halakira! Maloya kɛra an ta ye! Fɔɔ an ka bɔ jamana kɔnɔ, an ka soow cira!› »

¹⁹Musow, aw ka mɛnni kɛ Masaba ka kuma la, aw k'aw tulo malɔ a dalakuma la. Aw ye sangakasi dege aw denmusow la, aw ka ɲɔgɔn dege sangadɔnkili la.

²⁰Bari saya donna an ka soo kɔnɔ ni fenɛtiri ye, a donna an ka masasow kɔnɔ. A be denmisɛnw bɔsi bɔlɔnw na, a be kanbelenw ta forobayɔrɔw la.

²¹A fɔ ko: «Masaba ka kuma filɛ ko: Suuw bena yɛrɛkɛ forow kɔnɔ i ko nɔgɔ, u bena to forow kɔnɔ i ko suman kannin, mɔgɔ si te min cɛra.»

²²Masaba ko: «Lɔnnikɛla kana wanso n'a ka lɔnniya ye, fangatigi kana wanso n'a ka fanga ye, nafolotigi kana wanso n'a ka nafolo ye.

²³ Nga ni min b'a fɛ ka wanso, o ka wanso bari a ye hakili sɔrɔ ka se ka ne Masaba lɔn, ne min be ɲumanya, ni tilenninyakow kɛ diɲɛ na. Tiɲɛ na, o le ka di ne ye.» Masaba le ko ten.

²⁴Masaba ko: «Loonw be na, mɔgɔ minw kɛnɛkɛnɛna farisogo la dama, n'u dusu ma yɛlɛma, ne bena olu bɛɛ ɲaa gwan:

²⁵Ezipitikaw, ni Zuda mara mɔgɔw, ni edɔmuw, ni amoniw, ni mowabuw, ani minw bɛɛ siginin be kongokolon kɔnɔ n'u be to k'u bonbosi gɛrɛfɛla li. Bari o siya nunu bɛɛ, ani Isirayɛlidenw si dusu ma yɛlɛma.»