Read dyu Dusukasidɔnkili kitabu 1 Bible Online

Dusukasidɔnkili kitabu 1 - dyu bible

Dusukasidɔnkili kitabu 1

¹Aba! Zeruzalɛmu tor'a kelen na, ale duguba nin, min jama tun ka ca! A kɛra i ko firiyamuso. Ale min tun jatinin be siyaw cɛma, ale min tun ye ɲamɔgɔdugu ye maraw kɔnɔ, a bilara jɔnya la.

²A be kasi ka kasi sufɛ, a ɲaji b'a disi ɲigi. A dusu saalobaga te yen a kanubagaw cɛma. A teriw bɛɛ y'a janfa! U kɛr'a juguw ye.

³Zuda mara mɔgɔw minɛna ka taga jɔnya la. U sigɛnnin be haali. U be siya wɛrɛw cɛma, u t'a lɔn u be sigi yɔrɔ min na. U tɔɔrɔbagaw bɛɛ y'u sɔrɔ, u y'u dɛrɛ, bɔyɔrɔ t'u fɛ.

⁴Dusukasi le be *Siyɔn sira kan bari, mɔgɔ si te taga ɲanagwɛ la tugu. Dugu dondaw bɛɛ halakira! Sarakalasebagaw be ŋunanna! Sunguruw dusu kasinin be. Ee! Hakiliɲagami be Siyɔn dugu kɔnɔ!

⁵A juguw ser'a kɔrɔ a tɔɔrɔbagaw be hɛrɛ la. Bari, Masaba ye tɔɔrɔ la a kan a ka kojugu caaman kosɔn. A juguw y'a deenw minɛ ka taga n'u ye.

⁶Siyɔn dugu ka dawula bɛɛ tagara! Dugu ɲamɔgɔw kɛra i ko mankalaninw, minw te biin sɔrɔla k'a ɲimi. U be tagara u gwɛnbaga ɲa, see si t'u ye.

⁷Zeruzalɛmukaw munumunulon, n'u dɔgɔyawaati la, u hakili jigira u ka nafolo bɛɛ la, min tun b'u fɛ fɔlɔfɔlɔ. U donna u juguw bolo, dɛmɛbaga ma sɔrɔ u la. U tɔɔrɔbagaw tora ka yɛlɛ u halakiko la.

⁸Zeruzalɛmukaw ye kojuguba kɛ, o la, u saniyanin tɛ. Mɔgɔ o mɔgɔ tun b'u boɲa, u bɛɛ b'u dɔgɔyara. Bari, u kɛra i ko muso julakolon. A daan ye, u k'u kɔɔ di ka to ka ŋunan dama.

⁹U ka baarajugu nɔɔ be ye u kan. U tun te miiri u labancogo la. U benko kɛra kabako ye. Dususaalobaga t'u la. U ko: «Masaba, an ka tɔɔrɔ filɛ, an juguw be barika sɔrɔla.»

¹⁰Fɛɛn minw bɛɛ koo tun ka gwɛlɛ u ma, juguw bolo sera o bɛɛ ma. Tiɲɛ na, u ye siya wɛrɛw dontɔ ye u ka Ala ka sigiyɔrɔ la. I ko minw man kan ka ye i ka jama ka lajɛnyɔrɔ la.

¹¹Zeruzalɛmukaw bɛɛ be ŋunanna, u be dumuni ɲinina. U b'u ka fɛnɲumanw falenna dumuni na, waasa u ka to nii la. U ko: «A filɛ Masaba, u y'an dɔgɔya cogo min na!»

¹²«Aw minw bɛɛ be tɛmɛna sira kan, aw ka filɛli kɛ, k'a ye ko tɔɔrɔ min be an kan, ko a ɲɔgɔn be sɔrɔ wa? Masaba ye min la an kan a dusu gwanlon na.

¹³A ye tasuma jigi an kan ka bɔ sanfɛ, a jigira fɔɔ an kolow la. Ale lo y'o tigi ye. A ye juru siri an ɲa, k'an ta ka ben. A y'a kɛ an ka dugu tor'a kelen, o kɛra an ma bana ye loon bɛɛ.

¹⁴A ɲaa be an ka kojuguw la. U kɛra i ko juru kurunin, a bolo. A y'u dulon an kaan na, a ye an barika ban. Matigi ye an don bolo la, an te se ka tila min na.

¹⁵Matigi y'an ka kɛlɛdenŋanaw bɛɛ gwɛn ka bɔ an cɛma. A ye kɛlɛbolo dɔ wele an kama, waasa k'an ka kanbelenw faga. Matigi ye Siyɔn dugu nɔɔni Zuda mara la i ko *ɛrɛzɛn.

¹⁶O kama lo an be kasira. An ɲaji be woyora! An dusu saalobaga yɔrɔ ka jan, min bena an jigi tugu. Dugu mɔgɔw halakira bari, jugu ye fanga sɔrɔ.»

¹⁷Siyɔnkaw be dɛmɛ ɲinina, dususaalobaga ma sɔrɔ u la. Masaba ye Yakuba kɔmɔgɔw tɔɔrɔbagaw ci u kama ka bɔ gɛrɛfɛlaw la. Zeruzalɛmukaw lɔgɔbɔra u cɛma.

¹⁸«Masaba tilennin lo. Bari an le bann'a ka fɔta la. Siyaw bɛɛ, aw k'aw tulo malɔ k'an ka tɔɔrɔko filɛ. An ka sunguruw ni kanbelenw tagara, u y'u minɛ ka taga n'u ye jɔnya la.

¹⁹An ye cii bila an kanubagaw ma, nga u bɛɛ ye an janfa. An ka sarakalasebagaw ni dugu ɲamɔgɔw sara dugu kɔnɔ, k'u to dumuni yaala la janko u ka fanga sɔrɔ.

²⁰Masaba, an ka dusukasiko filɛ. An kɔnɔ gwannin lo. An dusu be panpanna! An murutila i ma yɛrɛ le. Kɛnɛma, murujan b'an kan. Soo kɔnɔ, o ye saya ye.

²¹U ye ne ŋunankan mɛn. Dususaalobaga te n na. An juguw bɛɛ ye an ka bɔnɛko mɛn, u be nisɔndiyara o kosɔn, ele bulonɔ lo. I ye loon min sigi, i y'a to o sera. A to olu ta fana ka kɛ i ko an ta.

²²U ye juguya minw bɛɛ kɛ, i hakili ka to o la. I ye min kɛ an na an ka hakɛw bɛɛ kosɔn, e k'o ɲɔgɔn kɛ u la. An ta ye ŋunan ye dɔrɔn, an dusu kasinin lo.»