Read dyu Zeremi ka bataki 1 Bible Online

Zeremi ka bataki 1 - dyu bible

Zeremi ka bataki 1

¹Babilɔnikaw ka masacɛ tun bena mɔgɔ minw minɛ ka taga n'u ye Babilɔni, Ala tun y'a fɔ Zeremi ye ko a ka min fɔ u ye, Zeremi y'o kɛ bataki ye k'o ci u ma. O filɛ nin ye ko: Aw ye hakɛ kɛ Ala faan fɛ. O kosɔn, Babilɔni masacɛ Nabukodonozɔri bena aw minɛ ka taga n'aw ye Babilɔni.

²N'aw sera o yɔrɔ la, aw bena to yen saan caaman kɔnɔ, ka waatijan kɛ yen, fɔɔ saan kɛmɛ fila ni bi seegi ɲɔgɔn. Nga o kɔ, ne ben'a kɛ aw be bɔ o yɔrɔ la hɛrɛ la.

³Aw k'a lɔn sisan ko aw bena batofɛnw ye Babilɔni, minw dilanna ni yiri ye, ni warigwɛ ani sanu ye, ni mɔgɔw b'u ta u gaman kan, batofɛn nunu be siranya bila siyaw la.

⁴O la, aw k'aw yɛrɛ kɔlɔsi aw ka koo bɛɛ la, aw fana kana kɛ i n'a fɔ o siya nunu. Aw kan'a to o batofɛn nunu siranya k'aw minɛ.

⁵N'aw ye jama ye tuma min na n'u be biri u ɲafɛ ani u kɔfɛ, aw k'a fɔ aw dusu la ko: «An ka kan ka biri e Matigi le ɲakɔrɔ!»

⁶Bari ne ka mɛlɛkɛ bena to aw fɛ k'aw kɔlɔsi ani k'aw tanga.

⁷Baarakɛla dɔ le ye batofɛn nunu nɛnkun lɛsɛ. Siga t'a la, batofɛn nunu mɔnna ni sanu, ani warigwɛ ye. Nga namarafɛnw lo, u te se ka kuma.

⁸Sunguru b'a yɛrɛ lalaga ka ɲa cogo min na, o cogo kelen na mɔgɔ nunu bɛ sanu kɛ

⁹ka fugulan dilan k'a biri u ka batofɛnw kuun na. Tuma dɔ la, sarakalasebagaw yɛrɛ be sanu ni warigwɛ soɲa u fɛ k'u yɛrɛ makow ɲa n'o ye.

¹⁰U yɛrɛ be dɔ di joso kɔnɔ kakalamusow ma. O batofɛn minw dilanna ni yiri ye, ni warigwɛ ani sanu ye, u be fani don u kaan na i n'a fɔ mɔgɔw.

¹¹Nga u te se k'u yɛrɛ tanga soon ni bagabaga ma. Ni u ye fani ɲanaman don u kaan na,

¹²joso kɔnɔ gwangwan be la o kan, n'u ɲada, o tigi be to k'o jɔsi.

¹³Masabere b'u bolo, i n'a fɔ mara kuntigiw, k'a sɔrɔ hali ni mɔgɔ dɔ donna u gasi la, u te se k'o tigi faga.

¹⁴Murujan ni jende b'u kinibolo la, o bɛɛ n'a ta, u tɛ se k'u yɛrɛ tanga kɛlɛdenw, walima soonw ma. A be lɔn o le la k'u te batofɛn ɲanamanw ye. O la, aw kana siran u ɲa!

¹⁵Minan min cira, o te foyi ɲa cogo min na,

¹⁶u ka batofɛnw be ten fana, n'u y'u bila soow kɔnɔ. O soo nunu donbagaw seen be gwangwan min wili, o be sigi u ɲaa kan.

¹⁷Ni mɔgɔ min ye kojugu kɛ masacɛ la, u b'o tigi datugu cogo min na k'a fagalɔn kɔnɔ, sarakalasebagaw be bɔ ka jobon datugu k'a sɔgɔ ka ɲa ten fana janko soon kana don k'u ta.

¹⁸Olu yɛrɛ mako be yeelen min na u yɛrɛ ka soo, u be fitinɛw mana u ka josow kɔnɔ, nga u ka batofɛnw te se ka foyi ye.

¹⁹U be i n'a fɔ joso tutunan, a be fɔ min ma ko a kɔnɔna tolila. Bagabaga be bɔ duguma k'u dumu, olu n'u ka faniw, u te bɔ o kala ma!

²⁰Sisi min be bɔ joso kɔnɔ, o y'u ɲada fin.

²¹Toolen ni naganaganiw, ani kɔnɔ wɛrɛw, hali jakumaninw be na sigi u kan, u kuun kan yɛrɛ.

²²O la, aw k'a lɔn ko batofɛn gwansanw lo, aw kana siran u ɲa!

²³U y'u mɔn ni sanu min ye janko k'u masiri, n'u ma u jɔsi k'a nɔgɔ bɔ, olu tena manamana cogo si la. Bari mɔgɔ y'u yelen k'u dilan tuma min na, u ma bɔ o kala ma.

²⁴Mɔgɔ b'u san sɔngɔgwɛlɛn na, k'a sɔrɔ ninakili t'u la haali dɔɔni.

²⁵Seenw t'u fɛ minkɛ, wajibi lo u b'u ta u gaman kan. O le b'a yira mɔgɔw la ko nafa t'u la. Hali u sɔnbagaw be maloya.

²⁶Tiɲɛ na, ni batofɛn benna duguma, u ka kan k'a kɔrɔta. N'u y'a lɔ, a te se ka taga yɔrɔ si a yɛrɛ ma. N'u y'a la, a tɛ se ka wili fana. N'u b'u sɔnna, a be i n'a fɔ u be fɛɛnw dira suu ma.

²⁷Fɛɛn minw be faga batofɛnw ye, sarakalasebagaw yɛrɛ b'u feere janko ka nafa sɔrɔ o la. Sarakalasebagaw musow b'o dɔ mara yan n'u b'o di fantanw ni banabagatɔw ma.

²⁸Hali muso minw be landa la, walima jigibagatɔ, olu b'u jaa gwɛlɛya ka maga sarakafɛn nunu na. O koow b'a yira ko batofɛn ɲanamanw tɛ, aw kana siran u ɲa!

²⁹Mun na u b'u wele batofɛnw? K'a sɔrɔ musow le b'u sɔn, fɛɛn yirilaman ni warigwɛlaman, ani sanulaman nunu.

³⁰Sarakalasebagaw be sigi batofɛn nunu ka soow kɔnɔ, u ka fani faranfarannin, u kunlakolon, u kuun n'u bonbosi linin. [1]

³¹U be kule ka mankan kɛ u ka batofɛnw ɲakɔrɔ i n'a fɔ mɔgɔ minw be sanga dumuni kɛra.

³²Sarakalasebagaw be fani minw bɔ batofɛnw kan, u b'o di u musow n'u ka denmisɛnw ma.

³³I be koɲuman kɛ u la wo, i be kojugu kɛ u la wo, u tena se k'o ɲɔgɔn segi i ma. U te se ka mɔgɔ kɛ masa ye, u tɛ se k'a jigi ka bɔ fanga la fana.

³⁴O cogo kelen na, u te se ka wari di mɔgɔ ma k'a kɛ nafolotigi ye. Ni mɔgɔ dɔ m'a ka dajuru sara u ye, u tena o tigi ɲininga o la fana.

³⁵U te se ka mɔgɔ kisi saya ma, u te se ka barikatan bɔsi k'a bɔ setigi bolo fana.

³⁶U te se ka fiɲɛntɔ ɲaa yɛlɛ. Mɔgɔ min be gwɛlɛya la, u te se k'a bɔ o la.

³⁷U te makari firiyamuso la, u te koɲuman kɛ falatɔ ye.

³⁸O minan yirilaman minw mɔnna ni sanu ani warigwɛ ye, u bɔnin be kabakuruw fɛ minw cira ka bɔ kulu la. U sɔnbagaw bena maloya.

³⁹I be se k'u jati batofɛn ɲanamanw ye cogo di, walima k'u koo fɔ ko batofɛn lo?

⁴⁰Ka fara o kan, Babilɔnikaw yɛrɛ b'u dɔgɔya do. U be taga ni bobo ye u ka batofɛn Bɛli fɛ, k'a daali ko a k'a to bobo nin ka se ka kuma, k'a sɔrɔ Bɛli te se ka foyi faamu.

⁴¹Mɔgɔ nunu yɛrɛ t'a faamu k'a ye ko batofɛn nunu te se ka foyi ɲa, k'u ka kan k'u fili.

⁴²Musow b'u cɛɛ siri ni juru ye ka taga sigi siraw daa la janko ka sumanbugu jɛni wusulan ye. [2]

⁴³Ni tɛmɛbaga dɔ y'u dɔ wele ka jɛn n'a ye, o muso nin be yɛlɛ a tɔɲɔgɔn na bari mɔgɔ si m'ale wele, k'a ka juru foni.

⁴⁴Batofɛn nunu ka koo bɛɛ ye galon le ye. O la, i be se k'u jati fɛɛn ɲanamanw ye cogo di, walima k'a fɔ n'i daa ye ko batofɛn ɲanamanw lo?

⁴⁵Baarakɛlaw ni sanufagalaw le y'u dilan. Bololabaarakɛla nunu b'a fɛ ka fɛɛn min jaa dilan, u be kɛ o dɔrɔn le ye.

⁴⁶Minw yɛrɛ y'u dilan, olu sii tena caya ka tɛmɛ tɔw ta kan we!

⁴⁷U ye minan minw dilan, olu be se ka kɛ batofɛn ɲanamanw ye cogo di? O la, u be namarako ni maloyako dɔrɔn le to u kɔmɔgɔw ye.

⁴⁸Ni kɛlɛ wilila joo nunu kama, walima gwɛlɛya wɛrɛw, murutigiw be ɲɔgɔn ye janko k'a lɔn u bena taga yɔrɔ min na k'u yɛrɛ dogo n'u ka joow ye.

⁴⁹Nunu te se k'u yɛrɛ kisi kɛlɛ ma, walima gwɛlɛyaw ma, mun na mɔgɔ te se k'a lɔn ko batofɛn ɲanamanw tɛ?

⁵⁰Yiriminanw lo, minw mɔnna ni sanu ni warigwɛ ye. A be lɔn o le la k'u ye namarafɛnw dɔrɔn le ye. A bena gwɛ siyaw bɛɛ n'u ka masacɛw ye ko batofɛn ɲanamanw tɛ, mɔgɔ bololabaara lo, ko alaya si t'u la.

⁵¹A gwɛnin lo ko batofɛn ɲanamanw tɛ. Jɔn be se ka ban o la?

⁵²U te se ka mɔgɔ kɛ masa ye jamana kunna, walima ka sanji di mɔgɔw ma.

⁵³U te se k'u yɛrɛ ka koow ɲanabɔ. Ni mɔgɔ dɔ y'a tɔɲɔgɔn tɔɲɔ, u te se k'o tigi dɛmɛ fana. U te foyi ɲa.

⁵⁴Kɔnɔnin minw be tɛmɛ sanfɛ, barika t'olu la cogo min na, u fana be ten. Batofɛn yirilaman nunu, minw mɔnna ni sanu ni warigwɛ ye, ni tasuma ye o josow dɔ ta, murutigiw be boli k'u yɛrɛ kisi, nga olu be jɛni pewu i n'a fɔ soo nin tutunanw, tasuma kɔnɔ.

⁵⁵U te se ka wili masacɛ kama, walima u juguw kama.

⁵⁶O la, mɔgɔ be sɔn cogo di k'a fɔ k'u ye batofɛn ɲanamanw ye, ani k'u jati ten? Batofɛn yirilaman minw mɔnna ni warigwɛ ni sanu ye, olu tɛ se k'u yɛrɛ kisi soonw ma, walima benkannikɛlaw ma.

⁵⁷Mɔgɔw b'u ta ka sanu ni warigwɛ bɔ u la, ka taga n'u kannafani ye, u te se k'u yɛrɛ dɛmɛ fewu!

⁵⁸Masacɛ min b'a ka jagwɛlɛya yira kɛlɛ la, ale ka fisa ni batofɛn namaratɔ nunu ye. Sokɔnɔfɛn nafaman fana ka fisa n'u ye. Bonda min be sokɔnɔfɛnw tanga soon ka don ma, walima masaso kɔnɔ tutunan yirilaman fana ka fisa n'u ye.

⁵⁹Bari tile ni kalo, ani lolo minw be manamana, baara min dira u ma, u b'o kɛ a cogo la.

⁶⁰Ni saan be manamana fana, a yeli ka nɔgɔ. Fɔɲɔ fana koo be ten, min be fiyɛ yɔrɔ bɛɛ.

⁶¹Ni Ala y'a fɔ sankabaw ka kɛ yɔrɔ bɛɛ tuma min na, u b'o kɛ ten.

⁶²Tasuma min cira ka bɔ sanfɛ ka jigi kuluw ni yirituw halakili kama, min fɔr'a ye, a fana b'o kɛ. Nga batofɛn nunu te se ka suma ni fɛɛn nunu cogoya n'u fanga ye.

⁶³I be se k'a lɔn o le la ko i man kan k'u jati batofɛnw ye, walima k'a fɔ n'i daa ye ko batofɛn ɲanamanw lo. Bari u te se ka mɔgɔ sara a ka kɛwaliw la, walima ka koɲuman kɛ mɔgɔ ye.

⁶⁴Aw b'a lɔn ko batofɛn ɲanamanw tɛ, aw kana siran u ɲa!

⁶⁵U te se ka masacɛw ta ɲa, u te se k'u ta cɛn fana.

⁶⁶U te se ka kabakow yira siyaw la sankolo kɔnɔ, walima ka manamana i n'a fɔ tile, walima ka yeelen bɔ i n'a fɔ kalo.

⁶⁷Kongosogow ka fisa n'u ye, olu be se ka boli ka taga dogo yɔrɔ dɔ la k'u yɛrɛ sutara.

⁶⁸Ayiwa, fɛɛn bɛɛ b'a yira an na k'u te batofɛn ɲanamanw ye cogo si la. O kosɔn, aw kana siran u ɲa!

⁶⁹Sulagwɛnnan be jeforo kɔnɔ cogo min na n'a te se ka foyi kɛ, o mɔgɔ nunu ka batofɛn yirilamanw fana be ten, minw mɔnna ni sanu ni warigwɛ ye.

⁷⁰U be se ka suma ni ŋɔniyiri ye fana, kɔnɔw be sigi min kan nankɔ kɔnɔ. U be se ka suma ni suu ye, u ye min fili dibi la.

⁷¹Ni aw y'a ye tuma min na ko u ka fani ɲanamanw cɛnna, k'u cɛɲa bɔra u la, aw ben'a faamu k'u te fɛɛn ɲanamanw ye. A laban, bagabaga bena u dumu, u bena tila ka kɛ jamana ka maloyako ye.

⁷²Mɔgɔtilennin, batofɛn te min fɛ, ale ka fisa bari maloya tena ale sɔrɔ.