Read dyu Baruki ka kitabu 1 Bible Online

Baruki ka kitabu 1 - dyu bible

Baruki ka kitabu 1

¹Baruki ye kitabu min sɛbɛn k'a to Babilɔni, o filɛ nin ye, ale min tun ye Ɛlikiyasi dencɛ Azadiyasi deen Sedesiyasi dencɛ Maaseyasi deen Neriyasi dencɛ ye.

²Babilɔnikaw ye Zeruzalɛmu minɛ k'a jɛni saan min na, saan duuru o kɔ, a ye nin sɛbɛ o saan kalo duurunan tile wolonwulanan loon.

³Baruki y'a kalan Zowakimu deen Yoyakin ɲana, min tun ye Zuda mara masacɛ ye, ani jama bɛɛ ɲana min tun nana ka mɛnni kɛ.

⁴Mɔgɔ minw bɛɛ tun siginin be Babilɔni, Sudi baa daa la, faamaw, ni masadenw, ani cɛkɔrɔbaw, ni jama bɛɛ, u bɛɛ tun bɛ yen, mɔgɔbabaw fara tɔw kan.

⁵Jama tun be suun na, u tun be kasira fana ka to ka Matigi daali.

⁶O kɔ, u ye wari kɛ ɲɔgɔn kan ka kɛɲɛ n'u kelen kelen bɛɛ seko ye

⁷k'a ci Salɔmu dencɛ Ɛlikiyasi dencɛ Zowakimu ma Zeruzalɛmu, ale min tun ye sarakalasebaga ye, ni sarakalasebagaw tɔw ma, ani jama min bɛɛ tun be n'a ye Zeruzalɛmu.

⁸U juguw tun ye minan minw ta Matigi ka soo kɔnɔ ka taga n'u ye, Baruki tun ye olu ta *Siwan kalo tile tannan loon, janko k'u kɔsegi Zuda mara la. O tun ye warigwɛminanw ye, Zoziyasi dencɛ Sedesiyasi le tun k'u k'o lalaga, ale min tun ye Zuda mara masacɛ ye.

⁹U y'o lalaga Zekoniyasi nunu minɛnin kɔ Babilɔni masacɛ Nabukodonozɔri fɛ. A tun ye Zekoniyasi minɛ Zeruzalɛmu, ka Isirayɛlidenw ɲamɔgɔw minɛ, n'u ka bololabaarakɛlaw, [1] n'u ka faamaw, ani jamanadenw, ka taga n'u ye Babilɔni.

¹⁰U y'a fɔ ko: «An ye wari ci aw ma janko aw ka wusulan ni begɛnw ni kɔnɔninw san, k'u kɛ saraka jɛnitaw ye, ni hakɛ yafa sarakaw. Aw ka suman sarakaw ni saraka tɔ nunu bɔ Matigi, an ka Ala ka sarakabɔyɔrɔ kan,

¹¹ka Ala dali Babilɔni masacɛ Nabukodonozɔri n'a deen Balitazari ye janko u sii ka caya i ko sankolo be dugukolo sanfɛ kudayi cogo min na,

¹²janko Matigi ka barika don an na, k'an nisɔndiya, Babilɔni masacɛ Nabukodonozɔri n'a deen Balitazari ka to k'an mara, an ka baara kɛ u ye waatijan na, an koo ka diya u ye fana.

¹³Aw ka Matigi an ka Ala daali anw ye fana, bari an y'a hakɛ ta. Fɔɔ ka se bii ma, Matigi diminin be an kɔrɔ kosɔbɛ.

¹⁴An ye kitabu min ci aw ma, aw k'o kalan Matigi ka soo kɔnɔ Gwatakɔrɔsigi ɲanagwɛ la a n'a daganin be loon minw na janko mɔgɔw ka lɔ u ka hakɛ la.

¹⁵«Aw k'a fɔ ko: ‹Matigi, an ka Ala, i tilennin lo, nga maloya ye anw ta ye i n'a fɔ a be cogo min na bii. Maloya ye anw, Zuda mara mɔgɔw ni Zeruzalɛmukaw,

¹⁶n'an ka masaw, n'an ɲamɔgɔw, n'an ka sarakalasebagaw, n'an ka kiraw, ani an bɛmaw ta ye.

¹⁷Bari an ye e Matigi hakɛ ta.

¹⁸An ma kɛ lanamɔgɔw ye, an ma ele Matigi, an ka Ala ka kuma bato, i tun b'a fɔra an ye tuma min na ko an ka sariyaw sira taama, i ye minw sigi an ye.

¹⁹Kabini loon min na i y'an faaw bɔ Ezipiti jamana na fɔɔ ka na se bii ma, an ma tilen e ma, Matigi, an ka Ala, an m'i ka kuma jati.

²⁰O le kosɔn, tɔɔrɔw tugunin b'anw kɔ i n'a fɔ an be cogo min na bii. Ele Matigi barika la, e ka baarakɛla Musa y'an lasɔmi danga minw la, e bɔra n'an faaw ye loon min na Ezipiti jamana na janko ka jamana diman d'an ma, o kojugu nunu y'an sɔrɔ.

²¹I ye kiraw ci an ma, nga an ma sɔn ka ele Matigi, an ka Ala ka kuma mɛn olu fɛ.

²²An kelen kelen bɛɛ tugura an ka nigɛjuguw kɔ, ka batofɛn wɛrɛw bato. An ye kojugu kɛ ele Matigi, an ka Ala ɲakɔrɔ.