Read dyu Baruki ka kitabu 2 Bible Online

Baruki ka kitabu 2 - dyu bible

Baruki ka kitabu 2

¹« ‹O la Matigi, i tun ye min fɔ an kama, n'an Isirayɛlidenw ka kititigɛlaw kama, e ye min fɔ an ka masaw kama, n'an ka ɲamɔgɔw, ani Isirayɛli ni Zuda mara mɔgɔw kama, i y'o kɛ.

²I ye koo minw kɛ Zeruzalɛmu la, o ɲɔgɔn ma deli ka kɛ yɔrɔ si diɲɛ kɔnɔ. A kɛra i ko a sɛbɛnnin be Musa ka sariyasɛbɛ kɔnɔ cogo min na.

³Gwɛlɛya sababu y'a kɛ dɔw y'u yɛrɛ wolodenw ɲimi.

⁴Masa minw bɛɛ b'an lamini na, ele Matigi y'an ka mɔgɔw jɛnsɛn olu cɛma k'u don u bolo janko u lamini siyaw bɛɛ k'u lɔgɔbɔ ani k'u nɛni.

⁵Sanni an ka see sɔrɔ, u sera anw le kɔrɔ, bari an ma ele Matigi, an ka Ala ka kuma bato. O la, an ye e hakɛ ta.

⁶« ‹Matigi, an ka Ala, i tilennin lo, nga maloya ye anw n'an faaw ta ye, i n'a fɔ a be cogo min na bii.

⁷Matigi, i tun ye tɔɔrɔ min bɛɛ fɔ an kama, o bɛɛ y'anw sɔrɔ.

⁸O bɛɛ n'a ta, an ma i daali ko i k'o nigɛjuguw bɔ an kelen kelen bɛɛ la.

⁹O le kosɔn, i y'a to o tɔɔrɔ nunu y'an sɔrɔ, bari ni ele Matigi y'a fɔ ko an ka koo minw bɛɛ kɛ, i ye kantigi ye olu la.

¹⁰I y'o sariya minw sigi anw ye, e tun b'a fɔra an ye tuma min na ko an k'o bato, an ma mɛnni kɛ i fɛ.

¹¹« ‹Matigi, Isirayɛli ka Ala, i ye kabakow ni taamasiɲɛw kɛ ni sebagayaba ye, k'i ka jama bɔ Ezipiti jamana na. I y'i tɔgɔ boɲa i n'a fɔ a be ye bii cogo min na. Sisan

¹²an sɔnna ko an ye hakɛ kɛ, an murutira e ma, Matigi an ka Ala. An ma i ka fɔta si bato.

¹³An tɔɔ ye mɔgɔ damani ye siya wɛrɛw cɛma, i y'an jɛnsɛn minw cɛma. O la, kana dimi an kɔrɔ tugu.

¹⁴« ‹Matigi, an ka dalili mɛn, n'an ka ɲinita, an kisi e tɔgɔ kosɔn. Minw y'an minɛ k'an bɔ an ka jamana na, i k'an koo diya olu ye

¹⁵janko dugukolo kan mɔgɔw bɛɛ k'a lɔn ko i ye Matigi, an ka Ala ye, ani ko i ye an Isirayɛlidenw woloma ka kɛ i ta ye.

¹⁶Matigi, k'i to i ka sigiyɔrɔ la sankolo la, i k'an filɛ ka janto an na. I tulo malɔ ka mɛnni kɛ,

¹⁷k'i ɲaa yɛlɛ ka filɛli kɛ. Mɔgɔ minw sara n'u be lahara, nii te olu minw na tugu, olu tena ele Matigi ka boɲa n'i ka tilenninya fɔ do.

¹⁸Nga mɔgɔ min nii tɔɔrɔnin be kosɔbɛ, min be taamana a kuun birinin, a barika bannin, min ɲaa te yeli kɛ ɲanaman, kɔngɔtɔ, o le bena i ka boɲa n'i ka tilenninya fɔ, Matigi!

¹⁹« ‹O la, an faaw n'an ka masaw ye kotilennin minw kɛ, an t'an jigi la olu kan k'an ka dalili kɛ ele Matigi, an ka Ala fɛ.

²⁰Bari i dimina an kɔrɔ kosɔbɛ, i ko i tun y'a don i ka baarakɛlaw daa la cogo min na, minw ye i ka kiraw ye, ko

²¹ele Matigi ko an ka biri ka kolo Babilɔni masacɛ ye, k'o la, an bena to jamana nin kɔnɔ i ye min di an faaw ma. [1]

²²Nga ele Matigi ko ni anw ma kolo Babilɔni masacɛ ye ka kɛɲɛ n'i ka fɔta ye,

²³ko i ben'a kɛ nisɔndiya ni dusudiya mankan, ani kɔɲɔcɛ ni kɔɲɔmuso ka dɔnkiliw lako be dabila Zuda mara duguw la, ani Zeruzalɛmu. Jamana bɛɛ bena kɛ yɔrɔlakolon ye, a kɔnɔ mɔgɔw bena bɔ yen pewu.

²⁴Nga i tun b'a fɔra an ye tuma min na ko an ka kolo Babilɔni masacɛ ye, an ma mɛnni kɛ i fɛ. O le kosɔn, i tun ye kuma minw don i ka baarakɛlaw, i ka kiraw daa la, i y'o kɛ. I tun ko u bena an ka masaw n'an faaw kolow bɔ kaburuw kɔnɔ.

²⁵An faaw n'an ka masaw sara tɔɔrɔjuguw kɔnɔ, kɔngɔ, ni kɛlɛ, ani jɔnya la jamana wɛrɛ kɔnɔ. A filɛ, u kolow tonin be kɛnɛma. Tilefɛ, tile b'u jɛni, sufɛ, u be to nɛnɛ la.

²⁶Soo min tun lɔra e tɔgɔ la, a be cogo min na bii, ele y'a kɛ ten Isirayɛli ni Zuda mara mɔgɔw ka juguya kosɔn.

²⁷« ‹O bɛɛ n'a ta Matigi, i muɲuna an kɔrɔ kosɔbɛ ka makari an na sɔbɛ la

²⁸i ko i tun y'a don i ka baarakɛla Musa daa la cogo min na i y'a fɔ a ye loon min na ko a k'i ka sariya sɛbɛn Isirayɛlidenw ye. E tun ko

²⁹ni an ma e ka kuma bato, jamaba nin bena dɔgɔya ka kɛ fitini, siyaw cɛma i bena u jɛnsɛn ka taga minw fɛ.

³⁰Ko bari i y'a lɔn ko an tena mɛnni kɛ i fɛ, sabu an ye siya tulogwɛlɛn ye. Ko nga k'an to jamana wɛrɛ kɔnɔ, u y'an minɛ ka taga n'an ye min na, ko an bena miiri,

³¹k'a lɔn ko e le ye Matigi ye, an ka Ala. Ko i bena hakiliɲuman d'an ma, ka tulow di an ma an ka se ka mɛnni kɛ.

³²Ko u y'an minɛ ka taga n'an ye jamana min na, k'an to o yɔrɔ la, an bena i tanu, i ye min ye, an hakili bena jigi o la.

³³Ko an bena an ka tulogwɛlɛya dabila, n'an ka kɛwalijuguw, bari koo min ye an faaw sɔrɔ tuma min na u ye e Matigi hakɛ ta, an hakili bena jigi o la.

³⁴« ‹Ko i bena an segi o jamana na, e y'i daa di an faa Ibrayima ni Isiyaka ani Yakuba ma min kosɔn, an bena kɛ o tigiw ye. Ko i bena an caya, ko an tena dɔgɔya tugu.

³⁵Ko i bena bɛn n'an ye kudayi, janko i be kɛ an ka Ala ye, an fana ka kɛ i ka jama ye. Ko i ye jamana min di an, i ka jama Isirayɛli ma, ko i ten'an gwɛn ka bɔ a kɔnɔ tugu.