Read dyu Baruki ka kitabu 3 Bible Online

Baruki ka kitabu 3 - dyu bible

Baruki ka kitabu 3

¹« ‹Matigi, Setigi, Isirayɛli ka Ala, an be kulera e nɔɔ fɛ, an dusu kasinin be kosɔbɛ, an jigi tigɛnin lo.

²Matigi, mɛnni kɛ an fɛ, makari an na bari an ye e hakɛ ta.

³Ele kɔni be yen tuma bɛɛ, nga anw tununin lo kudayi.

⁴Matigi, Setigi, Isirayɛli ka Ala, an ka dalili mɛn. An minw tun ma sɔn k'i ka ladiliw bato, an be i ko suuw, Matigi, an ka Ala, an minw ye u kɔmɔgɔw ye, an man fisa ni olu ye. O la, tɔɔrɔ tugura anw kɔ.

⁵Kana i hakili to an Faaw ka tilenbaliyakow la, nga bii, e k'i ka sebagaya n'i tɔgɔ le filɛ.

⁶E le ye Matigi ye, an ka Ala, an bena i tanu.

⁷I y'a kɛ an be siran e ɲa janko an ka dɛmɛ ɲini i fɛ. K'a to jamana wɛrɛ kɔnɔ an ka jɔnya la, an bena i tanu bari an faaw tun ye murutiko minw kɛ k'i hakɛ ta, an y'o koo bɛɛ bɔ an dusu la pewu.

⁸A filɛ, an yɔrɔ ka jan an faso la bii, i y'an jɛnsɛn yɔrɔ la janko o yɔrɔ mɔgɔw k'an nɛni ani k'an danga. O be kɛra an na an faaw ka tilenbaliyako bɛɛ kama, olu minw faranna ele Matigi, an ka Ala la.› »

⁹Isirayɛlidenw, sariya minw be sijan di, aw k'olu lamɛn. Aw k'aw tulow malɔ janko aw ka se ka kɛ hakilimanw ye.

¹⁰Isirayɛlidenw, a kɛra di aw b'aw juguw ka jamana na? Mun kosɔn aw be kɔrɔla jamana wɛrɛ kɔnɔ?

¹¹Aw magara suuw la k'aw yɛrɛ nɔgɔ. Aw be jati mɔgɔ minw ka kan ka taga lahara.

¹²O kɛra bari aw ye hakilitigiya sɔrɔyɔrɔ to yen.

¹³N'aw tun tugura Ala le kɔ, aw tun bena to hɛrɛ la kudayi.

¹⁴O la, aw ka hakilitigiya, ni barika, ani lɔnniya sɔrɔyɔrɔ ɲini k'a lɔn, min seen fɛ sijan sɔrɔyɔrɔ be lɔn, ani nisɔndiya, ani hɛrɛ.

¹⁵Jɔn ye hakilitigiya ka yɔrɔ lɔn? Jɔn delila ka don a ka nafolo marayɔrɔ la?

¹⁶Siyaw kuntigiw wa? Walima kongosogow kolobagaw?

¹⁷Walima minw be kɔnɔw mara wa? Minw be warigwɛ ni sanu kafo ɲɔgɔn kan k'a mara, mɔgɔw jigi be minw kan, nafolo banbali be minw fɛ, olu lo wa?

¹⁸Minw be warigwɛ baara k'a kɛ u haminako ye, minw ka kɛwaliw be tɛmɛ mɔgɔ ka miiriya kan, olu lo wa?

¹⁹U sara, u tagara lahara, dɔ wɛrɛw wilila u nɔɔ na.

²⁰Filankuru wɛrɛw nana diɲɛ kɔnɔ, u y'u sii kɛ dugukolo kan, nga u ma se ka hakilitigiya sɔrɔsira lɔn.

²¹U m'a sɔrɔsira lɔn fewu, u ma hami n'a koo ye. U tun ye sira min taama, u wolodenw y'u yɛrɛ kɔlɔsi o ma.

²²Hakilitigiya koo ma mɛn Kanaan jamana na, a ma ye Teman. [1]

²³Hali Agari kɔmɔgɔ minw tun be hakilitigiya ɲinina dugukolo kan, Meran ni Teman jagokɛlaw, ni siirinlabagaw, ni lɔnniya ɲinibagaw, olu ma se ka hakilitigiya sɔrɔsira lɔn, u ma u sɔbɛ don a sɔrɔsiraw la.

²⁴Isirayɛlidenw, nin diɲɛ min ye Ala ka soo ye, o ka bon dɛ! A ka mara nin ka bon haali!

²⁵A ka bon, daan t'a boɲa la. A ka jan sanfɛ, a te se ka suma!

²⁶Mɔgɔjan wolol'a kɔnɔ fɔlɔfɔlɔ, u tɔgɔ bɔra. U tun ka janjan u be se kɛlɛ la kosɔbɛ.

²⁷Nga Ala ma olu woloma k'a ka hakilitigiya sɔrɔsira yira u la.

²⁸U sara hakilitanya kosɔn, u halakira u ka miiribaliya kosɔn.

²⁹Jɔn yɛlɛla ka taga sankolo la ka hakilitigiya minɛ ka jigi n'a ye ka bɔ sanfɛ?

³⁰Jɔn tagara kɔgɔji kɔfɛ ka hakilitigiya sɔrɔ k'a falen ni sanu ye ka segi n'a ye?

³¹Mɔgɔ si t'a sɔrɔsira lɔn, hali mɔgɔ kelen yɛrɛ t'a fɛ k'a sira taama.

³²Nga Ala min be koo bɛɛ lɔn, ale sera k'a lɔn a hakili barika la. A ye dugukolo labɛn k'a to kudayi, a ye seen naani fɛɛnw kɛ a kan.

³³A be yeelen wele, a yɛrɛyɛrɛtɔ be sɔn a ta ma. A b'a ci, yeelen be bɔ ka taga.

³⁴Lolow nisɔndiyanin be manamana u lɔyɔrɔw la.

³⁵A b'u wele, u b'a jaabi ko: «Naamu!» U be manamana u Danbaga ye nisɔndiya la.

³⁶O Danbaga nin ye an ka Ala ye, a ɲɔgɔn te yen fana.

³⁷Sira min be taga hakilitigiya yɔrɔ la, ale lo b'o lɔn. A y'a yira a ka baarakɛla Yakuba kɔmɔgɔw la, a y'a yira a ka mɔgɔ kanunin Isirayɛli deenw na.

³⁸K'a ta o waati le ma, mɔgɔw b'a ye dugukolo kan, a nana to adamadenw cɛma.