Read dyu Baruki ka kitabu 4 Bible Online

Baruki ka kitabu 4 - dyu bible

Baruki ka kitabu 4

¹Hakilitigiya be sɔrɔ Ala ka sariyaw kitabu le kɔnɔ. Ala ka sariya lo, min be seen kan kudayi. Mɔgɔ minw bɛɛ be nɔrɔ a la, olu be taga kisili yɔrɔ la. Minw b'a ye k'a to yen, olu bena sa.

²Yakuba kɔmɔgɔw, aw ye segi ka nɔrɔ a la! Aw ye yeelen sira ta! Aw ye taga kɛnɛ faan fɛ!

³Aw kana aw ka kunkɔrɔtako to mɔgɔ wɛrɛw ye, aw kana aw ka tɔnɔ di siya wɛrɛ ma.

⁴Isirayɛlidenw, an dagamunin lo bari an be Ala sago lɔn!

⁵Ne ka mɔgɔw, aw k'aw jaa gwɛlɛya, Isirayɛli tɔgɔ be aw minw kan!

⁶Aw feerela siya wɛrɛw ma, o kuun tun te aw halakiko ye. Aw ye Ala dusu dimi le, o kama, a y'aw don aw juguw bolo.

⁷Bari sanni aw ka saraka bɔ Ala ye, aw y'o kɛ jinaw ye k'aw Danbaga darabɔ.

⁸Aw ɲinɛna waati bɛɛ Ala kɔ, min y'aw balo. Aw y'aw bamuso nii tɔɔrɔ kosɔbɛ, min ye Zeruzalɛmu ye.

⁹O dugu nin ye Ala ka dimi sintɔ ye aw ma, a y'a fɔ ko: «Siyɔn laminiduguw, aw ye mɛnni kɛ, Ala ye tɔɔrɔba la ne kan.

¹⁰Masaba ye ne deenw bila ka taga jɔnya la, ne y'o ye.

¹¹Ne tun y'u lamɔ ni nisɔndiya ye! Ne ɲanasisinin y'u taatɔ ye, n dusu kasinin.

¹²Ne kɛra i ko muso min cɛɛ sara, ne bɔnɔna n deen bɛɛ la, mɔgɔ si kana nisɔndiya o kosɔn! U ka hakɛ kɛra sababu ye ne tora n kelen na, u jɛngɛna ka Ala ka sariya to yen.

¹³U ma sɔn a ka fɔtaw ma, u m'a ka kuma bato. A ye siratilennin min yira u la, u ma o taama.

¹⁴Siyɔn laminiduguw, aw ye na! Aw k'aw hakili to a la ko Masaba ye ne deenw bila ka taga jɔnya la.

¹⁵A ye siya dɔ ci u kama ka bɔ yɔrɔjan, siya malobali minw be kaan wɛrɛ fɔ, u te mɔgɔkɔrɔbaw boɲa, u te makari denmisɛnw na.

¹⁶U ye ne, firiyamuso dencɛw minɛ ka taga n'u ye, minw koo ka gwɛlɛ u bamuso ma. U ye ne denmusow bɔsi n na ka n to n kelen.

¹⁷«N deenw, ne be se k'aw dɛmɛ cogo di?

¹⁸Min ye tɔɔrɔ nunu la aw kan, ale lo bena aw bɔsi aw juguw bolo.

¹⁹N deenw, fɔɔ aw ka sira minɛ! Ne kɔni, ne tora n kelen, mɔgɔ te ne fɛ yan.

²⁰Ne ye hɛrɛlon fani bɔ n kaan na, ne ye dusukasifani le don ko n be Ala daali. Ne bena dɛmɛ ɲini Masaba fɛ n sii bɛɛ la.

²¹N deenw, aw k'aw jaa gwɛlɛya! Aw ka dɛmɛ ɲini Ala fɛ. A bena aw kisi ka bɔ aw tɔɔrɔbagaw bolo. A bena aw bɔ aw juguw bolo.

²²Ne kɔni jigi lanin be Masaba kan ko a bena aw kisi. Ala senuman y'a yira ne la ka n nisɔndiya ko yanni dɔɔni a bena makari aw la.

²³Ne ɲasisinin y'aw taatɔ ye, n dusu kasinin. Nga Ala bena aw segi ne ma nisɔndiyaba la, aw bena to yan kudayi.

²⁴Siyɔn laminiduguw ɲaa b'a la ko aw minɛna ka taga jamana wɛrɛ la. Nga yanni dɔɔni u ben'a ye, Masa Ala bena aw kisi ni sebagaya kabakoman ni nɔɔrɔ ye.

²⁵N deenw, aw ka Ala ka dimi muɲu. Aw juguw b'aw tɔɔrɔla, nga yanni dɔɔni aw ben'a ye k'u halakira, aw bena aw seenw la u tɔngɔrɔ kan. [1]

²⁶N deen barikatanw, aw taamana sira kan, kabakuru ka ca min kan, u y'aw minɛ ka taga n'aw ye i ko begɛnw, juguw ye minw soɲa.

²⁷N deenw, aw jaa kana tigɛ! Aw ka dɛmɛ ɲini Ala fɛ. Ale min y'a kɛ aw tagara o yɔrɔ la, ale hakili bena to aw la.

²⁸Aw tun y'a latigɛ ko aw bena jɛngɛ ka bɔ Ala ka sira la. N'aw nimisara tuma min na, aw ka jija k'a ɲini kosɔbɛ ka tɛmɛ fɔlɔ kan!

²⁹Bari min ye tɔɔrɔ nunu la aw kan, ale bena na aw kisi, k'aw nisɔndiya kudayi.»

³⁰Zeruzalɛmu, i jaa gwɛlɛya! Ala bena i dusu saalo, ale min y'i tɔgɔ la.

³¹Mɔgɔ minw ye kojugu kɛ i la, ka nisɔndiya i benni la, bɔnɛ ye u ta ye!

³²I deenw kɛra jɔɔnw ye dugu minw kɔnɔ, bɔnɛ ye u ta ye! Dugu min mɔgɔw y'u minɛ, bɔnɛ ye o ta ye!

³³Bari, a nisɔndiyara i benni la k'a yɛrɛ tanu i cɛnko la. A dusu fana bena kasi a yɛrɛ halakiko la.

³⁴A kɔnɔ mɔgɔw ka ca, o ye kunkɔrɔta sababu ye a fɛ. Nga ne Ala ben'a kɛ a be bɔnɔ o la, a ka yɛrɛboɲa bena yɛlɛma ka kɛ dusukasi ye.

³⁵Ne Masaba bena tasuma mana a la, o ben'a halaki, a bena to ten fɔɔ waatijan. A bena kɛ jinaw ka sigiyɔrɔ ye waatijan kɔnɔ o kɔfɛ tugu.

³⁶Zeruzalɛmu, filɛli kɛ kɔrɔn fɛ, Ala be nana ni nisɔndiya min ye, i k'o ye.

³⁷I deenw natɔ filɛ, i tun ye minw taatɔ ye. U be nana ka bɔ faan bɛɛ, k'a ta kɔrɔn fɛ fɔɔ ka ta'a bila tileben fɛ. U lajɛnna Ala ka kuma barika la, u nisɔndiyanin, Ala ka sebagaya kosɔn.