Read dyu Daniyɛli tericɛ saba ka koo 1 Bible Online

Daniyɛli tericɛ saba ka koo 1 - dyu bible

Daniyɛli tericɛ saba ka koo 1

⁴

⁵

²⁴Ananiya ni Azariya ni Mikayɛli nunu mɔgɔ saba tora ka taama tasuma nin kɔnɔ ka to ka Matigi Ala tanu ani ka barika la a ye. [1]

²⁵Azariya lɔra tasuma cɛma ka Ala dali. A y'a fɔ ko:

²⁶«Matigi, foli ni tanuli y'i ta ye, an faaw ka Ala. Boɲa ka la i tɔgɔ kan waati bɛɛ.

²⁷Bari, i be koo minw kɛ, a bɛɛ tilennin lo. I ka kɛwaliw bɛɛ bɛnnin lo, e ka sira tilennin lo. I ka kitiw tilennin lo.

²⁸Tiɲɛ na, i ka koo tilennin lo. I ye ɲagwan minw bɛɛ la an kan, ani an faaw ka dugu senuman Zeruzalɛmu kan, o tilennin lo, o fana bɛnna an ka kojuguw sara ma.

²⁹An ye kojugu kɛ, bari an faranna i la, o ye kojugu ye an ye min kɛ. An ka kokɛtaw si ma ɲa.

³⁰An ma i ka fɔtaw bato, an ma sɔn k'u kɛ. I ko an ka min kɛ an ka nafa kosɔn, an ma o kɛ.

³¹I ye koo minw bɛɛ la an kunna, i ye koo minw bɛɛ kɛ an na, o ka kan n'an ye tiɲɛ na.

³²E y'an don an juguw bolo, minw te siran e Ala ɲa. Mɔgɔmurutininw lo, u ka koo ka go haali. E y'an don masa tilenbali bolo, min ka juguya ɲɔgɔn te sɔrɔ dugukolo kan.

³³Bii do, an te se k'an daa yɛlɛ, maloya ni dɔgɔya le kɛra i batobagaw n'i ka baarakɛlaw niyɔrɔ ye.

³⁴I tɔgɔ boɲa filɛ, i kana an to an juguw bolo kudayi. Bɛɛn min b'an cɛ, i kan'a to o be cɛn.

³⁵I ka makari an na i teri Ibrayima kama, n'i ka baarakɛla Isiyaka, an'i ka mɔgɔɲuman Isirayɛli kama.

³⁶E tun y'a fɔ olu le ye ko i bena u kɔmɔgɔw caya i n'a fɔ lolow ani kɔgɔji daa la cɛncɛn.

³⁷Matigi, an tɔɔ dɔgɔyara ka tɛmɛ siyaw bɛɛ kan. An kɛra dɔgɔyafɛn ye bii, dugukolo faan bɛɛ la an ka kojuguw kama.

³⁸Ɲamɔgɔ te an fɛ bii bii nin na tugu, kira te yen, kuntigi te yen, saraka jɛnitaw te se ka bɔ, saraka wɛrɛ fana tɛ se ka bɔ, ani suman ta fana, wusulan te se ka jɛni. An tɛ se ka na n'an ka suman deen fɔlɔw ye k'u d'i ma waasa k'i ka nɛɛma sɔrɔ.

³⁹O bɛɛ n'a ta, an ka yɛrɛmajigi, n'an ka hakili yɛlɛma kosɔn, e ka makari an na ka sɔn an na i n'a fɔ sagajigi ni tura jɛnitaw,

⁴⁰E ka sɔn an ka saraka nin na bii, i n'a fɔ saga caaman caaman tulɔninw. A to an ka se ka tugu i kɔ. Bari, mɔgɔ minw b'u jigi la i kan, maloya te olu sɔrɔ.

⁴¹Sisan, an bena tugu i kɔ n'an dusu bɛɛ ye, ka siran i ɲa,

⁴²k'i dali. Kana an maloya, hinɛ an na i ka makariba kosɔn.

⁴³Kabako kɛ k'an kisi. Boɲa la i tɔgɔ kan, Matigi!

⁴⁴Minw b'i ka baarakɛlaw tɔɔrɔ, maloya ka kɛ olu ta ye. U ka sebagaya nagasi, k'u ka fanga cɛn, k'u maloya.

⁴⁵U k'a lɔn ko e kelenpe le ye Matigi Ala ye, boɲa be min kan dugukolo faan bɛɛ.»

⁴⁶Masacɛ ka mɔgɔ minw tun y'u fili dibi kɔnɔ, olu kɔni tun b'a la ka to ka dɔ fara tasuma kan dɔrɔn, u tun be manan donn'a la, ni tulunɔgɔ, ni binmurumuru, ani lɔgɔ.

⁴⁷Tasuma manana ka wili dibi sanfɛ fɔɔ ka se mɛtɛrɛ mugan ni naani.

⁴⁸Babilɔnika minw tun be dibi gɛrɛfɛ, tasuma yɛrɛkɛra ka olu jɛni.

⁴⁹Matigi ka mɛlɛkɛ tun jigira dibi kɔnɔ Azariya n'a tɔɲɔgɔnw ye, ka tasuma fiyɛ ka bɔ kɛnɛma,

⁵⁰ka dibi kɔnɔna sumaya i n'a fɔ dugutilama fɔɲɔ. Tasuma ma se u ma fewu. A m'u tɔɔrɔ cogo si la, a ma foyi kɛ u la.

⁵¹O tuma na, kanbelen saba nunu y'u kaan kɛ kelen ye k'a daminɛ ka dɔnkili la, ka Ala fo k'a tanu dibi kɔnɔ k'a fɔ ko:

⁵²«Tanuli ka kɛ i ta ye, Matigi an faaw ka Ala. I ka kan ni foli ni boɲa ye waati bɛɛ! I tɔgɔɲuman ka kan ni tanuli ni boɲa ye. A ka kan ni foli ni nɔɔrɔ ye tuma bɛɛ!

⁵³Tanuli ka kɛ i ta ye, i batoso kɔnɔ, e ka nɔɔrɔ be yɔrɔ min na. Tanuli ni boɲa ka kɛ i ta ye tuma bɛɛ!

⁵⁴Tanuli ka kɛ i ta ye, ele min be yeli kɛ fɔɔ dingɛ juu la k'i siginin to *serubɛnw sanfɛ. Foli ni boɲa ye i ta ye tuma bɛɛ!

⁵⁵Tanuli ka kɛ i ta ye, k'i to masasigilan kan. Batoli ni boɲa ka kɛ i ta ye tuma bɛɛ!

⁵⁶Tanuli ka kɛ i ta ye sankolo la, batoli ni boɲa ka kɛ i ta ye tuma bɛɛ!

⁵⁷«Matigi ka danfɛnw bɛɛ, aw ka Matigi tanu! Aw k'a bato, ka barika la a ye tuma bɛɛ!

⁵⁸Sankolo ka Matigi tanu! Sankolo k'a bato, ka barika la a ye tuma bɛɛ!

⁵⁹Matigi ka mɛlɛkɛw, aw ka Matigi tanu! Aw k'a bato, ka barika la a ye tuma bɛɛ!

⁶⁰Sanfɛji ka Matigi tanu! Sanfɛji k'a bato, ka barika la a ye tuma bɛɛ!

⁶¹Matigi ka kɛlɛdenw bɛɛ, aw k'a tanu! Aw k'a bato, ka barika la a ye tuma bɛɛ!

⁶²Tile ni kalo ka Matigi tanu! Tile ni kalo k'a bato, ka barika la a ye tuma bɛɛ!

⁶³Lolow ka Matigi tanu! Lolow k'a bato, ka barika la a ye tuma bɛɛ!

⁶⁴Sanji bɛɛ, ani komiji ka Matigi tanu! Aw k'a bato, ka barika la a ye tuma bɛɛ!

⁶⁵Fɔɲɔ bɛɛ ka Matigi tanu! Aw k'a bato, ka barika la a ye tuma bɛɛ!

⁶⁶Tasuma ni funteni ka Matigi tanu! Aw k'a bato, ka barika la a ye tuma bɛɛ!

⁶⁷Nɛnɛ ni funteni ka Matigi tanu! Aw k'a bato, ka barika la a ye tuma bɛɛ!

⁶⁸Kɔmiji ni sankaba ka Matigi tanu! Aw k'a bato, ka barika la a ye tuma bɛɛ!

⁶⁹Suu ni tile ka Matigi tanu! Aw k'a bato, ka barika la a ye tuma bɛɛ!

⁷⁰Yeelen ni dibi ka Matigi tanu! Aw k'a bato, ka barika la a ye tuma bɛɛ!

⁷¹Sanbɛrɛ ni nɛnɛ ka Matigi tanu! Aw k'a bato, ka barika la a ye tuma bɛɛ!

⁷²Jii siminin ni *sanji siminin ka Matigi tanu! Aw k'a bato, ka barika la a ye tuma bɛɛ!

⁷³Sanmanamana ni sankaba ka Matigi tanu! Aw k'a bato, ka barika la a ye tuma bɛɛ!

⁷⁴Dugukolo ka Matigi tanu! I k'a bato, ka barika la a ye tuma bɛɛ!

⁷⁵Kuluw ni tintinw ka Matigi tanu! Aw k'a bato, ka barika la a ye tuma bɛɛ!

⁷⁶Dugukolo kan yiriw bɛɛ ka Matigi tanu! Aw k'a bato, ka barika la a ye tuma bɛɛ!

⁷⁷Kɔgɔji ni bajiw bɛɛ ka Matigi tanu! Aw k'a bato, ka barika la a ye tuma bɛɛ!

⁷⁸Jii bɔyɔrɔw ka Matigi tanu! Aw k'a bato, ka barika la a ye tuma bɛɛ!

⁷⁹Jigɛbabaw ni jikɔnɔfɛnw bɛɛ ka Matigi tanu! Aw k'a bato, ka barika la a ye tuma bɛɛ!

⁸⁰Kɔnɔw bɛɛ ka Matigi tanu! Aw k'a bato, ka barika la a ye tuma bɛɛ!

⁸¹Kongosogow ni begɛnw ka Matigi tanu! Aw k'a bato, ka barika la a ye tuma bɛɛ!

⁸²Adamadenw, aw ka Matigi tanu! Aw k'a bato, ka barika la a ye tuma bɛɛ!

⁸³Isirayɛlidenw, aw ka Matigi tanu! Aw k'a bato, ka barika la a ye tuma bɛɛ!

⁸⁴Sarakalasebagaw, aw ka Matigi tanu! Aw k'a bato, ka barika la a ye tuma bɛɛ!

⁸⁵Matigi ka baarakɛlaw, aw ka Matigi tanu! Aw k'a bato, ka barika la a ye tuma bɛɛ!

⁸⁶Mɔgɔtilenninw, aw ka Matigi tanu! Aw k'a bato, ka barika la a ye tuma bɛɛ!

⁸⁷Aw mɔgɔɲuman minw majiginin lo, aw ka Matigi tanu! Aw k'a bato, ka barika la a ye tuma bɛɛ!

⁸⁸Ananiya, ni Azariya ani Mikayɛli, aw ka Matigi tanu! Aw k'a bato, ka barika la a ye tuma bɛɛ! Bari, a y'an kisi jahanama ma, a y'an bɔsi saya la. A y'an bɔsi ka bɔ dibi kɔnɔ, a y'an bɔ tasumaba kɔnɔ.

⁸⁹Aw ka barika la Matigi ye, bari a ka koo ka di. A be makari waati bɛɛ.

⁹⁰Matigi batobagaw bɛɛ, aw ka Matigi Ala tanu! Ale min be batofɛnw bɛɛ sanfɛ. Aw k'a tanu, k'a waleɲuman lɔn, bari a be makari waati bɛɛ!»