Read dyu SUZANI KA KOO 1 Bible Online

SUZANI KA KOO 1 - dyu bible

SUZANI KA KOO 1

¹Cɛɛ dɔ tun be yen, a tɔgɔ ko Yoyakimu a siginin tun be Babilɔni.

²A ye muso min furu, o tɔgɔ ko Suzani o ye Ɛlikiyasi deen ye. Suzani tun cɛɛ ka ɲi haali. A tun be siran Matigi ɲa.

³A ka somɔgɔw tun ye mɔgɔtilenninw ye. U tun y'u denmuso kolo ka kɛɲɛ ni Musa ka sariya ye.

⁴Nafolo tun be Yoyakimu fɛ kosɔbɛ. Nankɔ tun b'a fɛ, o tun gunnin be a ka soo la. Zuwifuw tun be n'a fɛ tuma caaman, bari u tun b'a boɲa bɛɛ ye.

⁵O saan na, u ye cɛkɔrɔba fila woloma jama cɛma ka kiti tigɛko don olu bolo. Matigi ka kuma nin ɲasinna olu le ma ko: «Kojugu donna Babilɔni, cɛkɔrɔbaw ni kititigɛlaw le sababu la. Olu minw b'u yɛrɛ kɛ jama ɲatilenbagaw ye.»

⁶O mɔgɔ fila nunu tun be to ka na Yoyakimu ka soo. Koo ɲanabɔta tun be minw fɛ, olu bɛɛ tun be taga u fɛ.

⁷Ni mɔgɔw bɔra yen tilefɛ, Suzani be bɔ ka yaalayaala a cɛɛ ka nankɔ la.

⁸Cɛkɔrɔba fila nunu tora k'a ye loon o loon n'a be don ka yaala yen. A koo donna u dusu la.

⁹U ka nigɛla boɲana fɔɔ u y'u ka miiriya bɔ Ala kan. U ma miiri kititilennin fana la.

¹⁰Suzani nigɛ tun gwannin b'u fila bɛɛ la. Nga u si tun m'u ka tɔɔrɔ fɔ ɲɔgɔn ye.

¹¹Bari u tun be maloya k'u kɔnɔnako fɔ ɲɔgɔn ye, min ye ka la ni Suzani ye.

¹²Loon o loon, u tun be cogo ɲini ka se k'a ye.

¹³Loon dɔ sa, u y'a fɔ ɲɔgɔn ye ko: «Tileradumuni waati sera, an ka taga soo.» U bɔra ka faran, bɛɛ y'a ka sira ta.

¹⁴Nga u bɛɛ kɔsegira ka na ɲɔgɔn sɔrɔ o yɔrɔ kelen na. U ye ɲɔgɔn ɲininga u nakun na. U y'u ka nigɛlako fɔ ɲɔgɔn ye. O tuma na, u bɛnna waati dɔ la, u bena se ka Suzani kelen sɔrɔ waati min na.

¹⁵U tun be lonɲuman dɛndɛna minkɛ, loon dɔ, Suzani nana don nankɔ la i n'a fɔ a be deli k'a kɛ cogo min na. A tun be ni baaraden fila dɔrɔn ye o loon na, sunguruw tun lo. A tun b'a fɛ ka ko, bari funteni tun be yen.

¹⁶Mɔgɔ si tun te yen, ni cɛkɔrɔba fila nunu tɛ, minw tun b'a dɛndɛna.

¹⁷Suzani y'a fɔ sunguru nunu ye ko: «Aw ye taga tulu ni kasadiyanan ta ka n'a di yan, o kɔ, aw ka nankɔ daaw tugu, waasa n be ko.»

¹⁸A y'a fɔ u ye cogo min na, u y'a kɛ ten. U ye nankɔ daa nunu tugu, ka taga bɔ ni donda dɔ nin ye ka taga u ka cii la. U ma cɛkɔrɔba nunu ye, bari u dogonin tun lo.

¹⁹Sunguruw bɔra dɔrɔn, cɛkɔrɔba fila nunu wilila ka boli ka Suzani sɛgɛrɛ.

²⁰U y'a fɔ a ye ko: «Nankɔ daaw tugunin lo, mɔgɔ si ɲaa te an na, i koo le gwannin b'an na. Sɔn ka la n'an ye.

²¹N'o tɛ, an ben'a fɔ ko kanbelen dɔ tun be n'i ye. K'o kama, e y'a fɔ ko sunguru nunu ka kɔsegi.»

²²Suzani kabara! K'a fɔ ko: «Ne minɛna faan bɛɛ. Ni ne sɔnna, saya lo! Ni n banna fana, n tena bɔ aw bolo.

²³Aw ka ben ne kan, o ka fisa ne ma ka n yɛrɛ di aw ma ka kojugu kɛ Matigi ɲakɔrɔ.»

²⁴O kɔ, a kulera kosɔbɛ. O tuma na fana, cɛkɔrɔbaw fana tun be kulera.

²⁵U kelen bolila ka taga nankɔ daaw yɛlɛ.

²⁶Mɔgɔw tora soo kɔnɔ ka mankan mɛn minkɛ, u girinna ka don nankɔ la ni donda dɔ nin ye waasa k'a lɔn koo min kɛra Suzani la.

²⁷Cɛkɔrɔba nunu y'u ka kuma fɔ ka ban tuma min na, baaradenw maloyara fɔɔ k'a dama tɛmɛ, bari u ma deli k'o ɲɔgɔn mɛn Suzani ka koo la ka ye.

²⁸A dugusagwɛ, jama nana ɲɔgɔnye la a cɛɛ Yoyakimu ka soo, cɛkɔrɔba fila nunu nana ni miirijugu ye. U tun ye Suzani fagako le ŋaniya. U y'a fɔ jama ye ko:

²⁹«Aw ye taga Suzani wele ka na yan. Ɛlikiyasi denmuso, Yoyakimu muso.» U tagar'a wele.

³⁰Ale, n'a wolobagaw, n'a deenw, n'a ka somɔgɔw bɛɛ nana.

³¹Suzani tun cɛɛ ka ɲi, a sɔɔn tun ka ɲi.

³²Mɔgɔjugu nunu k'u k'a ka lankanna bɔ a kunna janko u ka se k'a filɛ ka fa, bari a tun y'a kuun datugu n'o ye.

³³A ka somɔgɔw bɛɛ tun be kasira. A yebagaw bɛɛ fana tun be kasira.

³⁴Cɛkɔrɔba fila nunu wilila jama cɛma k'u bolo la Suzani kuun na.

³⁵K'a to kasi la, a y'a ɲaa kɔrɔta sanfɛ, bari a jigi tun be Matigi kan.

³⁶Cɛkɔrɔbaw ko: «An tun be munumununa nankɔ la, an mɔgɔ fila dɔrɔn, muso nin nana don ni sunguru fila ye. O kɔ, a ko sunguru nunu ka kɔsegi, a sɔrɔla ka daaw tugu.

³⁷Kanbelen dɔ tun dogonin be, ale bɔra ka na a fɛ ka la n'a ye.

³⁸K'an to nankɔ faan dɔ la, an ye o kojugu nin ye, an bolila ka na u kama.

³⁹An nana u sɔrɔ u be ɲɔgɔn kan. Nga an ma se ka kanbelen minɛ, bari a fanga tun ka bon n'an ta ye. A ye daa yɛlɛ ka bɔ ka boli.

⁴⁰An kɔni y'ale minɛ, k'a ɲininga kanbelen nin tɔgɔ la.

⁴¹A ma sɔn k'a tigi fɔ an ye. Anw kɔni ye o seere ye.» Jama lara u ka kuma na, bari cɛkɔrɔbaw lo, kititigɛlaw lo fana. U y'a jalaki ko a ka kan ka faga.

⁴²O tuma na, Suzani kulera k'a fɔ ko: «Waati bɛɛ Ala, ele min be kodogoninw lɔn, e min be koo bɛɛ lɔn sanni u ka kɛ,

⁴³i b'a lɔn ko u ye galon le la ne kan. Mɔgɔjugu nunu ye koo min la ne kan, ne bena sa o kama, k'a sɔrɔ ne m'o kɛ.»

⁴⁴Matigi ye Suzani kasikan mɛn.

⁴⁵U tun be tagara n'a ye a fagayɔrɔ la tuma min na, Matigi ye hakiliɲuman di kanbelennin dɔ ma min tɔgɔ ko Daniyɛli.

⁴⁶Ale kulera ko: «Ne seen te muso nin fagako la.»

⁴⁷Jama bɛɛ lɔra k'u ɲaa sin a ma, k'a ɲininga ko: «I be min fɔra, o kɔrɔ ye mun ye?»

⁴⁸Kanbelennin lɔra u cɛma k'a fɔ ko: «Ee! Isirayɛlidenw, aw ka nalomanya sera o bɛɛ ma wa? Aw be mɔgɔ jalaki ten n'aw ma sɛgɛsɛgɛli kɛ k'a tiɲɛ lɔn wa?

⁴⁹Aw ye kɔsegi kiti tigɛyɔrɔ la. Bari mɔgɔ nunu ye galon le tigɛ k'a la kan.»

⁵⁰Mɔgɔw bɛɛ kɔsegira joona joona. Cɛkɔrɔba tɔɔ nunu y'a fɔ Daniyɛli ye ko: «Na sigi an cɛma, k'i ka hakililata fɔ an ye. Bari, Ala ye mɔgɔkɔrɔba hakili d'i ma.»

⁵¹Daniyɛli y'a fɔ ko: «Aw k'u bɔ ɲɔgɔn kɔrɔ k'u yɔrɔ jaɲa ɲɔgɔn na kosɔbɛ, ne ka se k'u ɲininga.»

⁵²U y'u bɔ ɲɔgɔn kɔrɔ tuma min na, Daniyɛli ye kelen wele k'a fɔ a ye ko: «Ele, i kɔrɔla juguya la. I ka kojugu nunu juru sarawaati sera sisan.

⁵³I tun te kitiw tigɛ ka tilen. I tun be jalaki ben jalakibaliw kan, minw ka kan ka jalaki, i be olu bila. K'a sɔrɔ Matigi y'a fɔ ko: ‹Mɔgɔ min ma koo kɛ, i man kan k'o faga, ani mɔgɔtilennin.›

⁵⁴Ayiwa, sisan, ni tiɲɛ lo ko i ye Suzani ye, a ni kanbelen nin lara ɲɔgɔn fɛ yiri jumɛn le kɔrɔ? O fɔ.» A y'a jaabi ko: «Siyiri kɔrɔ.»

⁵⁵Daniyɛli y'a fɔ a ye ko: «Jaati! I ye galon tigɛ min be na n'i fagako ye. Ayiwa, Ala ye sira di a ka mɛlɛkɛ dɔ ma ka ban, min bena i ci fila.»

⁵⁶Daniyɛli ko u ka bɔ n'a ye, ka na ni cɛɛ dɔ nin ye. Daniyɛli y'a fɔ ale ye ko: «Ele, i te Zuda ka siya ye dɛ, i ye Kanaan ka siya le ye! Muso ka cɛɲa ye ele kuun wili ka juguya don i kɔnɔ.

⁵⁷Aw be to k'a kɛ ten le ni Isirayɛli musow ye. Siranya fɛ, olu fana be sɔn ka la n'aw ye. Nga Zuda mara deen dɔ ma se k'aw ka juguya muɲu.

⁵⁸Ayiwa, sisan, a fɔ. I tagara bari u lanin na yiri jumɛn le kɔrɔ?» A y'a jaabi ko: «Cɛtigɛyiri kɔrɔ.»

⁵⁹Daniyɛli y'a fɔ a ye ko: «Jaati! I ye galon tigɛ min be na n'i fagako ye. Bari Ala ka mɛlɛkɛ be kɔnɔni kɛra ni murujan b'a bolo waasa k'i cɛɛ tigɛ fila. A bena aw halaki.»

⁶⁰Jama lajɛnnin kulera kosɔbɛ. U tora ka Ala tanu, ale min be mɔgɔw kisi, minw jigi b'a kan.

⁶¹U wilila cɛkɔrɔba fila nunu kama. Daniyɛli ye minw yira ko u ye galontigɛlaw ye u yɛrɛ ka darakan fɛ.

⁶²Olu tun b'a fɛ bɔnɛ min ka u mɔgɔɲɔgɔn sɔrɔ, o le lara olu kan ka kɛɲɛ ni Musa ka sariya ye. U y'u faga. O loon na, mɔgɔ jalakibali joli ma sɔrɔ ka bɔn.

⁶³Ɛlikiyasi n'a muso kɔni, olu tora ka Ala tanu, u denmuso Suzani ka koo la. A cɛɛ Yoyakimu n'a ka somɔgɔw bɛɛ fana tun be Ala tanura. Bari maloyako ma sɔrɔ a ka kɛwali la.

⁶⁴Kabini o loon na, Daniyɛli kɛra mɔgɔbaba ye jama ɲana.

⁹¹(24) Masacɛ Nabukodonozɔri hakili ɲagaminin teliyara ka wili, a y'a ladibagaw ɲininga ko: «An ma mɔgɔ saba le siri k'u fili tasuma kɔnɔ wa?» U y'a jaabi ko: «Jaati, masacɛ!»

⁹²(25) Masacɛ ko: «Ne ɲaa be mɔgɔ naani na, u si sirinin tɛ, u be taamana tasuma kɔnɔ. Tasuma te foyi kɛra u la. Mɔgɔ naaninan bɔnin be batofɛn dɔ fɛ.»

⁹³(26) O tuma na, Nabukodonozɔri gwɛrɛla dibi tasumaman daa la. A y'a fɔ ko: «Sadiraki, Mesaki, Abɛdenego, Fɛɛn bɛɛ kuntigi Ala ka baarakɛlaw, aw ye bɔ yan!» O tuma na, Sadiraki, ni Mesaki ani Abɛdenego bɔra tasuma kɔnɔ.

⁹⁴(27) Marakuntigiw, ni dugutigiw, ni cinɲamɔgɔw ani masacɛ ladibagaw girinna ka na kanbelen nunu filɛ, k'a ye ko tasuma ma foyi kɛ u la. U kunsigi ma jɛni, u ka faniw tun b'u cogo la. Tasuma kasa tun te u kan.

⁹⁵(28) O tuma na, Nabukodonozɔri kumana. A y'a fɔ ko: «Sadiraki, ni Mesaki ani Abɛdenego ka Ala ka tanu! Ale min y'a ka mɛlɛkɛ ci ka n'a ka baarakɛlaw kisi. Minw y'u jigi la a kan, ka ban masacɛ darakan na, ka sɔn saya ma waasa u kana fɛɛn wɛrɛ bato n'u ka Ala tɛ.

⁹⁶(29) Ayiwa, ne ka kuma filɛ: Mɔgɔ o mɔgɔ, a mana kɛ siya o siya ye, ni mara o mara mɔgɔ ye, n'a ye kumajugu fɔ Sadiraki, ni Mesaki ani Abɛdenego ka Ala ye, o tigi be faga ka tigɛtigɛ. A ka soo be kɛ ɲamaɲama filiyɔrɔ ye. Bari, batofɛn te yen min be se ka mɔgɔ kisi ten.»

⁹⁷(30) O kɔ, masacɛ ye lɔyɔrɔ di Sadiraki, ni Mesaki ani Abɛdenego ma ka tɛmɛ fɔlɔta kan Babilɔni mara kɔnɔ.

⁹⁸(31) Masacɛ Nabukodonozɔri ye cii bila k'a fɔ siyaw bɛɛ ye, ni maraw bɛɛ mɔgɔw ye, dugukolo faan bɛɛ la ko: «Hɛrɛ ka kɛ aw ye kosɔbɛ!

⁹⁹(32) Fɛɛn bɛɛ kuntigi Ala ye kabako ni koba minw kɛ ne ye, ne y'a ye ko a ka ɲi k'o fɔ aw ye.

¹⁰⁰(33) A ka kabako kɛninw ka bon! Barika be a ka koba kɛninw na! A ka masaya ye waati bɛɛ koo ye. A ka fanga te ban abada!