Read dyu Ezekiyɛli ka kitabu 11 Bible Online

Ezekiyɛli ka kitabu 11 - dyu bible

Ezekiyɛli ka kitabu 11

¹O kɔ, Masaba ka Nii ye ne kɔrɔta ka taga ni ne ye Masaba ka soo donda la, min sinnin be kɔrɔn ɲafan fɛ. Ne ye mɔgɔ mugan ni duuru ye o donda la. Ne ye Azuri dencɛ Yazaniya ni Benayawu dencɛ Pelatiyawu ye u cɛma, olu le tun ye jama ɲamɔgɔw ye.

²Masaba y'a fɔ ne ye ko: «Adamaden, mɔgɔ nunu le be kojugu latigɛra, u be ladilijugu dira dugu nin kɔnɔ.

³U b'a fɔra ko: ‹Soo lɔwaati ma se fɔlɔ. Dugu nin ye daga ye, anw ye sogo ye.›

⁴O la, i ka kiraya kɛ u kama, adamaden, kiraya kɛ.»

⁵O kɔ, Masaba ka Nii jigira ne kan tugu k'a fɔ ne ye ko ne k'a fɔ ko, Masaba ko: «Isirayɛlidenw, aw be kuma min fɔra, ne b'o lɔn. Ne b'aw ka miiriya lɔn.

⁶Aw ye mɔgɔ caaman faga dugu nin kɔnɔ k'a bulɔnw fa ni suuw ye.

⁷O la, ne Matigi, Masaba ko: Aw ye mɔgɔ minw faga dugu kɔnɔ, olu le ye sogo ye, dugu nin le ye daga ye. Ne bena aw gwɛn ka bɔ a kɔnɔ.

⁸Aw be siran murujan ɲa kɛ. Ne ben'a kɛ u be na aw kama n'a ye. Ne Matigi, Masaba le ko ten.

⁹Ne bena aw gwɛn ka bɔ dugu nin kɔnɔ k'aw don lonanw bolo, ne bena aw jalaki.

¹⁰U bena aw faga ni murujan ye, ne bena aw jalaki Isirayɛli jamana kɔnɔ. O tuma na, aw ben'a lɔn ko ne ye Masaba le ye.

¹¹Dugu nin tena kɛ daga ye aw fɛ tugu, aw tena kɛ a kɔnɔ sogo ye. Ne bena aw jalaki Isirayɛli jamana kɔnɔ.

¹²O tuma na, aw ben'a lɔn ko ne ye Masaba le ye. Aw ma ne ka fɔta ni ne ka kolatigɛninw kɛ, fɔɔ aw y'aw lamini siyaw ka kɛwaliw ɲɔgɔn kɛ!»

¹³Ka ne to kirayakuma fɔli la, Benayawu dencɛ Pelatiyawu sara. Ne lara ka n ɲaa biri duguma ka kule k'a fɔ ko: «Ee, Matigi, Masaba! Isirayɛliden tɔɔ minw tora, i bena olu bɛɛ le halaki wa?»

¹⁴Masaba kumana ne fɛ ko:

¹⁵«Adamaden, Zeruzalɛmukaw b'a fɔra i yɛrɛ ka mɔgɔw Isirayɛlidenw bɛɛ lajɛnnin ye ko: ‹Aw kana gwɛrɛ Masaba la, aw ye to yɔrɔjan, bari jamana nin dira anw le ma ka kɛ an niyɔrɔ ye.›

¹⁶O la, i k'a fɔ u ye ko ne Matigi, Masaba ko: Ne y'u gwɛn ka taga yɔrɔjan, siya wɛrɛw cɛma, k'u jɛnsɛ jamana wɛrɛw la, nga u tagara jamana minw na, ne be n'u ye o yɔrɔw la waati dɔɔni kɔnɔ.

¹⁷O la, i k'a fɔ u ye ko ne Matigi, Masaba ko: Ne bena aw lajɛn ka bɔ siya wɛrɛw cɛma, aw jɛnsɛna ka taga jamana minw na, ne bena aw lajɛn ka bɔ o jamana nunu na ka Isirayɛli jamana di aw ma tugu.

¹⁸N'u kɔsegira jamana nin kɔnɔ tuma min na, aw bena u ka josɔnko n'u ka murutiko bɛɛ ban.

¹⁹ «Tulogwɛlɛya min b'aw la, ne bena o ban ka nikura don aw la, ka hakiliɲuman d'aw ma

²⁰janko aw ka ne ka kolatigɛninw ni ne ka fɔtaw bato ka ɲa. Aw bena kɛ ne ka mɔgɔw ye, ne bena kɛ aw ka Ala ye.

²¹Nga mɔgɔ minw be nɔrɔ u ka joow, n'u ka josɔnko la, ne bena olu ka kɛwaliw doni la u yɛrɛ kan. Ne Matigi, Masaba le ko ten.»

²² O kɔ, *serubɛn nunu y'u gamanw kɔrɔta, seen nunu tun be u kɔrɔ. Isirayɛli ka Ala ka nɔɔrɔ tun be u kunna.

²³Masaba ka nɔɔrɔ nin wilila ka bɔ dugu kɔnɔ ka taga lɔ dugu kɔrɔn ɲafan fɛ kulu kan.

²⁴Ala Nii ye ne kɔrɔta ka taga ni ne ye Babilɔni, Isirayɛlidenw fɛ olu minw tun tagara jɔnya la. Ne ye koo nunu ye Ala Nii barika la. Fɛɛn min tun yirala ne la, o wilila sanfɛ ka ne to yen.

²⁵Masaba ye koo minw bɛɛ yira ne la, ne y'o bɛɛ fɔ Isirayɛlidenw ye.