Read dyu Ezekiyɛli ka kitabu 14 Bible Online

Ezekiyɛli ka kitabu 14 - dyu bible

Ezekiyɛli ka kitabu 14

¹Isirayɛli cɛkɔrɔba dɔw nana ne fɛ ka sigi ne ɲakɔrɔ.

²O tuma na, Masaba kumana ne fɛ ko:

³«Adamaden, joko be mɔgɔ nunu dusu la kosɔbɛ, u b'u yɛrɛ to joko b'u nigɛ k'u don kojugu la. Ne bena sɔn u be ne ɲininga wa?

⁴O la, a fɔ u ye ko ne Matigi, Masaba ko: Ni joko be Isirayɛliden min dusu la, k'a nigɛ k'a don kojugu la, n'o tigi tagara kira ɲininga, ne Masaba yɛrɛ le ben'a jaabi. Ne bena o kɛ ka kɛɲɛ n'a ka joo caaman nunu ye.

⁵A kɛra ten, Isirayɛlidenw, minw bɛɛ faranna ne la u ka joow kosɔn, ne b'a fɛ k'a kɛ u be kɔsegi ne ma.

⁶O kosɔn, i k'a fɔ Isirayɛlidenw ye ko ne Matigi, Masaba ko: ‹Aw ye kɔsegi ka na! Aw k'aw ka joow to yen k'aw ka kokolonw bɛɛ dabila!›

⁷«Ni Isirayɛliden dɔ, walima lonan dɔ, min siginin be Isirayɛli jamana kɔnɔ, n'a banna ne la, ka joko don a dusu la, o k'a nigɛ k'a don kojugu la, n'o tigi tagara kira ɲininga janko ka ne sago lɔn, ne Masaba yɛrɛ ben'a jaabi.

⁸Ne bena n ɲaa sin o tigi ma k'a kɛlɛ, ne ben'a kɛ lasɔmifɛn ye, k'a tɔgɔ kɛ talen ye. Ne ben'a niin bɔ ne ka mɔgɔw cɛma. O tuma na, aw ben'a lɔn ko ne ye Masaba le ye.

⁹«Ni kira min y'a yɛrɛ nigɛ ka kirayakuma fɔ a kunfɛ, ne yɛrɛ le y'a nigɛ. Ne bena wili o tigi kama k'a halaki ka bɔ ne ka jama Isirayɛli cɛma.

¹⁰U bɛɛ bena lɔ n'u ka filiko kunko ye, kira n'a ta, kira ɲiningabaga n'a ta.

¹¹A kɛra ten, Isirayɛlidenw tena faran ne la tugu. U tena u yɛrɛ nɔgɔ u ka murutiliw fɛ tugu. U bena kɛ ne ka mɔgɔw ye, ne bena kɛ u ka Ala ye. Ne Matigi, Masaba le ko ten.»

¹²Masaba kumana ne fɛ ko:

¹³«Adamaden, ni jamana dɔ ye tilenbaliyako dɔ kɛ ka ne hakɛ ta, ni ne ye n bolo kɔrɔta o kama k'a ka dumuni ban ka kɔngɔ bila jamana nin kɔnɔ k'a kɔnɔ mɔgɔw ni begɛnw faga,

¹⁴ni Nuhun ni Danɛli ani Zɔbu tun be jamana nin kɔnɔ, olu mɔgɔ saba nunu ka tilenninya tun bena u yɛrɛ dama le kisi. Ne Matigi, Masaba lo ko ten.

¹⁵«Ni ne ye warajuguw bila ka jamana nin yaala, n'u ye mɔgɔw bɛɛ faga, ka jamana nin kɛ yɔrɔlakolon ye fɔɔ mɔgɔ si te tɛmɛ yen wara nunu ɲasiran kosɔn,

¹⁶ni mɔgɔ saba nunu tun be sɔrɔ jamana nin kɔnɔ, olu dama le tun bena kisi. Ne Matigi, Masaba le ko ten ne tɔgɔ kosɔn. U tun tena se k'u yɛrɛ dencɛw, walima denmusow kisi, jamana nin be kɛ lakolon ye.

¹⁷«Walima ni ne ye murujan bila jamana kama, ni ne y'a fɔ ko u ka jamanadenw ni begɛnw faga ni murujan ye,

¹⁸ni mɔgɔ saba nunu tun b'o jamana nin kɔnɔ, ne tɔgɔ kosɔn, u tun tena se k'u yɛrɛ dencɛw, walima u denmusow kisi. Olu dɔrɔn tun bena kisi. Ne Matigi, Masaba ko ten.

¹⁹«Walima ni ne ye fɔɲɔbana bila jamana nin kɔnɔ, ni ne dimininba wilila u kama ka fagali kɛ, ka mɔgɔw ni begɛnw faga,

²⁰hali ni Nuhun ni Danɛli ani Zɔbu tun be jamana nin kɔnɔ, ne tɔgɔ kosɔn, olu dɔrɔn tun bena kisi, u ka tilenninya barika la, u tun tena se k'u dencɛw, walima u denmusow kisi.»

²¹ Ayiwa, ne Matigi, Masaba be min fɔ, o filɛ nin ye: «Hali ni ne ye tɔɔrɔko naani nunu lase Zeruzalɛmu ma: murujan, ni kɔngɔ, ni warajuguw, ani fɔɲɔbana, k'a kɔnɔ mɔgɔw ni begɛnw faga,

²²o bɛɛ n'a ta, Zeruzalɛmukaw dɔw bena to yen. Olu bena na aw sɛgɛrɛ. Ni aw y'u cogo, n'u ka kɛwaliw ye tuma min na, ne ye tɔɔrɔ minw lase Zeruzalɛmu ma, aw dusu bena suma o la.

²³Ɔnhɔn, n'aw y'u cogo n'u ka kɛwaliw ye, aw dusu bena suma bari aw ben'a lɔn ko ne ma foyi kɛ dugu nin kɔnɔ gwansan. Ne Matigi, Masaba lo ko ten.»