Read dyu Ezekiyɛli ka kitabu 18 Bible Online

Ezekiyɛli ka kitabu 18 - dyu bible

Ezekiyɛli ka kitabu 18

¹Masaba kumana ne fɛ ko:

² «Mun na aw be talen nin la Isirayɛli jamana koo la, ko: ‹Faaw ye *ɛrɛzɛngeren dumu, u deenw ɲiiw kumuna?›

³Ne Matigi, Masaba ko: Ne tɔgɔ kosɔn, aw tena talen nin la Isirayɛli jamana kɔnɔ tugu.

⁴Nii bɛɛ ye ne ta ye, faa far'a deen kan, u fila bɛɛ ye ne ta ye. Ni mɔgɔ min ye kojugu kɛ, o tigi le bena sa.

⁵An ka miiri mɔgɔtilennin koo la, a be tilenninyakow kɛ.

⁶A te kuluw kan saraka dumu, a te dɛmɛ ɲini Isirayɛlidenw ka joow fɛ. A t'a tɔɲɔgɔn ka muso ɲini, a te jɛn ni muso ye min b'a ka landa la.

⁷A te mɔgɔ si tɔɲɔ, a ye fɛɛn min minɛ ka sɔrɔ ka juru don, a b'o kɔsegi o tigi ma. A te soɲali kɛ, a be dumuni di kɔngɔtɔw ma, ka fani di dɛsɛbagatɔ ma.

⁸A te juru don tɔnɔ kama, a te tɔnɔjugu minɛ. A te tilenbaliyako kɛ, a be kiti tigɛ ni tilenninya ye.

⁹ A be ne ka koo latigɛninw kɛ, ka ne ka fɔtaw bato ni kantigiya ye. O tigi ye mɔgɔtilennin ye. Siga t'a la, a bena to nii na. Ne Matigi, Masaba le ko ten.

¹⁰«Nga n'o tigi deen kɛra mɔgɔjugu ye, n'a be mɔgɔ faga an'o ɲɔgɔnna,

¹¹k'a sɔrɔ a faa ma o ɲɔgɔn si kɛ. A be kuluw kan saraka dumu. A b'a tɔɲɔgɔn ka muso ɲini,

¹²a be dɛsɛbagatɔw ni fantanw tɔɲɔ. A be soɲali kɛ. A ye fɛɛn min minɛ ka sɔrɔ ka juru don, a t'o kɔsegi o tigi ma, a be dɛmɛ ɲini joow fɛ. A be kojuguw kɛ,

¹³a be juru don tɔnɔ kama, ka tɔnɔjugu minɛ. Yala o tigi bena to nii na wa? Ayi! A ye kojugu nunu bɛɛ kɛ minkɛ, o kosɔn, a bena faga, siga t'a la. A ka saya hakɛ bena kɛ a yɛrɛ kun.

¹⁴«Nga ni deen b'o tigi fɛ, n'o deen nin y'a ye ko a facɛ be kojugu nunu bɛɛ kɛra, o bɛɛ n'a ta, deen nin ma sɔn k'o ɲɔgɔn kɛ,

¹⁵a te saraka dumu kuluw kunna, a te dɛmɛ ɲini Isirayɛlidenw ka joow fɛ, a t'a tɔɲɔgɔn ka muso ɲini,

¹⁶a te mɔgɔ si tɔɲɔ, a te fɛɛn dɔ minɛ ka sɔrɔ ka juru don, a te soɲali kɛ, a be dumuni di kɔngɔtɔw ma, ka fani di dɛsɛbagatɔ ma.

¹⁷A te tilenbaliyako si kɛ, a te juru don tɔnɔ kama, walima ka tɔnɔjugu minɛ. A be ne ka fɔtaw bato ka ne ka koo latigɛninw kɛ. O deen nin tena sa a faa ka kojugu kosɔn. A bena to nii na, siga t'a la.

¹⁸A faa le bena sa a yɛrɛ ka kojugu kosɔn bari a benn'a tɔɲɔgɔn kan k'a balima soɲa, ka kobɛnbali kɛ a ka mɔgɔw cɛma.

¹⁹«Aw b'a fɔra ko: ‹Mun na faa ka jalaki man kan ka ben a deen kan?› Deen nin ye tilenninyakow kɛ, ka ne ka kolatigɛninw bɛɛ kɛ ka ɲa minkɛ, o la, a bena to nii na, siga t'a la.

²⁰ Mɔgɔ min ye kojugu kɛ, o tigi le bena sa. Faa ka jalaki tena ben a deen kan, deen ta fana tena ben a faa kan. Mɔgɔtilennin ka tilenninya ben'a yɛrɛ le nafa, mɔgɔjugu ka juguya bena la a yɛrɛ kun.

²¹«Ni mɔgɔjugu yɛlɛmana k'a ka kojugu bɛɛ dabila, ka ne ka fɔtaw bato, ka tilenninyakow kɛ, siga t'a la, a bena to nii na, a tena sa.

²²A ka kojuguw si tena jati tugu. A be kotilennin minw kɛra, a bena to nii na o le kosɔn.

²³Aw be miiri ko mɔgɔjugu ka saya ka di ne ye wa? Ne Matigi, Masaba b'a fɔ ko n'a yɛlɛmana k'a ka sirajuguw bila ka to nii na, o le ka di ne ye.

²⁴Nga ni mɔgɔtilennin y'a ka tilenninyasira bila ka koo tilenbali kɛ, ka mɔgɔjugu ka kojuguw bɛɛ ɲɔgɔn kɛ, aw be miiri ko a bena to nii na wa? A ye kotilennin minw kɛ, ne hakili tena to o si la. A bena sa a ka tilenbaliya n'a ka kojuguw kosɔn.

²⁵Nga aw b'a fɔ ko: ‹Masaba ka koo tilennin tɛ.› Isirayɛlidenw, aw ye mɛnni kɛ ne fɛ. Ne ka koo tilennin tɛ wa? Aw ta le tilennin tɛ.

²⁶Ni mɔgɔtilennin yɛlɛmana k'a ka tilenninyasira bila ka koo tilenbali kɛ, a bena sa o kosɔn. A ye kojugu min kɛ, a bena sa o le kosɔn.

²⁷Ni mɔgɔjugu yɛlɛmana k'a ka kojugu dabila, ka tilenninyakow kɛ, a ben'a nii kisi.

²⁸A ye hakili sɔrɔ k'a ka kojuguw bɛɛ dabila minkɛ, siga t'a la, a bena to nii na, a tena sa.

²⁹O bɛɛ n'a ta, Isirayɛlidenw b'a fɔ ko ne Masaba ka koo le tilennin tɛ. Isirayɛlidenw, ne ka koo tilennin tɛ wa? Aw ta le tilennin tɛ.

³⁰O le kosɔn, Isirayɛlidenw, ne bena aw kelen kelen bɛɛ kiti ka kɛɲɛ n'aw ka kɛwaliw ye. Ne Matigi, Masaba le ko ten. Aw ye yɛlɛma k'aw ka kojuguw dabila! O la, aw ka kojugu tena kɛ sababu ye aw ma tugu.

³¹Aw ye kojuguw bɛɛ dabila, k'aw dusu yɛlɛma, ani ka hakilikura sɔrɔ. Isirayɛlidenw, mun kama aw b'a fɛ ka sa?

³²Ne Matigi, Masaba ko: Tiɲɛ na, mɔgɔ si ka saya man di ne ye fewu! Aw ka kojugukɛ dabila ka to nii na!»