Read dyu Ezekiyɛli ka kitabu 20 Bible Online

Ezekiyɛli ka kitabu 20 - dyu bible

Ezekiyɛli ka kitabu 20

¹Isirayɛlidenw minɛnin kɔ ka taga jamana wɛrɛ la, o saan wolonwulanan kalo duurunan tile tannan loon, Isirayɛli cɛkɔrɔba dɔw nana sigi ne ɲafɛ ko u be Masaba ɲininga.

²O tuma na, Masaba kumana ne fɛ ko:

³«Adamaden, kuma Isirayɛli cɛkɔrɔbaw fɛ k'a fɔ u ye ko ne Matigi, Masaba ko: ‹Yala aw nana ne ɲininga le wa? Ne tɔgɔ kosɔn, ne tena sɔn aw ka ne ɲininga.›

⁴Adamaden, i tena u kiti wa? I k'i yɛrɛ labɛn k'u kiti. U bɛmaw ka kokolonw yira u la.

⁵ «A fɔ u ye ko ne Matigi, Masaba ko: Ne ye Isirayɛli woloma loon min na, ne ye n daa di sɔbɛ la Yakuba kɔmɔgɔw ma, ka n yɛrɛ yira u la Ezipiti jamana na. Ne ye layidu ta u ye ko ne bena kɛ Masaba ye, u ka Ala.

⁶Ne y'a fɔ o loon na ko tiɲɛ na, ne bena u bɔ Ezipiti ka taga n'u ye jamana dɔ la, ne tun ye min woloma u ye, jamana diman, nɔnɔ ni lii ka ca kosɔbɛ min kɔnɔ. Jamanaw bɛɛ la ɲuman lo.

⁷Ne y'a fɔ u ye ko batofɛnkolon minw b'u ka miiriya sama, ko u kelen kelen bɛɛ k'olu fili, k'u kana u yɛrɛ nɔgɔ ni Ezipitikaw ka joow ye. Ko ne ye Masaba ye, u ka Ala.

⁸O bɛɛ n'a ta, u murutira ne ma, u ma sɔn ka mɛnni kɛ ne fɛ. U ma sɔn ka batofɛnkolon nunu fili, u ma sɔn ka Ezipitikaw ka joow to yen. O la, ne ko ne bena n dimi bɔ u la, ka n ka fariya yira u la Ezipiti jamana kɔnɔ.

⁹Nga ne ma o kɛ n tɔgɔ cɛnko kama siya wɛrɛw cɛma, u siginin be minw cɛma. Ne tun ye n yɛrɛ yira u la siya nunu ɲana tuma min na ne tun ye layidu ta u ye ko ne bena u bɔ Ezipiti jamana na.

¹⁰«Ne y'u bɔ Ezipiti ka taga n'u ye kongokolon kɔnɔ.

¹¹ Ne ye ne ka kolatigɛninw yira u la, ani ka n ka fɔtaw fɔ u ye, minw batoli be na ni hɛrɛ ye.

¹² Ne ye n ka lafiɲɛlon latigɛ fana ka kɛ taamasiɲɛ ye ne ni u cɛ janko u k'a lɔn ko ne Masaba le b'u saniya.

¹³Nga Isirayɛlidenw murutira ne ma kongokolon kɔnɔ. U ma ne ka kolatigɛninw kɛ. Mɔgɔ be hɛrɛ sɔrɔ ne ka fɔta minw batoli fɛ, u ma sɔn olu ma, u ye ne ka lafiɲɛlon cɛn. O le kosɔn, ne tun ko ne bena n dimi bɔ u la kongokolon kɔnɔ k'u halaki.

¹⁴Nga ne ma o kɛ janko ne y'u bɔ Ezipiti siya minw ɲana, olu kana na ne tɔgɔ cɛn.

¹⁵ Ne y'a fɔ u ye tiɲɛ na kongokolon kɔnɔ ko ne tun ye jamana diman min d'u ma, nɔnɔ ni lii ka ca kosɔbɛ o min na, ni jamanaw bɛɛ la ɲuman lo, ko ne tena taga n'u ye o yɔrɔ la tugu.

¹⁶Bari u banna ne ka fɔtaw la, u ma ne ka kolatigɛninw kɛ, u ye ne ka lafiɲɛlon cɛn. U ka joow koo tun be u dusu la kosɔbɛ.

¹⁷O bɛɛ n'a ta, ne makarila u la, ne tun t'a fɛ k'u halaki. Ne ma sɔn k'u bɛɛ halaki kongokolon kɔnɔ.

¹⁸«Ne y'a fɔ u deenw ye kongokolon kɔnɔ ko: ‹Aw kana aw bɛmaw ka kolatigɛninw n'u ka fɔtaw bato, aw kana aw yɛrɛ nɔgɔ u ka joow la.

¹⁹Ne ye Masaba ye, aw ka Ala. Aw ka ne ka kolatigɛninw kɛ ka ne ka fɔtaw bato ka ɲa.

²⁰Aw ka ne ka lafiɲɛlonw bato janko o ka kɛ taamasiɲɛ ye aw ni ne cɛ. O tuma na, aw ben'a lɔn ko ne ye Masaba ye, aw ka Ala.›

²¹«Nga olu fana murutira ne ma. U ma taama ka kɛɲɛ ni ne ka kolatigɛninw ye. U ma banba ka ne ka fɔtaw bato, mɔgɔ be se ka hɛrɛ sɔrɔ minw batoli barika la. U ye ne ka lafiɲɛlonw fana cɛn. O la, ne tun ko ne bena n dimi bɔ u la, n bena n ka fariya yira u la kongokolon kɔnɔ.

²²Nga ne ma sɔn k'o kɛ, ne y'o to yen janko ne tɔgɔ kana cɛn siyaw fɛ, ne tun y'u bɔ Ezipiti o minw ɲana.

²³Ne y'a fɔ u ye tiɲɛ na kongokolon kɔnɔ ko ne bena u jɛnsɛn siya wɛrɛw cɛma k'u yɛrɛkɛ jamana wɛrɛw la,

²⁴bari u ma ne ka fɔtaw kɛ, u banna ne ka kolatigɛninw la ka ne ka lafiɲɛlonw cɛn. U bɛmaw ka joow y'u sama.

²⁵Kolatigɛnin minw ma ɲi, ani mɔgɔw te se ka hɛrɛ sɔrɔ fɔta minw barika la, ne yɛrɛ ye olu d'u ma.

²⁶Ne y'a to u ka nɔgɔ u ka sarakaw kosɔn, u kelen kelen bɛɛ tun y'u deen fɔlɔw kɛ ka sɔnni kɛ. Ne y'a to o ka kɛ janko u dusu be kasi, ani u k'a lɔn ko ne ye Masaba le ye.

²⁷O la, adamaden, kuma Isirayɛlidenw fɛ k'a fɔ u ye ko ne Matigi, Masaba ko: ‹Aw faaw ye ne tɔgɔ cɛn bari u ma tilen ne ma.›

²⁸«Ne tun ye n daa di ko ne bena jamana min d'u ma, ne y'a kɛ u donna yen. Kabini u sera yen, u ye tintinjanw ni yiribabaw ye yɔrɔ o yɔrɔ, u y'u ka sarakaw bɔ yen k'u ka boɲafɛnw di ka ne dusu gwan, k'u ka wusulan kasadiman jɛni, k'u ka jii bɔn.

²⁹Ne y'a fɔ u ye ko: ‹Aw be taga sɔnnikɛyɔrɔ minw na, olu ye mun ye?› Halibi o yɔrɔ nunu be wele ko Yɔrɔ kɔrɔtaninw.

³⁰«O kama, i k'a fɔ Isirayɛlidenw ye ko ne Matigi, Masaba ko: ‹Aw t'aw yɛrɛ nɔgɔra i n'a fɔ aw bɛmaw y'a kɛ cogo min na wa? Aw te kakalaya kɛra k'u ka joow sɔn wa, fɛnjugu nunu?

³¹Fɔɔ ka na se bii ma, n'aw b'aw deenw fili tasuma kɔnɔ ka sɔnni kɛ, k'aw yɛrɛ nɔgɔ n'o ye. Isirayɛlidenw, ne ka kan ka sɔn aw be ne ɲininga wa? Ne Matigi, Masaba, ne b'a fɔ aw ye ne tɔgɔ kosɔn ko ne tena sɔn aw ka ne ɲininga.›

³²«Aw ko aw b'a fɛ ka kɛ i n'a fɔ siya tɔw, i n'a fɔ jamana wɛrɛ mɔgɔw, ka yiriw ni kabakuruw sɔn. O tena kɛ dɛ!

³³Ne Matigi, Masaba ko: Ne tɔgɔ kosɔn, ne dimininba bena aw mara n ka sebagaya la.

³⁴Ne dimininba bena aw bɔ siya wɛrɛw cɛma jamanaw kɔnɔ aw jɛnsɛnna yɔrɔ minw na, k'aw lajɛn ɲɔgɔn kan ne ka sebagaya barikaman kosɔn.

³⁵Ne bena taga n'aw ye yɔrɔlakolon dɔ la, mɔgɔ te min na. O yɔrɔ la, ne bena aw kiti ɲada ni ɲada.

³⁶Ne bena aw kiti i ko ne y'a kɛ aw bɛmaw la Ezipiti kongokolon kɔnɔ cogo min na. Ne Matigi, Masaba le ko ten.

³⁷Aw bena to ne ka mara kɔnɔ i ko sagaw. Ne bena aw wajibiya ka ne ka bɛɛn bato.

³⁸Mɔgɔ minw murutinin lo ne ma n'u ma sɔn ne ta ma, ne bena olu bɔ aw cɛma. Ne bena u bɔ u ka sigijamana na, nga u tena se ka don Isirayɛli jamana kɔnɔ tugu. O tuma na, aw ben'a lɔn ko ne ye Masaba le ye.

³⁹«Aw kɔni, Isirayɛlidenw, ne Matigi, Masaba b'a fɔ aw ye ko: Aw ye taga aw ka joow sɔn, aw kelen kelen bɛɛ! Nga o kɔ, wajibi lo aw bena mɛnni kɛ ne fɛ, aw tena ne tɔgɔ senuman cɛn aw ka boɲafɛnw n'aw ka joow barika la tugu.

⁴⁰Bari ne Matigi, Masaba ko: Isirayɛli jama bɛɛ, minw siginin be jamana kɔnɔ, olu bɛɛ bena ne bato ne ka kulu senuman kan, Isirayɛli ka kulujan kan. Ne bena sɔn u ma o yɔrɔ la. Ne ben'a fɔ ko aw k'aw ka boɲafɛnw di ne ma, ani aw ka sɛnɛfɛnw bɛɛ fɔlɔw, ani aw ka fɛɛn senumanw bɛɛ.

⁴¹Aw jɛnsɛnnin be siya minw cɛma jamana minw na, ni ne y'aw bɔ olu cɛma k'aw lajɛn tuma min na, ne bena sɔn aw ma i n'a fɔ wusulan kasadiman. Ne ben'a yira siya wɛrɛw la aw barika la ko ne ye senuman ye.

⁴²Ne tun ye layidu ta ko ne bena jamana min di aw bɛmaw ma, o min ye Isirayɛli jamana ye, ni ne y'a kɛ aw donna o kɔnɔ tuma min na, o tuma na, aw ben'a lɔn ko ne ye Masaba le ye.

⁴³K'aw to o yɔrɔ la, aw hakili bena jigi aw taamacogo la, ani aw ye koo minw bɛɛ kɛ k'aw yɛrɛ nɔgɔ. Aw bena ɲugu aw yɛrɛ la aw ka kojugu kosɔn.

⁴⁴Isirayɛlidenw, ne tena aw minɛ ka kɛɲɛ n'aw ka jogojuguw n'aw ka kɛwalijuguw ye, ne bena koɲuman kɛ aw ye ne yɛrɛ tɔgɔ kosɔn. O tuma na, aw ben'a lɔn ko ne ye Masaba le ye. Ne Matigi, Masaba le ko ten.»