Read dyu Ezekiyɛli ka kitabu 21 Bible Online

Ezekiyɛli ka kitabu 21 - dyu bible

Ezekiyɛli ka kitabu 21

¹Masaba kumana ne fɛ ko:

²«Adamaden, i ɲaa sin worodugu ɲafan fɛ, ka kirayakuma fɔ worodugu ɲafan fɛ tuu kama.

³A fɔ a ye ko a ka ne Masaba ka kuma lamɛn. Ko ne Matigi, Masaba ko ne bena tasuma don a la, o yɔrɔ yiriw bɛɛ bena jɛni, u kɛnɛmanw fara janinw kan. Foyi tena se ka tasumaba nin faga. Fɛɛn o fɛɛn be yen k'a ta worodugu ɲafan fɛ ka ta'a bila kɔgɔdugu ɲafan fɛ, a bena o bɛɛ jɛni.

⁴Bɛɛ ben'a ye ko ne Masaba ye tasuma nin mana, a tena faga.»

⁵Ne ko: «Ee, Matigi, Masaba, u be ne koo fɔra ko ne ye talen labaga dɔrɔn le ye.»

⁶O kɔ, Masaba kumana ne fɛ ko:

⁷«Adamaden, i ɲaa sin Zeruzalɛmu faan fɛ ka kuma sɔnnikɛyɔrɔw kama. Kiraya kɛ Isirayɛli jamana kama

⁸k'a fɔ Isirayɛlidenw ye ko ne Masaba ko ne be nana u kama. Ne bena n ka murujan bɔ a foroko la k'u bɛɛ faga, mɔgɔtilennin fara mɔgɔjuguw kan.

⁹Ne b'a fɛ k'u bɛɛ faga. O la, ne be n ka murujan bɔ a foroko la u bɛɛ kama k'a ta worodugu ɲafan fɛ fɔɔ ka ta'a bila kɔgɔdugu ɲafan fɛ.

¹⁰O tuma na, mɔgɔw bɛɛ ben'a lɔn ko ne Masaba ye n ka murujan bɔ a foroko la. A tena kɔsegi a foroko la tugu.

¹¹«E kɔni, adamaden, i ka ŋunan! I ka ŋunan u ɲana k'i kɔɔ kuru dusukasi kosɔn.

¹²N'u y'i ɲininga ko i be ŋunanna mun kosɔn, i k'u jaabi ko kibarujugu bena se, o kosɔn, mɔgɔw bɛɛ jaa bena tigɛ, u barika bena ban, u fari bena faga, u kunbiri bena kɛ jii ye. Ɔnhɔn, a be nana! A bena kɛ tiɲɛ na. Ne Matigi, Masaba le ko ten.»

¹³Masaba kumana ne fɛ ko:

¹⁴«Adamaden, kiraya kɛ k'a fɔ ko ne Masaba ko: Murujan, murujan, a daa diyara, a jɔsira.

¹⁵A daa diyara fagali kama, a jɔsira janko a ka manamana. An ka ɲanagwɛ kɛ ne dencɛ ka masabere kosɔn wa? Murujan be bere nin ɲɔgɔn bɛɛ mafiɲɛya.

¹⁶Murujan dir'a jɔsibaga ma janko mɔgɔ k'a minɛ a bolo. A daa diyara, a jɔsira janko a ka don mɔgɔfagala bolo.

¹⁷Adamaden, kule dusukasi bolo, bari murujan nin ɲasinnin be ne ka mɔgɔw ma, a ɲasinnin be Isirayɛlidenw kuntigiw bɛɛ ma. U bena faga ɲɔgɔn fɛ. O la, e k'i kuun minɛ jigitigɛ bolo.

¹⁸Kɔrɔbɔliba bena na. Ne Matigi, Masaba le ko ten.

¹⁹Ayiwa adamaden, kiraya kɛ, i tigɛ ci ɲɔgɔn na. Murujan bena tigɛli kɛ siɲɛ fila, siɲɛ saba yɛrɛ. Murujan be yen fagali kama, a bena fagali caaman kɛ faan bɛɛ la.

²⁰Ne ye mɔgɔfagamurujan bila u ka dondaw bɛɛ la janko u jaa ka tigɛ ani k'u caaman ben. Aa! A dilannin be ka manamana, a labɛnnin lo fagali kama.

²¹Murujan dadiman, fagali kɛ kinibolo faan fɛ, fagali kɛ numanbolo faan fɛ, fagali kɛ faan bɛɛ la!

²²Ne fana bena n tigɛ ci ɲɔgɔn na ka n dimi bɔ. Ne Masaba le kumana.»

²³Masaba kumana ne fɛ ko:

²⁴«Adamaden, sira fila bɔ Babilɔni masacɛ ka murujantigiw ye, u fila bɛɛ ka bɔ jamana kelen na. I ka taamasiɲɛ bila u faranyɔrɔ la ka sin duguba nin ma.

²⁵Sira kelen ka taga ni Babilɔni kɛlɛdenw ye amoniw ka duguba Araba kɔnɔ, kelen ka taga n'u ye Zeruzalɛmu kɔnɔ, Zuda mara dugu barikaman.

²⁶Bari Babilɔni masacɛ lɔnin be sirafaran na, sira nunu kunbɛnyɔrɔ la, ka lagwɛli kɛ. A be biɲɛw yuguyugu, k'a ka joow ɲininga, k'a ka sogow biɲɛ kɔlɔsi. [1]

²⁷Biɲɛ yuguyuguta min be Zeruzalɛmu yira, o don a kinibolo la. A ka kan ka taga Zeruzalɛmu ka kogocifɛnw bila, ka sira di ko u ka fagali kɛ, ka kɛlɛ kulekan wili, ka kogocifɛnw bila dugu dondaw la, ka bɔgɔ tonton k'a kɛ yɛlɛyɔrɔ ye, ka kɛlɛkɛyɔrɔw lɔ, ka dingɛw sogi.

²⁸Zeruzalɛmukaw bena miiri k'o lagwɛli nin te foyi ye bari u tun kalila ɲɔgɔn ye ko u be kɛ ɲɔgɔn ɲiiw ye. Nga a bena u hakili jigi u ka tilenbaliyakow le la k'u minɛ.

²⁹«O kosɔn, ne Matigi, Masaba b'a fɔ u ye ko: ‹Aw ye ne hakili jigi aw ka tilenbaliyakow la, tuma min na aw ka murutikow bɔra kɛnɛ kan, Aw ka kojuguw yera aw ka kɛwaliw bɛɛ la. O kosɔn, aw juguw bena aw minɛ.

³⁰E kɔni, Isirayɛli ka kuntigijugu, e min te siran Ala ɲa, i ka kojugu ser'a daan na, i ka loon sera.

³¹Ne Matigi, Masaba ko aw ka fani melekenin foni ka bɔ a kuun na, aw ye masafugulan bɔ a kuun na. Yɛlɛmani bena don: Mɔgɔ min majiginin lo, o bena boɲa sɔrɔ, min ye boɲa sɔrɔ, o bena majigi.

³²Tomo o tomo! Ne bena Zeruzalɛmu cɛn k'a kɛ tomo ye! Kitiko be min bolo, ne ben'a di min ma, koo nin tena kɛ sanni ale ka na.›

³³ «Adamaden, kirayakuma fɔ ko ne Matigi, Masaba b'a fɔra amoniw n'u ka nɛnili koo la ko: Murujan, murujan bɔra fagali kama, a jɔsira janko ka mɔgɔw halaki, janko a ka manamana!

³⁴Hali ni yelifɛnkolonw ni kirayakuma galonlamanw be yen aw koo la, mɔgɔjugu minw ka kan ni fagali ye, u kaan bena tigɛ ni murujan ye. I ka kojugu ser'a daan na, i ka loon sera.

³⁵«Murujan kɔsegi a foroko la. I danna yɔrɔ min na, i wolola jamana min na, ne bena i kiti o yɔrɔ la.

³⁶Ne bena n dimi bɔ i la, k'i fiyɛ ni n ka dimi tasuma ye. Ne bena i don cɛfariw bolo minw ye cɛnnikɛbaga belebelew ye.

³⁷I bena jɛni tasuma kɔnɔ, i joli bena bɔn jamana kɔnɔ, mɔgɔ si hakili tena to i la tugu, bari ne Masaba kumana.»