Read dyu Ezekiyɛli ka kitabu 22 Bible Online

Ezekiyɛli ka kitabu 22 - dyu bible

Ezekiyɛli ka kitabu 22

¹Masaba kumana ne fɛ ko:

²«Adamaden, yala i tena mɔgɔfagadugu nin kiti wa? A ka kokolonw bɛɛ yir'a la,

³k'a fɔ ko ne Matigi, Masaba ko: Dugu min kɔnɔ mɔgɔw be mɔgɔw faga dugu kɔnɔ k'a kɛ a yɛrɛ halaki sababu ye, dugu min be joow dilan k'a yɛrɛ nɔgɔ, o ye e le ye.

⁴I ye mɔgɔ minw faga, i jalakira o kosɔn. I ye joo minw dilan, olu le y'i nɔgɔ. I y'a to i sii dɔgɔyara, i sera i sii daan ma. O la, ne b'i kɛ mafiɲɛyafɛn ye siya wɛrɛw cɛma, k'i kɛ lɔgɔbɔfɛn ye jamanaw bɛɛ fɛ.

⁵I dafɛjamanaw, ani yɔrɔjan taw bɛɛ bena yɛlɛ i ma, ele duguba tɔgɔ cɛnnin nin, koɲagaminin caaman b'i kɔnɔ!

⁶«Isirayɛli kuntigiw b'u ka sebagaya yira i kɔnɔ ka mɔgɔw faga.

⁷ Mɔgɔw b'u faaw n'u baaw dɔgɔya yen, ani ka ben lonanw kan, ka falatɔw ni firiyamusow tɔɲɔ.

⁸ I be ne ka sigiyɔrɔw mafiɲɛya ka ne ka lafiɲɛlonw cɛn.

⁹Galontigɛlaw b'i kɔnɔ, minw b'a kɛ mɔgɔw be ɲɔgɔn faga. I kɔnɔ mɔgɔw be josɔndumuni kɛ kuluw kan, ka kakalaya kɛ.

¹⁰ Dɔw be jɛn n'u faaw ka musow ye. Dɔw be jɛn ni musow ye fanga la u ka landa tuma na.

¹¹Ka jɛn n'a sigiɲɔgɔn muso ye, dɔw b'o kokuntan kɛ, dɔ wɛrɛw be jɛn n'a deen ka muso ye, o ye koo ɲagaminin ye. Dɔ wɛrɛ be la n'a balimamuso ye fanga la, ale ni min ye faa kelen ye.

¹² I kɔnɔ mɔgɔw be sɔn ka daa sanfɛn minɛ ka fagali kɛ. U be juru don ka tɔnɔjugu ɲini, u b'u sigiɲɔgɔn tɔɲɔ ka tɔnɔjugu sɔrɔ. U ɲinɛna ne kɔ. Ne Matigi, Masaba le ko ten.

¹³«Ayiwa, i ye tɔnɔjugu min sɔrɔ, ani ka mɔgɔw faga dugu nin kɔnɔ, ne bena n bolo ci ɲɔgɔn na o kosɔn.

¹⁴Ni ne nana i kama loon min na, i jaa tena tigɛ wa? I barika tena dɛsɛ wa? Ne Masaba kumana, ne ye min fɔ, ne bena o kɛ!

¹⁵«Ne bena i kɔnɔ mɔgɔw jɛnsɛ siya wɛrɛw cɛma k'u yɛrɛkɛ jamana wɛrɛw la, ne bena konɔgɔninw ban i kɔnɔ.

¹⁶I bena i yɛrɛ mafiɲɛya siya wɛrɛw ɲana. Nga i ben'a lɔn ko ne ye Masaba le ye.»

¹⁷Masaba kumana ne fɛ ko:

¹⁸«Adamaden, Isirayɛlidenw kɛra ne ɲana i n'a fɔ nigɛbo. U bɛɛ ye zira ye, ni nigɛfin, ani nigɛ sifa wɛrɛw ye. U kɛra warigwɛbo ye faan kɔnɔ.

¹⁹O le kosɔn, ne Matigi, Masaba ko: Aw bɛɛ kɛra i ko nigɛbo minkɛ, o la, ne bena aw ton Zeruzalɛmu dugu kɔnɔ.

²⁰Mɔgɔ be warigwɛ ni zira ni nigɛfin, ni nigɛ sifa wɛrɛw kɛ daga kɔnɔ ka faan fiyɛ k'u yelen cogo min na, ne dimininba bena aw ton dugu kɔnɔ k'aw yelen o cogo kelen la.

²¹Ne bena aw ton ne diminin bena tasuma fiyɛ aw kɔrɔ. Aw bena yelen dugu kɔnɔ.

²²Warigwɛ be yelen daga kɔnɔ cogo min na, aw bena yelen dugu kɔnɔ o cogo kelen na. Aw ben'a lɔn ko ne Masaba ye n dimi bɔ aw la.»

²³Masaba kumana ne fɛ tugu ko:

²⁴«Adamaden, a fɔ Zeruzalɛmu ye ko: I ye yɔrɔ nɔgɔnin ye, sanji tena ben o min kan dimi bɔlon na.

²⁵A ɲamɔgɔw be i n'a fɔ jara kɔngɔtɔ, min be sogo minɛna. U bɛnna ka mɔgɔw faga, ka mɔgɔw ka wari n'u bololafɛnw soɲa, ka firiyamusow caya dugu kɔnɔ.

²⁶ A sarakalasebagaw te ne ka sariya bato, u be ne ka sigiyɔrɔw nɔgɔ. U te fɛɛn senumanw faranfasi ka bɔ tɔw la. U te fɛɛn saniyanin ni fɛɛn nɔgɔninw faranfasi ka yira mɔgɔw la. U te ne ka lafiɲɛlonw bato, ne ka kan ni boɲa min ye, ne t'o sɔrɔ mɔgɔ si fɛ.

²⁷Dugu faamaw be i n'a fɔ wara min be sogo minɛna, u be mɔgɔw faga tɔnɔjugu kama.

²⁸A kiraw be yelifɛnkolonw ye ka galon tigɛ k'o koo nunu kɛbagaw sutara. U b'a fɔ ko: ‹Masaba y'a fɔ.› K'a sɔrɔ ne ma kuma.

²⁹Jamana kɔnɔ mɔgɔw be ben mɔgɔw kan ka soɲali kɛ, u be fantanw ni dɛsɛbagatɔw tɔɲɔ ka lonanw sɛgɛn, u t'u minɛ ni hɔrɔnya ye.

³⁰Ne ye mɔgɔ ɲini u cɛma min tun be sɔn ka kogo lalaga, walima ka lɔ kogo cɛnyɔrɔw la ka jamana tanga, janko ne kan'a halaki, nga ne ma mɔgɔ si sɔrɔ.

³¹O la, ne Matigi, Masaba ko: ‹Ne bena n dimi bɔ u la kosɔbɛ, ne dusu gwannin bena u halaki. Ne bena u sara u ka kɛwaliw kosɔn.› »