Read dyu Ezekiyɛli ka kitabu 24 Bible Online

Ezekiyɛli ka kitabu 24 - dyu bible

Ezekiyɛli ka kitabu 24

¹Saan kɔnɔntɔnnan kalo tannan tile tannan loon, Masaba kumana ne fɛ ko:

² «Adamaden, loon nin sɛbɛn, bari Babilɔni masacɛ y'a daminɛ ka Zeruzalɛmu kɛlɛ bii yɛrɛ.

³«I ka talen la soo murutinin nin ye k'a fɔ u ye ko ne Matigi, Masaba ko: ‹Daga sigi tasuma kan, a sigi ka jii kɛ a kɔnɔ.

⁴Sogo tigɛninw bila a kɔnɔ, a yɔrɔɲumanw bɛɛ kɛ a kɔnɔ: woto n'a ɲafɛsenw. A fa koloɲumanw na.

⁵I ka begɛnw bɛɛ la ɲumanw sogo ta ka lɔgɔ don daga nin jukɔrɔ. I k'a barabara kosɔbɛ fɔɔ k'a kolow mɔn.›

⁶Ne Matigi, Masaba ko: ‹Bɔnɛ be mɔgɔfagadugu ye, min be i ko nigɛdaga sonnin min te se ka saniya! Sogo nunu bɛɛ bɔ a kɔnɔ kelen kelen, kana kala la u si koo la.

⁷Bari a ye mɔgɔ minw faga, olu joli b'a kɔnɔ. A y'a bɔn farakolokolon kan, a m'a bɔn duguma k'o datugu ni buguri ye.

⁸Ne y'a joli to farakolokolon kan, a tena datugu yɔrɔ min na, janko a ka to ka ne dusu gwan, ne ka ne mɔnɛ bɔ o la.›

⁹Ɔnhɔn, ne Matigi, Masaba ko: ‹Bɔnɛ be mɔgɔfagadugu nin ye! Ne yɛrɛ ben'a jɛnilɔgɔ ton k'a caya kosɔbɛ.

¹⁰Lɔgɔ kɛ a la ka tasuma boɲa. Sogo tobi k'a mɔn ka nanfɛnw kɛ a la k'a kolow jɛni.

¹¹O kɔ, i ka dagalakolon sigi takami kan, a ka gwan ka wulen, janko a nɔgɔ ka bɔ a la, ani soon min b'a la, o ka ban.›

¹²«Koo bɛɛ kɛra ka dɛsɛ, a soon tena bɔ a la, hali tasuma na.

¹³Zeruzalɛmu, i ka kakalaya y'i nɔgɔ. Ne tun b'a fɛ k'i saniya, nga i ma sɔn. O la, i tena se ka saniya fɔɔ ni ne ye n dimi bɔ i la pewu tuma min na.

¹⁴Ne Masaba kumana, o bɛɛ bena kɛ. Ne bena o kɛ. Ne tena siga, ne tena makari, ne tena o dabila. Kiti bena tigɛ i kan ka kɛɲɛ n'i taamacogo n'i ka kɛwaliw ye. Ne Matigi, Masaba le ko ten.»

¹⁵Masaba kumana ne fɛ ko:

¹⁶«Adamaden, ne bena i diyanafɛn bɔsi i la yɔrɔnin kelen. Nga i kan'a suu kasi, i kana kule, i kana ɲaji bɔ.

¹⁷I k'i ka dusukasi muɲu, i kan'a suu kasi. I k'i ka fani meleke i kuun na, k'i ka sanbara don. Kana i ɲada datugu, kana sangadumuni kɛ.» [1]

¹⁸Ne kumana jama fɛ sɔgɔmadafɛ, o loon kelen wuladafɛ, ne muso sara. O dugusagwɛ sɔgɔma, Masaba tun ye min fɔ ne ye, ne y'o kɛ.

¹⁹Jama ye ne ɲininga ko: «I be min kɛra, i t'o kɔrɔ fɔ an ye wa?»

²⁰Ne y'u jaabi ko: «Masaba kumana ne fɛ ko

²¹ne k'a ka kuma nin lase Isirayɛlidenw ma ko ale Matigi, Masaba ben'a ka sigiyɔrɔ nɔgɔ, aw ka nisɔndiya sababu, min koo ka di aw ye. Aw jigi layɔrɔ lo. Aw ye aw dencɛw n'aw denmuso minw to Zeruzalɛmu, olu bena faga ni murujan ye.

²²Ayiwa, aw ben'a kɛ i n'a fɔ ne y'a kɛ cogo min na. Aw tena aw ɲada datugu, aw tena sangadumuni kɛ.

²³Aw bena aw ka fani melekenin to aw kuun na, ka sanbaraw to aw seen na. Aw tena suu kasi, aw tena kasi. Aw bena fasa aw ka kojuguw kosɔn, aw bena ŋunan aw balimaw kosɔn.

²⁴«Ezekiyɛli ye min kɛ, o bena kɛ taamasiɲɛ ye aw fɛ. Aw bena o ɲɔgɔn kɛ. N'o kɛra tuma min na, aw ben'a lɔn ko ne ye Matigi, Masaba le ye.

²⁵Adamaden, ni ne y'u ka yɔrɔ barikaman, n'u ka nisɔndiya sababu, n'u ka nɔɔrɔ, n'u diyanafɛn bɔsi u la, o min koo b'u dusu la, ani k'u dencɛw n'u denmusow bɔsi u la loon min na,

²⁶o loon na, mɔgɔ kisinin dɔ bena boli ka na kibaru nin fɔ i ye.

²⁷O loon na, i daa bena foni, i bena kuma o tigi fɛ, i tena kɛ bobo ye tugu. O la, i ka koo bena kɛ taamasiɲɛ ye ne ka jama fɛ, u ben'a lɔn ko ne ye Masaba le ye.»