Read dyu Ezekiyɛli ka kitabu 26 Bible Online

Ezekiyɛli ka kitabu 26 - dyu bible

Ezekiyɛli ka kitabu 26

¹ Jɔnya saan tan ni kelennan kalo tile fɔlɔ loon, Masaba kumana ne fɛ ko:

²«Adamaden, Tirikaw y'a fɔ Zeruzalɛmu koo la ko: ‹Aha! Mɔgɔ bɛɛ tun be tɛmɛna dugu min na, o cɛnna! Anw le ben'a nɔɔ ta. An bena nafoloba sɔrɔ, Zeruzalɛmu cɛnna.›

³O kama, ne Matigi, Masaba ko: Tiri dugu, ne bena na i kama. Ne ben'a kɛ siya caaman be wili i kama i n'a fɔ kɔgɔji jikuruw be wili cogo min na.

⁴Olu bena Tiri laminikogow cɛn k'a sangasojanw ci. Ne ben'a buguri bɛɛ furan ka bɔ yen fɔɔ ka se fara ma.

⁵A bena kɛ mɔnikɛlaw ka jɔɔ layɔrɔ ye kɔgɔji daa la. Ne Matigi, Masaba le y'o fɔ. Siya wɛrɛw ben'a kɔnɔnafɛnw minɛ.

⁶Tiri gɛrɛfɛdugu minw be kongo kɔnɔ, olu kɔnɔ mɔgɔw bena faga ni murujan ye. O tuma na, u ben'a lɔn ko ne ye Masaba le ye.

⁷«Ne Matigi, Masaba ko: Babilɔni masacɛ Nabukodonozɔri, o min ye masacɛw ka masacɛ ye, ne ben'a kɛ ale be na Tiri kama ka bɔ kɔgɔdugu ɲafan fɛ ni soow, ni kɛlɛkɛwotorow, ni sotigiw, ani kɛlɛden caaman ye.

⁸A bena Tiri gɛrɛfɛduguw kɔnɔ mɔgɔw faga ni murujan ye. O kɔ, a ka kɛlɛdenw bena dogoyɔrɔ labɛn, ka kɛlɛkɛyɔrɔw lɔ i kama, ka nigɛkunbɛnnanw wili i kama.

⁹U bena aw ka kogow gosi n'u ka kogocimansinw ye k'aw ka sangasow ci n'u ka jendew ye.

¹⁰U ka soow bena caya fɔɔ ka gwangwan wili k'i datugu. Sotigiw ni wotorow dontɔ i kɔnɔ, o mankan bena kogow yɛrɛyɛrɛ. U bena don ni dugu donda ye i n'a fɔ dugu min laminikogo sɔgɔra.

¹¹U ka soow bena i bɔlɔnw bɛɛ dɔndɔn. U bena i ka mɔgɔw faga ni murujan ye. U bena i ka tutunan barikamanw ben duguma. [1]

¹²U bena i ka nafolo bɛɛ cɛ k'i laminikogo n'i ka dakamanasow ci. U bena i ka kabakuruw n'i ka lɔgɔw, an'i ka buguriw cɛ k'o fili kɔgɔji la.

¹³ Ne ben'a kɛ dɔnkiliw te la i kɔnɔ tugu, gɔni fɔkan tena mɛn i kɔnɔ tugu.

¹⁴Ne bena i kɛ farakuru ye, i bena kɛ mɔnikɛlaw ka jɔɔ layɔrɔ ye. I tena lɔ tugu bari ne Masaba kumana. Ne Matigi, Masaba le ko ten.

¹⁵«Ayiwa, ne Matigi, Masaba b'a fɔ Tirikaw ye ko: Ni mɔgɔ mandimininw be ŋunanna, ni mɔgɔw be fagara i kɔnɔ tuma min na, jii cɛma dugukolow tena yɛrɛyɛrɛ i benkan kosɔn wa?

¹⁶ Kɔgɔjida la masacɛw bɛɛ bena jigi ka bɔ u ka masasigilanw kan k'u ka delekebabaw bɔ u kaan na k'u ka fani kaan sɔgɔninw bɔ. Siranya bena u minɛ. U bena sigi duguma, ka to ka yɛrɛyɛrɛ. U bena kabakoya i koo la.

¹⁷U bena dusukasidɔnkili la i koo la ko: ‹E min kɔnɔ mɔgɔw tun bɔra jida maraw la, n'i tɔgɔ bɔnin tun lo, a kɛra di i tununa? E n'i kɔnɔ mɔgɔw fanga tun ka bon kɔgɔji kan taama na. I tun be siranya bila mɔgɔw la yɔrɔ bɛɛ.

¹⁸Sisan, jii cɛma dugukolow yɛrɛyɛrɛla i halakilon na, kɔgɔji cɛma dugukolow kan mɔgɔw jaa tigɛnin lo i benko kama.›

¹⁹«Ne Matigi, Masaba ko: Ni ne y'i kɛ dugulakolon ye, k'i kɛ i n'a fɔ mɔgɔ te dugu min kɔnɔ, ni ne y'a kɛ kɔgɔji be wili k'i datugu ni jii caaman ye k'i tunu tuma min na,

²⁰o tuma na, ne bena i fili lahara, fɔlɔfɔlɔ mɔgɔw cɛma. Ne bena i bila fɔɔ dugukolo jukɔrɔ, o yɔrɔ min be i n'a fɔ tomo tuma bɛɛ, lahara mɔgɔw cɛma. Mɔgɔ si tena sigi i kɔnɔ tugu. Ne bena boɲa la diɲɛ kan.

²¹ Ne bena i kɛ siranyafɛn ye. I bena halaki pewu. Mɔgɔw bena i yɔrɔ ɲini, nga i tena ye tugu abada. Ne Matigi, Masaba le ko ten.»