Read dyu Ezekiyɛli ka kitabu 27 Bible Online

Ezekiyɛli ka kitabu 27 - dyu bible

Ezekiyɛli ka kitabu 27

¹Masaba kumana ne fɛ ko:

²«Adamaden, i ka dusukasidɔnkili la Tiri dugu kosɔn.

³A fɔ Tiri ye ko: Ne Matigi, Masaba ko: E min siginin be kɔgɔjida la, e min be jago kɛ ni mɔgɔw ye dugukolo caaman kan, jii cɛma, e Tiri, i y'a fɔ ko i ka ɲi haali.

⁴I ka mara daan be fɔɔ kɔgɔji cɛma i ko kurun. I sigibagaw y'i cɛɲa haali.

⁵U ye Seniri kulu [1] sipɛrɛyiri dɔw tigɛ k'i dilan n'o lɔgɔw ye. U ye Liban yiriba dɔ tigɛ k'o kɛ i ka kurunfani sirifɛn ye.

⁶U y'i ka jifasananw dilan ni *Basan mara joyiribabaw ye, u y'i kɔnɔna yɔrɔ dilan ni sipɛrɛyiriw ye ka bɔ Sipɔrɔ dugukolo kan, jii cɛma, ka samaɲin dondon u la.

⁷Ezipiti fani ɲanaman tun ye i ka kurunfani ye, ka kɛ i ka darapo ye. Fani minw tun birinin be i ka minanw sanfɛ, o tun ye fani bulaman ni wuleman ye ka bɔ Elisa dugukolo kan, jii cɛma.

⁸Sidɔnkaw ni Aribadikaw tun ye i ka kurunbolilaw ye. E Tiri, i yɛrɛ ka setigiw tun ye i ka kurunɲatilenbagaw ye.

⁹Gebali [2] cɛkɔrɔba baaralɔnbagaw tun ye i ka kurun lalagabagaw ye. Kɔgɔji kan kurunw bɛɛ n'u kɔnɔ baarakɛlaw tun be na i fɛ k'u ka jagofɛnw falen.

¹⁰Pɛrɛsiw ni Ludikaw ni Putikaw tun ye i ka kɛlɛdenw ye, U y'u ka nigɛkunbɛnnanw n'u ka nigɛfugulanw dulon i kɔnɔ, k'a kɛ i tɔgɔ bɔra.

¹¹Aribadikaw n'i yɛrɛ ka kɛlɛdenw tun b'i laminikogo kan. Gamadikaw tun b'i ka sangasow kɔnɔ. U y'u ka nigɛkunbɛnnanw dulon i laminikogo la, u y'i ka cɛɲa dafa.

¹²«Tarisisikaw tun be jago kɛ n'i ye, bari fɛɛn sifa caaman tun b'i fɛ. U tun be warigwɛ ni nigɛ sifa caaman falen i ka jagofɛnw na.

¹³Yabankaw ni Tubalikaw ani Mɛsɛkikaw tun be jago kɛ n'i ye ka jɔɔnw ni ziraminanw falen i ka jagofɛnw na.

¹⁴Bɛtitogarimakaw tun be sɛnɛkɛsow ni kɛlɛkɛsow, ani sofaliw falen i ka jagofɛnw na.

¹⁵Dedankaw ni dugukolo caaman kan mɔgɔw, jii cɛma, tun be jago kɛ n'i ye. Olu tun b'i ka jagofɛnw san ni samaɲin, ni yiri gwɛlɛmanw ye.

¹⁶Sirikaw tun be fɛɛn caaman falen i fɛ, ka dɔw falen kabakuru binkɛnɛmanw na, ni fani wulemanw, ni fani ɲanaman wɛrɛw, ni kolonkisɛ, ani kabakuru wulemanw.

¹⁷Zuda ni Isirayɛli mara mɔgɔw fana tun be jago kɛ n'i ye ka suman dɔ falen ka bɔ Miniti, ni ɲɔɔn, ani lii, ni tulu, ani fɛɛn kasadiman sifa dɔ.

¹⁸Damasikaw tun be jago kɛ n'i ye ka Ɛlibɔn duvɛn ni Saari sagasi falen i ka jagofɛn caaman na an'i ka fɛnɲuman sifaw bɛɛ la.

¹⁹Wedankaw ni Yabankaw ka bɔ Uzali mara la, olu tun be taga ni nigɛw ye minw tun baarala, ani kanɛlifara kasadiman, ni kala kasadiman sifa dɔ ye k'u falen i ka jagofɛnw na.

²⁰Dedankaw tun be taga ni soow ka birifaniw ye i fɛ.

²¹Arabu jamana mɔgɔw ni Kedari mara ɲamɔgɔw bɛɛ tun be sanni kɛ i fɛ. U tun be taga ni sagadenw ni sagajigiw, ani bakɔrɔninw ye k'u feere i fɛ yen.

²²Saba ni Arayema jagokɛlaw tun be taga i fɛ ni fɛɛn kasadiman sifaw bɛɛ ɲanamanw ye, ani kabakuru sɔngɔgwɛlɛn sifa bɛɛ, ni sanu, k'u falen i ka jagofɛnw na.

²³Aran ni Kane ani Edɛn duguw, ani Saba ni Asiri ni Kilimadi jagokɛlaw tun be jago kɛ n'i ye.

²⁴U tun be taga i ka lɔgɔ la ni dakamanafaniw ye, ni faniwulenw, ni fani ɲanamanw, ani fani ɲɛgɛɲɛgɛninw, ani juru minw danna ka ɲa.

²⁵ «Kurunbabaw tun be to ka i ka jagofɛnw ta. I tun fanin be jagofɛn gwilimanw na i ko kurun, kɔgɔji cɛma.

²⁶I ka kurunbolibagaw tagara n'i ye kɔgɔji kan. Fɔɲɔ bɔra kɔrɔn fɛ k'i cɛn kɔgɔji cɛma.

²⁷I ka nafolow n'i ka jagofɛnw bɛɛ, i ka kurun kɔnɔ baarakɛlaw n'i ka kurunbolilaw, ani kurun lalagabagaw, n'i ka jagokɛlaw, an'i ka kɛlɛdenw bɛɛ, ni mɔgɔ tɔw bɛɛ, minw b'i kɔnɔ, olu bɛɛ bena ben kɔgɔji kɔnɔ i halakilon na.

²⁸I ka kurunbolilaw kulekan ben'a kɛ jidaw bena yɛrɛyɛrɛ.

²⁹Kurunbolibagaw bɛɛ bena bɔ kurun kɔnɔ, kurun kɔnɔ baarakɛlaw ni kurunbolilaw bɛɛ bena taga lɔ jida la.

³⁰U bena kule ka kasi kosɔbɛ i kosɔn. U bena buguri seriseri u kuun na ka kolonkolon bugurigwɛ la.

³¹U bena u kuun li ka dusukasifani don i kosɔn. U nii tɔɔrɔnin bena kasi e kosɔn, u dusukasininba bena kasi i kosɔn.

³²U nii tɔɔrɔnin bena dusukasidɔnkili la i kosɔn. K'u to dusukasi la, u bena dɔnkili la k'a fɔ ko: ‹Tiri, dugu barikaman min tun be kɔgɔjida la, o bɔɲɔgɔn be min?

³³U tun be taga n'i ka jagofɛnw ye kɔgɔji kan tuma min na, i ye jamana caaman mako ɲa. I ye dugukolo kan masacɛw kɛ nafolotigiw ye n'i ka nafoloba an'i ka jagofɛnw ye.

³⁴Ayiwa, i cɛnnin filɛ kɔgɔji kɔnɔ sisan sa, i jigira fɔɔ jii jukɔrɔ. I ka jagofɛnw n'i kɔnɔ baarakɛlaw bɛɛ jigira n'i ye.

³⁵Jii cɛma dugukolo kan mɔgɔw bɛɛ kabakoyara i koo la. U ka masacɛw be yɛrɛyɛrɛ jatigɛ fɛ, u ɲada cogo yɛlɛmana siranya fɛ.

³⁶Siya wɛrɛ jagokɛlaw b'i cuurula. I kɛra siranyafɛn ye, i halakira pepewu.› »