Read dyu Ezekiyɛli ka kitabu 28 Bible Online

Ezekiyɛli ka kitabu 28 - dyu bible

Ezekiyɛli ka kitabu 28

¹Masaba kumana ne fɛ ko:

²«Adamaden, a fɔ Tiri dugu ɲamɔgɔ ye ko ne Matigi, Masaba ko: Yɛrɛboɲa kosɔn, a ko ale ye batofɛn ye, ko a siginin be batofɛn sigilan kan kɔgɔji cɛma. K'a sɔrɔ adamaden lo, batofɛn tɛ, hali n'a b'a yɛrɛ suma ni batofɛn ye.

³Ko a be miiri ko a hakili ka di ni Danɛli ta ye, ko fɛɛn si dogonin t'a la.

⁴Ko a ye nafolo sɔrɔ a ka hakilitigiya n'a ka lɔnniya barika la, ani ka sanu ni warigwɛ mara a ka nafolo marayɔrɔw la.

⁵Ko a ka cekuya kosɔn, a ka nafolo cayara a ka jago sababu la. Ko a b'a yɛrɛ boɲa a ka nafoloba kosɔn.

⁶O kama, ne Matigi, Masaba ko: A b'a yɛrɛ suma ni batofɛn ye minkɛ,

⁷o la, ne ben'a kɛ siya wɛrɛ be na a kama, min ka fari ni siya tɔw bɛɛ ye. A ye baara kɛ ni hakilitigiya ye ka fɛnɲuman minw sɔrɔ, u bena u ka murujanjanw bɔ, k'o cɛn.

⁸Ko u ben'a kɛ a be taga lahara, a bena sa cogojugu la kɔgɔji cɛma.

⁹K'o tuma na, a ben'a fɔ a fagabaga ɲana ko ale ye batofɛn ye wa? K'a sɔrɔ adamaden lo, batofɛn tɛ, k'a to a fagabagaw bolo.

¹⁰A bena sa maloya la siya wɛrɛ mɔgɔw bolo Alalɔnbali sacogo la. Ne Matigi, Masaba le ko ten.»

¹¹Masaba kumana ne fɛ tugu ko:

¹²«Adamaden, i ka dusukasidɔnkili la Tiri masacɛ koo la k'a fɔ a ye ko ne Matigi, Masaba ko: ‹I tun dafanin lo, hakili tun b'i fɛ kosɔbɛ. I fana cɛɛ ka ɲi haali.

¹³I tun be Edɛn, ne ka yɔrɔɲuman na. Kabakuru sɔngɔgwɛlɛn sifa bɛɛ tun kɛra i ka masirifɛnw ye: kabakuru wuleman, ni nɛrɛmuguman, ni diyaman, ni kabakuru binkɛnɛmanw, ni kɔlɔbolaman, ni kabakuru bulamanw. Sanu min tun kɛra ka dundunw ni filenw lalaga, o dilanna i danlon na.

¹⁴I tun ye *serubɛn manamananin ye min be kɔlɔsili kɛ, bari ne y'i bila o la. I tun be ne ka kulu kan. I tun be taama kabakuru mananinw cɛma.

¹⁵Jalakiyɔrɔ si tun t'i la kabini i danlon na fɔɔ tilenbaliya yera i ka koow la tuma min na.

¹⁶I ka jago barika boɲana minkɛ, benkanniko donna i dusu la fɔɔ i ye kojugu kɛ. O kama, ne y'i gwɛn k'i bɔ ne ka kulu kan, e min tun ye serubɛn kɔlɔsilikɛbaga ye. Ne y'i gwɛn k'i bɔ kabakuru mananinw cɛma.

¹⁷I y'i yɛrɛ boɲa i ka cɛɲa kama. I ka lɔnniya ɲagamina i ka dawula kosɔn. O la, ne y'i fili fɔɔ dugukolo kan, ne y'i kɛ filɛlifɛn ye masacɛw fɛ.

¹⁸I y'i ka batolikɛyɔrɔw nɔgɔ i ka kojugu caaman n'i ka namara kosɔn, jago tuma na. O la, ne y'a to tasuma bɔra k'i jɛni, ne y'i kɛ bugurigwɛ ye duguma i filɛbagaw bɛɛ ɲana.

¹⁹Siya minw bɛɛ b'i lɔn, olu kabakoyara i koo la. I kɛra siranyafɛn ye. I bena halaki pewu.› »

²⁰Masaba kumana ne fɛ ko:

²¹ «Adamaden, i ɲaa sin Sidɔn ma ka kiraya kɛ a kama.

²²A fɔ ko ne Matigi, Masaba ko: Sidɔn, ne be nana i kama. Ne bena boɲa sɔrɔ i kɔnɔ. Ni ne y'i kɔnɔ mɔgɔw ɲaa gwan k'a yira ko ne ɲɔgɔn te tuma min na, u ben'a lɔn ko ne ye Masaba le ye.

²³Ne bena fɔɲɔbana bila u cɛma k'a kɛ joli be woyo dugu bɔlɔnw kɔnɔ. U bena wili u kama ni murujan ye faan bɛɛ la, u caaman bena faga dugu kɔnɔ. O tuma na, u ben'a lɔn ko ne ye Masaba le ye.

²⁴«Isirayɛli jama laminimɔgɔw tena u mafiɲɛya tugu, ka kɛ ŋɔni ye tugu k'u siɲɛ, walima k'u sɔgɔ. O tuma na, u ben'a lɔn ko ne ye Matigi, Masaba le ye.»

²⁵Matigi, Masaba ko: «Isirayɛli jama jɛnsɛnna siya minw cɛma, ni ne y'u lajɛn ka bɔ olu cɛma tuma min na, ne ben'a yira siya nunu na Isirayɛlidenw seen fɛ ko ne ɲɔgɔn tɛ. Ne ye jamana min di n ka jɔncɛ Yakuba ma, n'o ye u faso ye, u bena sigi o kɔnɔ.

²⁶U bena sigi yen hɛrɛ la, ka soow lɔ ka *ɛrɛzɛnforow bɔ. U bena sigi hɛrɛ la, ne bena u laminimɔgɔw bɛɛ ɲaa gwan minw tun y'u mafiɲɛya. O tuma na, u ben'a lɔn ko ne ye Masaba ye, u ka Ala.»