Read dyu Ezekiyɛli ka kitabu 30 Bible Online

Ezekiyɛli ka kitabu 30 - dyu bible

Ezekiyɛli ka kitabu 30

¹Masaba kumana ne fɛ ko:

²«Adamaden, kirayakuma fɔ ko Matigi, Masaba ko: ‹Aw ka kasi k'a fɔ ko: Bɔnɛ bena se aw ma o loon na.

³O loon surunyana, ɔnhɔn, Masaba ka loon surunyana. A bena kɛ dibiba loon ye, siyaw ka kitilon.

⁴Murujan bena cɛnni kɛ Ezipiti, Etiyopikaw jaa bena tigɛ. Ezipitikaw bena faga, u ka nafolow bena cɛ, u ka jamana bena halaki.

⁵Kɛlɛden minw be bɔ Etiyopi ni Puti, ni Ludi ani Arabu jamanaw bɛɛ, ni Libi jamana na, ani ne yɛrɛ ka jamana, olu ni Ezipitikaw bena faga ɲɔgɔn fɛ ni murujan ye.› »

⁶Ayiwa, Masaba ko: «Ezipiti dɛmɛbagaw bena faga, a b'a yɛrɛ boɲa a ka barika min kosɔn, o bena ban. U ben'u faga ni murujan ye ka bɔ Migidɔli fɔɔ ka taga se Asuwani. Ne Matigi, Masaba le ko ten.

⁷Ezipiti bena kɛ yɔrɔlakolon ye. A ka duguw bena kɛ tomow ye ka tɛmɛ dugu halakinin wɛrɛw kan.

⁸Ɔnhɔn, ni ne ye tasuma don Ezipiti jamana na k'a ka dɛmɛbagaw bɛɛ halaki, o tuma na, u ben'a lɔn ko ne ye Masaba le ye.

⁹«O loon na, ne ka cidenw bena don kurunw kɔnɔ ka taga siranya bila Etiyopikaw la minw be lafiya la. U jaa bena tigɛ Ezipiti ka halakilon na. Siga t'a la, o loon bena se.»

¹⁰Matigi, Masaba ko: «Ne bena Ezipitikaw don Babilɔni masacɛ Nabukodonozɔri bolo, o jamaba nin, k'u bɛɛ halaki.

¹¹Ale n'a ka kɛlɛdenw bena na Ezipiti cɛn. U ka fari ni siya tɔw bɛɛ ye. U bena u ka murujanjanw bɔ Ezipitikaw kama ka jamana bɛɛ fa ni suuw ye.

¹²Ne ben'a kɛ Nili baji be ja k'u ka jamana don mɔgɔjuguw bolo. Ne ben'a kɛ lonanw be jamana n'a kɔnɔnafɛnw bɛɛ cɛn. Ne Masaba le ko ten.»

¹³Matigi, Masaba y'a fɔ tugu ko: «Ne bena u ka joow cɛn ka Manfisi batofɛnkolonw cɛn. Ɲamɔgɔ si tena sɔrɔ Ezipiti jamana kɔnɔ tugu. Ne bena siranya bila yɔrɔ bɛɛ jamana kɔnɔ.

¹⁴Ne bena Ezipiti worodugu faan fɛ mara cɛn, ka *Tanisi jɛni, ka Tɛbɛkaw ɲaa gwan u ka kojugu kosɔn.

¹⁵Ne bena n dimi bɔ Ezipiti ka dugu barikaman na, n'o ye Sin ye. Ne bena Tɛbɛ jama bɛɛ halaki.

¹⁶Ne bena tasuma don Ezipiti la, Sinkaw bena to k'u yɛrɛ tɔrɔmi dimi bolo. Tɛbɛ laminikogo bena sɔgɔ, juguw bena Manfisi minɛ.

¹⁷Onɛ ni Pibɛzɛti kanbelenw bena faga ni murujan ye. U kɔnɔ mɔgɔw bena minɛ ka taga jɔnya la.

¹⁸Ezipiti b'a yɛrɛ boɲa a ka barika min kosɔn, loon min na ne bena o ban, tile bena dibi Tapenɛ kɔnɔ. Jamana yɔrɔw bɛɛ bena dibi. A ka dugu kɔnɔ mɔgɔw bena minɛ ka taga jɔnya la.

¹⁹Ne bena Ezipiti jamana ɲaa gwan a ka kojugu kosɔn. O tuma na, u ben'a lɔn ko ne ye Masaba le ye.»

²⁰Isirayɛlidenw minɛnin kɔ ka taga jamana wɛrɛ la, o saan tan ni kelennan kalo fɔlɔ tile wolonwulanan loon, Masaba kumana ne fɛ ko:

²¹«Adamaden, ne ye Ezipiti masacɛ bolo kari. U m'a siri janko a ka kɛnɛya, u m'a tugu janko a ka barika sɔrɔ ka se ka murujan minɛ.

²²O la, ne Matigi, Masaba ko: ‹Ne bena wili Ezipiti masacɛ kama. Ne ben'a bolo fila bɛɛ kari, boloɲuman fara karinin kan. Ne ben'a kɛ a ka murujan be bɔ a bolo ka ben.

²³Ne bena Ezipitikaw jɛnsɛn siya wɛrɛw cɛma, k'u yɛrɛkɛ jamana wɛrɛw la.

²⁴Ne bena barika don Babilɔni masacɛ bolo la ka ne ka murujan don a bolo. Ne bena Ezipiti masacɛ bolow kari, a bena ŋunan i n'a fɔ mɔgɔ mandiminin min be ɲini ka sa.

²⁵Ne bena barika don Babilɔni masacɛ bolo la, Ezipiti masacɛ bolo bena dɛsɛ. Ni ne ye ne ka murujan don Babilɔni masacɛ bolo, n'a y'a wili Ezipiti jamana kama tuma min na, o tuma na, u ben'a lɔn ko ne ye Masaba le ye.

²⁶Ne bena Ezipitikaw jɛnsɛn siya wɛrɛw cɛma, k'u yɛrɛkɛ jamana wɛrɛw la. O tuma na, u ben'a lɔn ko ne ye Masaba le ye.› »