Read dyu Ezekiyɛli ka kitabu 32 Bible Online

Ezekiyɛli ka kitabu 32 - dyu bible

Ezekiyɛli ka kitabu 32

¹Isirayɛlidenw minɛnin kɔ ka taga jamana wɛrɛ la, o saan tan ni filanan kalo tan ni filanan tile fɔlɔ loon, Masaba kumana ne fɛ ko:

²«Adamaden, dusukasidɔnkili la Ezipiti masacɛ kosɔn k'a fɔ a ye ko: ‹E tun be i ko jara, siyaw cɛma. I tun be i ko banba. I tun be firinfirin i ka bajiw kɔnɔ, i seenw tun be jii ɲagami k'a duuru.› »

³Matigi, Masaba ko: «Siya caaman bena ɲɔgɔn lajɛn tuma min na, ne bena n ka jɔɔ fili i kan. Olu bena i sama ka bɔ jii la ni ne ka jɔɔ nin ye.

⁴Ne bena i fili dugukolo kan, k'i fili kongo kɔnɔ. Ne ben'a to kɔnɔw bɛɛ be sigi i kan, waraw bɛɛ bena i ɲimi ka fa.

⁵Ne bena i faribugu lala kuluw kan, ne bena kulu furancɛw datugu n'i tɔɔ ye.

⁶Ne bena dugukolo ɲigi n'i joli ye min bena woyo kuluw kan. Kɔdingɛw bena fa o la.

⁷ Ni ne y'i ka ɲanamaya ban tuma min na, ne bena sankolo datugu k'a kɛ lolow te manamana tugu. Ne bena tile datugu ni sankaba ye, kalo tena yeelen bɔ.

⁸Ne bena sanfɛ yeelenbɔlanw bɛɛ kɛ dibi ye e kosɔn, ne bena i ka jamana kɛ dibi ye. Ne Matigi, Masaba le ko ten.

⁹Siya caaman hakili bena ɲagami tuma min na ne bena i halakiko fɔ siyaw cɛma, jamanaw na i te minw lɔn.

¹⁰Ne bena min kɛ i la, o bena u kabakoya haali. Ni ne ye n ka murujan fifa u ɲakɔrɔ tuma min na, u ka masacɛw bena yɛrɛyɛrɛ jatigɛ bolo i kosɔn. I benlon na, u bɛɛ bena to ka yɛrɛyɛrɛ ka jɔɔrɔ u yɛrɛ nii la.»

¹¹Matigi, Masaba ko: «Babilɔni masacɛ ka murujan bena wili i kama.

¹²Ne ben'a kɛ i ka jama be sa kɛlɛdenw ka murujan fɛ, minw ka fari ni siya tɔ bɛɛ taw ye. U bena Ezipiti ka yɛrɛboɲa ban, k'a jama bɛɛ faga.

¹³Ne ben'a ka begɛnw bɛɛ faga a ka jiba daa la. A ka jii si tena ɲagami tugu mɔgɔ seenw fɛ. O tena duuru tugu begɛn seenw fɛ.

¹⁴O tuma na, ne ben'a to Ezipiti jiiw be ɲamalɔ, ka woyo i ko tulu. Ne Matigi, Masaba le ko ten.

¹⁵Ni ne ye Ezipiti kɛ yɔrɔkolon ye, ni n ye jamana kɔnɔ fɛɛnw bɛɛ cɛ ka bɔ yen, ni n y'a kɔnɔ mɔgɔw bɛɛ faga tuma min na, o tuma na, u ben'a lɔn ko ne ye Masaba le ye.

¹⁶«Dusukasidɔnkili min bena la, o filɛ nin ye. Siya musow bena o dɔnkili nin la Ezipiti n'a kɔnɔ mɔgɔ bɛɛ kosɔn. Ne Matigi, Masaba le ko ten.»

¹⁷Isirayɛlidenw minɛnin kɔ ka taga jamana wɛrɛ la, o saan tan ni filanan kalo tile tan ni duurunan loon, Masaba kumana ne fɛ ko:

¹⁸«Adamaden, kasi Ezipiti jama kosɔn. A mɔgɔw ni siya barikamanw bila ka jigi lahara, u ka fara o yɔrɔ mɔgɔw kan.

¹⁹A fɔ u ye ko: ‹Aw ka fisa ni siya wɛrɛw ye wa? Aw ka jigi ka la ni kɛnɛkɛnɛbaliw ye dugukolo jukɔrɔ, lahara.›

²⁰«Mɔgɔ minw fagara ni murujan ye, u bena ben ni olu ye. Murujanw bɔra forokow la. U ka Ezipiti n'a kɔnɔ jama bɛɛ faga.

²¹K'u to lahara, kɛlɛdenŋanaw n'u dɛmɛbagaw bena kuma Ezipitikaw fɛ. Alalɔnbali minw fagara ni murujan ye, o mɔgɔ nunu jigira, u lanin be kaburu kɔnɔ.

²²«Asiri masacɛ be yen n'a ka kɛlɛdenw bɛɛ. A lamininin be n'a ka kɛlɛdenw kaburuw ye, minw bɛɛ fagara ni murujan ye.

²³U kaburuw be fɔɔ dugukolo jukɔrɔ, a ka kɛlɛdenw lanin be k'o kaburu lamini. Mɔgɔ minw bɛɛ tun ye mɔgɔw jaa tigɛ diɲɛ na, olu bɛɛ fagara ni murujan ye.

²⁴«Elamu masacɛ be yen. A kaburu lamininin be n'a ka kɛlɛden bɛɛ taw ye. U bɛɛ fagara ni murujan ye. O mɔgɔ minw tun ye mɔgɔw jaa tigɛ diɲɛ na, o Alalɔnbaliw jigira dugukolo jukɔrɔ. U sɔnna u ka maloya ma ni lahara mɔgɔ tɔw ye.

²⁵Layɔrɔ dira Elamu masacɛ ma suuw cɛma, a lamininin be n'a ka kɛlɛden bɛɛ kaburuw ye. Mɔgɔ nunu bɛɛ ye Alalɔnbaliw ye, u bɛɛ fagara ni murujan ye. Minw tun be mɔgɔw jaa tigɛ diɲɛ na, u sɔnna u ka maloya ma ni lahara mɔgɔ tɔw ye.

²⁶«Mɛsɛki ni Tubali masacɛw be yen. U kaburuw lamininin be n'u ka kɛlɛden bɛɛ kaburuw ye. U bɛɛ ye kɛnɛkɛnɛbaliw ye, minw fagara ni murujan ye bari u tun ye mɔgɔw jaa tigɛ diɲɛ na.

²⁷U ma u suu don ni fɔlɔfɔlɔ kɛlɛdenŋanaw ye. Minw jigira lahara n'u ka kɛlɛkɛminanw ye, n'u ka murujanjanw lanin be u kuun kɔrɔ. U ka tilenbaliyakow be u kolow kan hali ni kɛlɛdenŋana nunu ye mɔgɔw jaa tigɛ diɲɛ na.

²⁸E Ezipiti masacɛ fana bena sa, u bena i suu don kɛnɛkɛnɛbaliw cɛma minw fagara ni murujan ye.

²⁹«Edɔmuw n'u ka masacɛw n'u ka ɲamɔgɔw bɛɛ be yen. Hali ni barika tun b'u la, u lanin be ni mɔgɔw ye minw fagara ni murujan ye, kɛnɛkɛnɛbaliw cɛma, lahara.

³⁰«Kɔgɔdugu ɲafan ɲamɔgɔ bɛɛ, ani Sidɔnka bɛɛ be yen. U maloyanin jigira suuw cɛma, hali k'a sɔrɔ u tun ye mɔgɔw jaa tigɛ. O kɛnɛkɛnɛbali nunu lanin be suuw cɛma minw fagara ni murujan ye. U sɔnna u ka maloya ma ni lahara mɔgɔ tɔw ye.

³¹«Ezipiti masacɛ bena u ye, a dusu bena saalo a ka kɛlɛdenw sako la, minw bɛɛ fagara ni murujan ye. Ne Matigi, Masaba le ko ten.

³²Ne tun y'a to Ezipiti masacɛ ye mɔgɔw jaa tigɛ kosɔbɛ diɲɛ na. O bɛɛ n'a ta, a yɛrɛ n'a ka kɛlɛden bɛɛ bena la kɛnɛkɛnɛbaliw cɛma, minw fagara ni murujan ye. Ne Matigi, Masaba le ko ten.»