Read dyu Ezekiyɛli ka kitabu 35 Bible Online

Ezekiyɛli ka kitabu 35 - dyu bible

Ezekiyɛli ka kitabu 35

¹Masaba kumana ne fɛ ko:

² «Adamaden, i ɲaa sin *Seyiri kuluyɔrɔ faan fɛ ka kiraya kɛ a kama

³k'a fɔ a ye ko ne Matigi, Masaba ko: ‹Ne be wili i kama, Seyiri kuluyɔrɔ. Ne bena n bolo wili i kama k'i kɛ yɔrɔlakolon ye.

⁴Ne bena i ka duguw kɛ tomo ye, k'i kɛ jamanalakolon ye. O tuma na, i ben'a lɔn ko ne ye Masaba le ye.

⁵«I tun be Isirayɛlidenw kɔniya tuma bɛɛ, i y'a to u fagara ni murujan ye u ka bɔnɛ loon na, u ka kojugu ser'a daan ma tuma min na.

⁶O le kosɔn, ne Matigi, Masaba ko: ‹Ne tɔgɔ kosɔn, ne ben'a to i joli be bɔn, i tena kisi fagali ma. I ma siga ka mɔgɔw faga minkɛ, i tena kisi fagali ma.

⁷Ne bena ele Seyiri kuluyɔrɔ kɛ yɔrɔlakolon ni tomo ye, k'i kɔnɔ tɛmɛbagaw bɛɛ faga.

⁸Ne bena i ka kuluw bɛɛ fa ni suuw ye. Mɔgɔ minw fagara ni murujan ye, olu bena ben ka la i ka tintinw kan, n'i kɔkɛnɛw, an'i ka kɔɔw bɛɛ la.

⁹Ne bena i kɛ yɔrɔlakolon ye kudayi. Mɔgɔ si tena sigi i ka duguw kɔnɔ tugu. O tuma na, aw ben'a lɔn ko ne ye Masaba le ye.›

¹⁰«I y'a fɔ ko mara fila nunu, Isirayɛli ni Zuda maraw, n'u mɔgɔw bena kɛ aw ta ye, ko aw bena u minɛ, k'a sɔrɔ ne Masaba tun be yen.

¹¹O kosɔn, ne Matigi, Masaba ko: ‹Ne tɔgɔ kosɔn, i ye dimi ni kɔniya min yira u la ni kɔnɔnajuguya ye, ne bena i sara ka kɛɲɛ n'o ye. Ni ne ye i kiti tuma min na, ne bena n yɛrɛ yira ne ka mɔgɔw la.

¹²O tuma na, aw ben'a lɔn ko ne ye Masaba le ye. I ye dɔgɔyakuma minw bɛɛ fɔ Isirayɛli kuluw koo la, ko u lakolonyara, ko u dira aw ma, aw k'u diya bɔ, ne y'o bɛɛ mɛn.

¹³Aw kumana ne fɛ ni ɲadonya ye, aw ye kumajugu fɔ ne koo la. Ne yɛrɛ le y'o mɛn!›

¹⁴«Ne Matigi, Masaba ko: ‹Ka jamana mɔgɔw bɛɛ to nisɔndiya la, ne bena i kɛ yɔrɔlakolon ye.

¹⁵I nisɔndiyanin lo ne ka jama, Isirayɛlidenw ka halakiko kosɔn. O kosɔn, ne bena o ɲɔgɔn kɛ i la. E Seyiri kuluyɔrɔ ni Edɔmu mara yɔrɔw bɛɛ, bena kɛ yɔrɔlakolon ye. O tuma na, u ben'a lɔn ko ne ye Masaba le ye.› »