Read dyu Ezekiyɛli ka kitabu 37 Bible Online

Ezekiyɛli ka kitabu 37 - dyu bible

Ezekiyɛli ka kitabu 37

¹Masaba ka sebagaya sera ne ma. A ye ne ta a yɛrɛ Nii barika la ka taga ni ne ye kɔkɛnɛ dɔ cɛmancɛ la. O yɔrɔ fanin tun be mɔgɔ kolow la.

²A y'a kɛ ne munumununa faan bɛɛ la kolo nunu cɛma. Ne y'a ye ko u tun ka ca kɔkɛnɛ nin na, u janin tun be kosɔbɛ.

³A ye ne ɲininga ko: «Adamaden, kolo nunu be se ka kɛ nimanfɛnw ye tugu wa?» Ne y'a jaabi ko: «Matigi, Masaba, ele yɛrɛ le b'o lɔn.»

⁴O kɔ, a y'a fɔ ne ye ko: «Kiraya kɛ kolo nunu kama k'a fɔ u ye ko: ‹Kolo jalanw, aw ka Masaba ka kuma mɛn!›

⁵Ne Matigi, Masaba b'a fɔra aw kolo nunu ye ko: ‹Ne bena nii don aw la, aw bena segi ka kɛ nimanw ye.

⁶Ne bena fasa don aw la ka farisogo di aw ma, k'aw farisogo datugu ni golo ye. Ne bena nii don aw la, aw bena segi ka kɛ nimanw ye. Aw ben'a lɔn ko ne ye Masaba ye.› »

⁷Ayiwa, ne ye kirayakuma nunu fɔ i ko Masaba tun y'a fɔ ne ye cogo min na. Ka ne to o fɔli la, mankan dɔ bɔra, i n'a fɔ fɛɛn dɔ le be magamagara. Kolo nunu gwɛrɛgwɛrɛla ɲɔgɔn na ka tugutugu ɲɔgɔn na.

⁸Ne ye filɛli kɛ k'a ye ko fasaw ni farisogo sɔrɔla u fɛ, u datugura ni golo ye. Nga nii tun t'u la.

⁹O kɔ, a y'a fɔ ne ye ko: «Adamaden, kiraya kɛ k'a fɔ ninakili ye ko Matigi, Masaba ko: ‹Ninakili, na ka bɔ diɲɛ faan naani bɛɛ la ka na don suu nunu na janko u ka se ka kɛ nimanfɛnw ye.› »

¹⁰ Ne ye kiraya kɛ i ko a tun fɔra ne ye cogo min na. Ninakili donna u la. U segira ka kɛ nimanw ye ka wili ka lɔ. Jamaba tun lo.

¹¹Masaba y'a fɔ ne ye ko: «Adamaden, kolo nunu ye Isirayɛliden bɛɛ ye. U b'a fɔ ko u kolow jara, k'u jigi tigɛra, ko u te se ka foyi kɛ.

¹²O kosɔn, kirayakuma fɔ u ye ko, Matigi, Masaba ko: ‹Ne ka mɔgɔw, ne bena aw ka kaburuw dayɛlɛ k'aw bɔ u kɔnɔ ka kɔsegi n'aw ye Isirayɛli jamana na.

¹³Ne ka mɔgɔw, ni ne y'aw ka kaburuw dayɛlɛ k'aw bɔ u kɔnɔ tuma min na, o tuma na, aw ben'a lɔn ko ne ye Masaba ye.

¹⁴Ne bena n Nii don aw la, aw bena kɛ nimanw ye. Ne bena aw sigi aw ka dugukolo kan. O tuma na, aw ben'a lɔn ko ne Masaba kumana, ko ne ye min fɔ aw ye, ne y'o kɛ. Ne Masaba le ko ten.› »

¹⁵Masaba kumana ne fɛ tugu ko:

¹⁶«Adamaden, lɔgɔ dɔ ta k'a sɛbɛn a kan ko: ‹Zuda ni Isirayɛliden minw jɛnna n'a ye, nin ye olu ta ye.› Lɔgɔ wɛrɛ ta k'a sɛbɛn a kan ko: ‹Yusufu ta, Efarayimu ka lɔgɔ, ani Isirayɛli ka somɔgɔ minw bɛɛ jɛnna n'a ye, olu ta.›

¹⁷I k'u tugu ɲɔgɔn na k'u kɛ lɔgɔ kelen ye i bolo.

¹⁸N'i ka mɔgɔw y'i ɲininga ko: ‹I te koo nin kɔrɔ fɔ an ye wa?›

¹⁹i k'u jaabi ko ne Matigi, Masaba ko: Lɔgɔ min be Efarayimu bolo, n'o ye Yusufu ta ye ni Isirayɛliden minw jɛnna n'a ye, ne bena o tugu Zuda ka lɔgɔ la k'u kɛ lɔgɔ kelen ye. U bena kɛ kelen ye ne bolo.

²⁰I ye sɛbɛnni kɛ lɔgɔ minw kan, i k'olu minɛ i bolo u ɲakɔrɔ,

²¹k'a fɔ u ye ko ne Matigi, Masaba ko: Isirayɛlidenw tagara siya wɛrɛw cɛma yɔrɔ minw bɛɛ la, ne bena u bɔ yen k'u lajɛn ɲɔgɔn fɛ k'u segi u yɛrɛ ka jamana kɔnɔ.

²²Ne bena u kɛ kelen ye jamana nin kɔnɔ Isirayɛli kuluw kan. Masacɛ kelen bena kɛ u bɛɛ kunna. U tena kɛ fila ye tugu, u tena tilan ka kɛ mara fila ye tugu.

²³U tena u yɛrɛ nɔgɔ n'u ka josɔnko, n'u ka kokolonw, n'u ka murutikow si ye tugu. U ye tilenbaliyakow kɛ u sigiyɔrɔ minw bɛɛ la, ne bena u hɔrɔnya o bɛɛ la k'u saniya. U bena kɛ ne ka mɔgɔw ye, ne bena kɛ u ka Ala ye.

²⁴ Ne ka baarakɛla Dawuda bena sigi u kunna. Marabaga kelen bena kɛ u fɛ. U bena ne ka fɔtaw bato ka ne ka kolatigɛninw kɛ ka ɲa.

²⁵Ne ye jamana min di ne ka baarakɛla Yakuba ma, n'aw bɛmaw siginin tun be o kɔnɔ, u bena sigi yen. U n'u deenw n'u mamadenw bena sigi yen kudayi. Ne ka baarakɛla Dawuda le bena kɛ u ka ɲamɔgɔ ye kudayi.

²⁶Ne bena bɛn n'u ye hɛrɛ ka sɔrɔ an ni ɲɔgɔn cɛ, o bɛɛn bena to yen kudayi. Ne bena u ka koo sabati k'u caya. Ne bena sigi u cɛma tuma bɛɛ.

²⁷ Ne sigiyɔrɔ bena kɛ u cɛma. Ne bena kɛ u ka Ala ye, u bena kɛ ne ka mɔgɔw ye.

²⁸O tuma na, siya tɔw ben'a lɔn ko ne ye Masaba le ye, ko ne be Isirayɛli saniya, tuma min na ne be sigi u cɛma fɔɔ tuma bɛɛ.»