Read dyu Ezekiyɛli ka kitabu 39 Bible Online

Ezekiyɛli ka kitabu 39 - dyu bible

Ezekiyɛli ka kitabu 39

¹«Adamaden, kiraya kɛ Gɔgi koo la. A fɔ a ye ko, Matigi, Masaba ko: ‹Mɛsɛki ni Tubali ka ɲamɔgɔba Gɔgi, ne wilila i kama.

²Ne bena i minɛ k'i sama ka bɔ fɔɔ yɔrɔjan, kɔgɔdugu ɲafan fɛ k'i bila ka taga Isirayɛli kuluw kan mɔgɔw kama.

³Ne bena i bugɔ, kala bena bɔ i numanbolo la ka ben, biɲɛ bena bɔ i kinibolo la ka ka ben.

⁴E n'i ka kɛlɛdenw bɛɛ, ani siya minw bena kɛ n'i ye, aw bena sa Isirayɛli kuluw kan. Ne bena i kɛ sogodumukɔnɔ sifa bɛɛ ni kongosogow ka dumuni ye.

⁵I bena sa kongo kɔnɔ bari ne Matigi, Masaba kumana.

⁶« ‹Ne bena tasuma bila Magɔgi la ani mɔgɔ minw sutaranin be jii cɛma dugukolow kan. U ben'a lɔn ko ne ye Masaba le ye.

⁷Ne ben'a kɛ ne tɔgɔ senuman be bɔ ne ka jama Isirayɛli cɛma. Ne tena sɔn a ka cɛn tugu. Siyaw ben'a lɔn ko ne ye Masaba le ye, Isirayɛlidenw ka Ɲumaman.

⁸« ‹Tiɲɛ na, koo nunu bena kɛ. U yɛrɛ daminɛna ka ban. Ne kumana loon min koo la, o loon nin be surunyana. Ne Matigi, Masaba le ko ten.

⁹Isirayɛli dugu kɔnɔ mɔgɔw bena bɔ u ka duguw kɔnɔ k'u juguw ka kɛlɛkɛminanw jɛni: nigɛkunbɛnnanbabaw ni misɛnmanw, ani kalaw ni biɲɛw, ni berew ni tamanw. U bena u jɛni fɔɔ saan wolonwula kɔnɔ.

¹⁰U tena lɔgɔ ɲini kongo kɔnɔ, u tena yiri tigɛ tuu kɔnɔ, bari u bena kɛlɛkɛminan nunu le kɛ lɔgɔ ye. Mɔgɔ minw y'u ka fɛɛnw bɔsi u la, u bena olu taw bɔsi fana. Minw y'u bololafɛnw cɛ, u bena olu taw cɛ. Ne Matigi, Masaba le ko ten.

¹¹« ‹O loon na, ne bena sudonyɔrɔ di Gɔgi ma Isirayɛli jamana kɔnɔ. Tɛmɛbagaw be kɔkɛnɛ min tigɛ ka taga *Kɔgɔji Fariman na, kɔrɔn faan fɛ, o bena kɛ o kɔnɔ. O kaburu nin bena tɛmɛbagaw ka sira tigɛ, bari u bena Gɔgi n'a ka kɛlɛden caaman nunu bɛɛ suu don o yɔrɔ la. U bena yɔrɔ nin wele ko: Gɔgi jamakulu ka kɔkɛnɛ.

¹²Isirayɛli somɔgɔw bena kalo wolonwula kɛ suu nunu donko la janko ka jamana saniya.

¹³Jamana mɔgɔw bɛɛ bena sudon baara kɛ. Ne bena n ka boɲa yira loon min na, o loon na, u bena u kuun kɔrɔta. Ne Matigi, Masaba le ko ten.

¹⁴U bena mɔgɔ dɔw bila danna k'olu ka to ka jamana yɔrɔw bɛɛ yaala. Tɛmɛbagaw bena fara u kan k'u dɛmɛ ka suuw don janko ka jamana saniya. Kalo wolonwula tɛmɛnin kɔ, u bena baara nin daminɛ.

¹⁵Ayiwa, n'u yaalayaalatɔ ye mɔgɔ kolow ye, u bena kabakuruw ton ɲɔgɔn kan ka taamasiɲɛ kɛ u gɛrɛfɛ fɔɔ suu donbagaw ka na o don Gɔgi jamakulu ka kɔkɛnɛ na.

¹⁶Dugu dɔ fana be kɛ o yɔrɔ la, u ben'a wele ko Amona, o kɔrɔ ko jamakulu. U bena jamana saniya o cogo la.›

¹⁷«Adamaden, ne Matigi, Masaba ko i k'a fɔ kɔnɔ sifaw bɛɛ ye, ni kongosogow bɛɛ ye ko: ‹Aw ye bɔ faan bɛɛ la ka na lajɛn saraka kama, ne bena o sarakaba min labɛn aw ye Isirayɛli kuluw kan. Aw bena sogo dumu ka joli min.

¹⁸Aw bena kɛlɛdenŋanaw sogo dumu, ka diɲɛ kɔnɔ kuntigiw joli min. Olu le bena kɛ saraka ye sagajigiw ni sagadenw, ni bakɔrɔninw ni turaw nɔɔ na. U bɛɛ ka bonbon i n'a fɔ *Basan mara begɛnw.

¹⁹Ne ye saraka min labɛn aw ye, aw bena o tulu dumu fɔɔ k'a tɔɔ to, k'o joli min fɔɔ ka ɲanamini.

²⁰Ne ka ɲanagwɛ nin na, aw bena fa soow ni sotigiw, ni kɛlɛdenŋanaw ni kɛlɛden sifaw bɛɛ sogo la. Ne Matigi, Masaba le ko ten.›

²¹«Ne bena n ka nɔɔrɔ yira siyaw la. Ne b'u kiti, n ka sebagaya bena se u ma cogo min na, u bɛɛ bena o ye.

²²K'a ta o loon na, Isirayɛlidenw ben'a lɔn ko ne le ye Masaba u ka Ala ye.

²³«Siya wɛrɛw ben'a lɔn ko Isirayɛlidenw minɛna ka taga jamana wɛrɛ la u yɛrɛ ka kojugu kosɔn, bari u ma tilen ne ma. O kosɔn, ne ye n yɛrɛ dogo u la k'u don u juguw bolo, u bɛɛ fagara ni murujan ye.

²⁴Ne y'u minɛ ka kɛɲɛ n'u ka konɔgɔninw n'u ka kokolonw ye, ka n yɛrɛ dogo u la.

²⁵«Nga ne Matigi, Masaba ko: Sisan ne bena Isirayɛlidenw ka koɲa yɛlɛma. Ne bena makari u bɛɛ la. Ne ben'a kɛ mɔgɔw be ne tɔgɔ senuman boɲa.

²⁶U bena ɲinɛ u ka maloya kɔ, ani u ye kotilenbali minw bɛɛ kɛ ne la, u ye min kɛ tuma min na u siginin tun be hɛrɛ la u ka jamana kɔnɔ, mɔgɔ si tun te yen min be siranya bila u la tuma min na.

²⁷Ne bena u bɔ siya wɛrɛw cɛma k'u kɔsegi, ne bena u bɔ u juguw ka jamanaw kɔnɔ k'u lajɛn, k'a yira siya caaman na olu barika la, ko ne ɲɔgɔn te yen.

²⁸O tuma na, u ben'a lɔn ko ne ye Masaba u ka Ala ye, bari ne y'u bila jɔnya la siya wɛrɛw cɛma, nga o kɔ, ne bena u lajɛn u yɛrɛ ka jamana na, ne tena u si to jamana wɛrɛ la tugu.

²⁹Ne tena n yɛrɛ dogo u la tugu, bari ne bena n Nii di Isirayɛlidenw ma. Ne Matigi, Masaba le ko ten.»