Read dyu Ezekiyɛli ka kitabu 4 Bible Online

Ezekiyɛli ka kitabu 4 - dyu bible

Ezekiyɛli ka kitabu 4

¹«E kɔni, adamaden, i ka biriki dɔ ta, k'a bila i ɲakɔrɔ. Zeruzalɛmu dugu taamasiɲɛ kɛ a kan,

²k'a kɛlɛbagaw kɛ k'a lamini. Dingɛw sogi yɔrɔ dɔw, tintinw wili yɔrɔ dɔw, kɛlɛdenw ka sigiyɔrɔw labɛn, ani kogocifɛnw.

³Nigɛ dɔ ta, i b'o bila ele ni dugu cɛ ka kɛ i n'a fɔ nigɛkogo. O kɔ, i b'i ɲaa sin dugu nin ma. O la, a daa be tugu, o be kɛ ele le sababu la. O bena kɛ taamasiɲɛ ye Isirayɛlidenw fɛ.

⁴«La i numanbolo kan, i bena Isirayɛlidenw ka kojugu to i yɛrɛ kan. K'i lanin to i gɛrɛn kan, i bena u ka kojugu doni ta i yɛrɛ kan loon o loon fɔɔ i wilituma.

⁵U ye sanda minw kɛ kojugu la, ne b'o tileda latigɛ i ye. I bena Isirayɛlidenw ka kojugu doni ta fɔɔ tile kɛmɛ saba ni bi kɔnɔntɔn.

⁶O loon nunu mana dafa, i be yɛlɛma ka la i kinibolo kan, ka Zuda mara mɔgɔw ka kojuguw doni ta. Ne y'a latigɛ ko tile bi naani kɔnɔ, loon kelen be jati u ka saan kelen kojugu nɔɔ na.

⁷I bena i ɲaa sin Zeruzalɛmu dugu ma min datugura. I bena ne ka kuma fɔ u ye k'u lasɔmi k'a sɔrɔ fani t'i bolo kan.

⁸Ayiwa, ne le bena i siri ni juru ye. I tena se k'i yɛlɛma i faan dɔ nin kan, fɔɔ ka Zeruzalɛmu datugulonw bɛɛ dafa.

⁹«*Bile ni *orizi ta, ani sɔsɔ, ni ɲɔɔn, k'u don minan kelen kɔnɔ, ka buru kɛ n'o ye, i bena to ka min ɲimi k'i lanin to i gɛrɛn kan tile kɛmɛ saba ni bi kɔnɔntɔn nunu kɔnɔ.

¹⁰I bena to ka buru kunkurun le dumu loon o loon.

¹¹I bena jii min min tile kɔnɔ, o bena suma. I bena to ka jii litiri kelen le min loon o loon.

¹²I bena i ka dumu buru dilan k'o jɛni bojalan tasuma le kan jama ɲana.»

¹³Masaba y'a fɔ tugu ko: «O cogo kelen na, Isirayɛlidenw bena dumuni nɔgɔnin dumu siya wɛrɛw fɛ, ne bena u gwɛn ka taga minw cɛma.»

¹⁴Ne y'a fɔ ko: «Ayi, Matigi, Masaba! Ne ma deli ka n yɛrɛ nɔgɔ ka ye. Kabini ne denmisɛn tuma na fɔɔ ka n'a bila bii la, ne ma deli ka sogosu ɲimi, wara ye sogo min dumu k'a tɔɔ to, ne ma deli k'o fana ɲimi. Sogo nɔgɔnin si ma don ne daa la ka ye.»

¹⁵A ye ne jaabi ko: «Ayiwa, ne be sira d'i ma, i ka bojalan to yen, i ka misibo kɛ k'o jɛni.»

¹⁶O kɔ, a y'a fɔ ne ye ko: «Adamaden, ne bena dumuniko gwɛlɛya Zeruzalɛmu kɔnɔ. U kɔnɔ gwannin bena dumuni suma k'a dumu. U siranninba bena u ka minji suma.

¹⁷Bari, dumuni ani jii bena dɛsɛ. Sɛgɛn bena se u ma. U bena fasa u ka kojuguw kosɔn.