Read dyu Ezekiyɛli ka kitabu 45 Bible Online

Ezekiyɛli ka kitabu 45 - dyu bible

Ezekiyɛli ka kitabu 45

¹«Ni aw be jamana tilantilan tuma min na, aw ka yɔrɔ dɔ suma k'a kɛ ne Masaba ta ye. A jaɲa ka kɛ kilomɛtɛrɛ tan ni fila ni tilan ye, a boɲa, kilomɛtɛrɛ duuru. O yɔrɔ bɛɛ bena kɛ ne ta ye.

²Aw ka yɔrɔ dɔ suma o yɔrɔ nin na, a faan naani bɛɛ ka kɛ mɛtɛrɛ kɛmɛ fila ni bi duuru duuru ye, o ka kɛ ne batoso lɔyɔrɔ ye. Mɛtɛrɛ mugan ni duuru furancɛ ka to a faan bɛɛ la ka kɛ kɛnɛ ye.

³Aw ye yɔrɔ min bila ne ye, aw ka yɔrɔ dɔ suma o kɔnɔ, a jaɲa ka kɛ kilomɛtɛrɛ tan ni fila ani tilan ye, a boɲa ka kɛ kilomɛtɛrɛ duuru ye. O ka kɛ ne batoso lɔyɔrɔ ani ne sigiyɔrɔ ye, Yɔrɔ Senuman ka Senuman.

⁴Sarakalasebaga minw be gwɛrɛ ne, Masaba la ka baara kɛ ne ɲakɔrɔ ne ka yɔrɔ senuman na, o yɔrɔ bena kɛ olu ta ye. O bena kɛ u ka soow ani ne batoyɔrɔ senuman lɔyɔrɔ ye.

⁵Yɔrɔ dɔ, min jaɲa ye kilomɛtɛrɛ tan ni fila ani tilan ye, n'a boɲa ye kilomɛtɛrɛ duuru ye, o bena kɛ Levi kɔmɔgɔw ta ye, minw be baara kɛ ne batoso kɔnɔ. Dugu dɔw bena kɛ u ta ye o yɔrɔ kɔnɔ.

⁶Aw ka yɔrɔ dɔ bila min jaɲa ye kilomɛtɛrɛ tan ni fila ani tilan ye, a boɲa ka kɛ kilomɛtɛrɛ fila ni tilan ye, o ka kɛ dugu ta ye. O ka kɛ ne ka yɔrɔ gɛrɛfɛ. A bena kɛ Isirayɛlidenw bɛɛ ta ye.

⁷Ɲamɔgɔ niyɔrɔ bena kɛ ne ka yɔrɔ ni dugu sigiyɔrɔ faan fila la. A ka yɔrɔ kelen bena kɛ ne ka yɔrɔ ni dugu sigiyɔrɔ tileben fɛ, a daan ka kɛ Kɔgɔji ye, kelen ka kɛ u kɔrɔn fɛ, a daan ka kɛ jamana daan ye kɔrɔn fɛ. A niyɔrɔ dugukolo jaɲa ni Isirayɛli deen tan ni fila nunu kɔmɔgɔ dɔ ta ka kɛ kelen ye.

⁸O yɔrɔ bena kɛ ɲamɔgɔ niyɔrɔ dugukolo ye Isirayɛli kɔnɔ. Ne ka ɲamɔgɔw tena ne ka mɔgɔw tɔɔrɔ tugu, u bena jamana tilantilan Isirayɛli deen tan ni fila kɔmɔgɔw cɛ.»

⁹Matigi, Masaba ko: «Isirayɛli ka ɲamɔgɔw, a daan tɛmɛna! Aw ka fariyako ni mɔgɔtɔɔrɔko dabila, ka kotilennin ni kobɛnnin kɛ. Aw kana ne ka mɔgɔw bololafɛnw bɔsi tugu. Ne Matigi, Masaba le ko ten.

¹⁰ «Kilo bɛnnin ni suman sumaminan bɛnnin ani fɛɛn jiman sumaminan bɛnnin ka sɔrɔ aw fɛ.

¹¹Suman sumaminan ni fɛɛn jiman sumaminan kɔnɔna ka kɛɲɛ ɲɔgɔn ma. Jii sumaminan ɲaa tan ye omɛri ɲaa kelen ye, suman sumaminan ɲaa tan fana ye omɛri ɲaa kelen ye. [1] Olu boɲa ka jati ka kɛɲɛ ni omɛri ye.

¹²Warigwɛ kuru kelen be garamu tan bɔ. Warigwɛ kuru nunu bi wɔɔrɔ ye warigwɛ mina kelen ye.

¹³«Aw ka kan ka sarakaw bɔ cogo min na, o filɛ: Aw ka *bile ani *orizi tilan wɔɔrɔnan kelen bɔ saraka ye.

¹⁴Aw k'aw ka tulu tilan kɛmɛnan kelen bɔ. Aw k'o suma ni bati ye. Bati kelen be bɛn omɛri tilan tannan kelen ma, walima kori kelen.

¹⁵Ni saga kɛmɛ fila be Isirayɛlidenw ka sagadɛndɛyɔrɔ min na, kelen be bɔ. O fɛɛn nunu be kɛ suman sarakaw ye, ni saraka jɛnitaw ani jɛnɲɔgɔnya sarakaw, minw be kɛ janko jama ka yafa sɔrɔ. Ne Matigi, Masaba le ko ten.

¹⁶«Jamana kɔnɔ mɔgɔ bɛɛ ka boɲafɛn bɔ k'o di Isirayɛli ka ɲamɔgɔ ma.

¹⁷Ɲamɔgɔ yɛrɛ ka kan ka saraka jɛnitaw ni suman sarakaw, ani jii bɔ kalokura ɲanagwɛ la, ni lafiɲɛlonw na, ani ɲanagwɛlon tɔw la, o kɔrɔ, Isirayɛlidenw ka ɲanagwɛ latigɛnin bɛɛ la. A bena hakɛ yafa saraka, ni suman saraka, ni saraka jɛnitaw, ani jɛnɲɔgɔnya taw bɔ janko Isirayɛlidenw ka se ka yafa sɔrɔ.»

¹⁸Matigi, Masaba ye min fɔ, o filɛ. A ko: «Saan kalo fɔlɔ tile fɔlɔ loon, i ka tura kɛɲɛnin kelen minɛ, fiɲɛ te min na, ka yɔrɔ senuman saniya.

¹⁹Sarakalasebaga bena hakɛ yafa saraka joli dɔ ta k'a seriseri Alabatoso donda lɔgɔw kan, ni sarakabɔyɔrɔ nɔnkɔn naani dagolow kan, ani kɔnɔnalu donda lɔgɔw kan.

²⁰Ni mɔgɔ o mɔgɔ ye kojugu kɛ n'a ma kɛ tuguko ye, walima n'a y'a kɛ kolɔnbaliya kosɔn, i k'o landa fɔlɔ ɲɔgɔn kɛ o tigi ye kalo tile wolonwulanan loon na fana. O la, i ka Alabatoso bena saniya.

²¹ «Aw ka *Hɔrɔnya ɲanagwɛ daminɛ saan kalo fɔlɔ tile tan ni naaninan loon na, ka tile wolonwula kɛ a la. O waati la, aw ka buru dumu fununan te min na.

²²O loon na, ɲamɔgɔ bena tura kɛɲɛnin kɛ saraka ye a yɛrɛ ni jamana kɔnɔ mɔgɔw bɛɛ ka kojugu kosɔn.

²³Ɲanagwɛ nin tile wolonwula kɔnɔ, loon o loon, a bena tura fiɲɛtan wolonwula ni sagajigi fiɲɛtan wolonwula kɛ saraka jɛnita ye ne Masaba ye, ka bakɔrɔnin kelen kɛ kojugu yafa saraka ye.

²⁴A bena mugu kilo bi saba le kori ni tura ani sagajigi nunu kelen kelen bɛɛ ye, ani tulu litiri wɔɔrɔ.

²⁵ Saan kalo wolonwulanan tile tan ni duurunan loon ye *Gwatakɔrɔsigi ɲanagwɛ daminɛlon ye. O ɲanagwɛ nin tile wolonwula kɔnɔ, ɲamɔgɔ nin ye saraka min ɲɔgɔn bɔ Hɔrɔnya ta la, a k'o ɲɔgɔn bɔ fana, hakɛ yafa ta, ni saraka jɛnita, ani suman ta, ni tulu.»