Read dyu Ezekiyɛli ka kitabu 46 Bible Online

Ezekiyɛli ka kitabu 46 - dyu bible

Ezekiyɛli ka kitabu 46

¹Matigi, Masaba ko: «Kɔnɔnalu donda min ɲasinnin be kɔrɔn fɛ, o datugunin bena to tile wɔɔrɔ kɔnɔ, baara be kɛ loon minw na. Nga a bena yɛlɛ lafiɲɛlon ni kalokura ɲanagwɛ la.

²Ɲamɔgɔ bena bɔ kɛnɛma luu kɔnɔ, ka bulon cɛtigɛ ka na lɔ dondalayiriw gɛrɛfɛ. O kɔ, sarakalasebagaw ben'a ka saraka jɛnitaw n'a ka jɛnɲɔgɔnya sarakaw bɔ. A bena biri dakun kan ka batoli kɛ. O kɔ, a bena bɔ, nga daa nin tena tugu fɔɔ wuladafɛ.

³Jamanadenw bena biri ne Masaba ɲakɔrɔ ka ne bato o donda nin le la, lafiɲɛlonw, ni kalokura ɲanagwɛw la.

⁴«Ɲamɔgɔ bena na ni saraka jɛnita min ye lafiɲɛlon na k'a bɔ ne Masaba ye, o bena kɛ sagaden wɔɔrɔ ni sagajigi kelen ye, fiɲɛ te minw na.

⁵Suman saraka min be bɔ ni sagajigi ye, o ka kɛ kilo bi saba ye. Mugu min bena bɔ ni sagadenw ye, ɲamɔgɔ ben'a sagolata bɔ o la. Tulu litiri wɔɔrɔ wɔɔrɔ ka bɔn ni mugu kilo bi saba saba ye.

⁶A ka tura kɛɲɛnin kelen ni sagaden wɔɔrɔ ani sagajigi kelen kɛ saraka ye kalokura ɲanagwɛ la, fiɲɛ te minw na.

⁷A ka mugu kilo bi saba saba kori k'a bɔ ni tura nin ye, ani sagajigi ye. Sagadenw ta ka kɛ a sago la. Tulu litiri wɔɔrɔ ka fara mugu kilo bi saba saba kan.

⁸«Ni ɲamɔgɔ be donna tuma min na, a be don ni bulonda ye ka bɔ n'o daa kelen nin ye.

⁹Ni jamanadenw donna ne Masaba fɛ ɲanagwɛ loonw na tuma min na, ni min donna ni kɔgɔdugu ɲafan donda ye ka batoli kɛ, o tigi ka bɔ ni worodugu ɲafan donda ye. N'a donna ni worodugu ɲafan donda ye, a ka bɔ ni kɔgɔdugu ɲafan donda ye. Mɔgɔ si kana bɔ n'a ka donda ye, bɛɛ ka bɔ ni daa ye a ɲaa sinnin be min na.

¹⁰Ni jama be donna tuma min na, ɲamɔgɔ bena don n'u ye. N'u be bɔra tuma min na, a fana be bɔ o waati la.

¹¹«Ɲanagwɛ loonw na, suman saraka min be bɔ ni tura ye, o bena kɛ mugu kilo bi saba ye, o ɲɔgɔn ka bɔ ni sagajigi ye. Sagadenw ta ka kɛ u bɔbaga sago la. Tulu litiri wɔɔrɔ ka fara mugu kilo bi saba saba kan.

¹²«Ni ɲamɔgɔ b'a fɛ k'a diyanaboɲafɛn di ne Masaba ma: saraka jɛnita, walima jɛnɲɔgɔnya saraka, kɔrɔn fɛ donda bena yɛlɛ a ye. A k'a ka saraka nunu bɔ i n'a fɔ a b'a kɛ lafiɲɛlon na cogo min na. O kɔ, a bena bɔ. N'a bɔra ka ban, daa bena tugu.

¹³«Sankelensagaden fiɲɛtan ka kɛ saraka jɛnita ye ne Masaba ye sɔgɔma o sɔgɔma.

¹⁴Suman saraka fana ka kan ka bɔ n'a ye sɔgɔma o sɔgɔma, o ka kɛ mugu kilo duuru ye, tulu litiri fila ka ɲagami mugu nin na. Suman saraka nin bɔko ne Masaba ye, o ye koo latigɛnin ye, o te yɛlɛma, o bena kɛ tuma bɛɛ.

¹⁵Sagaden n'a suman saraka, n'a tulu ka kɛ saraka jɛnita ye sɔgɔma o sɔgɔma, o koo nin kana dabila.»

¹⁶Matigi, Masaba ko: «Ni ɲamɔgɔ be dɔ bɔ a niyɔrɔ dugukolo la k'a di a dencɛ dɔ ma, o bena kɛ deen nin dencɛw ka cɛɛn ye fana.

¹⁷ Nga n'a ye dɔ bɔ a niyɔrɔ dugukolo la k'a di a ka jɔɔnw dɔ ma, o bena kɛ jɔɔn nin ta ye fɔɔ ka taga se hɔrɔnyali saan na. O tuma na, a bena segi ka kɛ ɲamɔgɔ nin ta ye. Ɲamɔgɔ nin niyɔrɔ be se ka kɛ a dencɛw dama ta ye.

¹⁸Ɲamɔgɔ man kan ka mɔgɔ si niyɔrɔ bɔsi a la k'a gwɛn ka bɔ a ka yɔrɔ la. A be min di a dencɛw ma, o ka bɔ a yɛrɛ niyɔrɔ la, janko ne ka mɔgɔw si kana gwɛn ka bɔ o ka yɔrɔ la.»

¹⁹Ayiwa, o kɔ, cɛɛ nin donna ni ne ye n'o donda nin gɛrɛfɛda ye, ka taga ni ne ye sarakalasebagaw ka boon senumanw yɔrɔ la, minw ɲasinnin be kɔgɔdugu ɲafan fɛ. A ye yɔrɔ dɔ yira ne la, ɲafɛ tileben ɲafan fɛ.

²⁰A y'a fɔ ne ye ko: «Sarakalasebagaw bena to ka kojugu yafa saraka ni fili yafa taw tobi, ani ka to ka suman sarakaw wusu yan yɔrɔ la le, janko u kana don kɛnɛma luu la k'a to jama ka maga u la.»

²¹O kɔ, a bɔra ni ne ye ka taga kɛnɛma luu kɔnɔ. A tagara ni ne ye luu nin nɔnkɔn naani bɛɛ la. Ludennin tun be nɔnkɔn naani nunu bɛɛ la.

²²Olu lamininin tun be, u jaɲa tun ye mɛtɛrɛ mugan ye, u boɲa ye mɛtɛrɛ tan ni duuru. Ludennin naani nunu bɛɛ kɔnɔna boɲa tun ka kan.

²³Ludennin naani nunu bɛɛ tun lamininin be ni kabakurukogo ye. Tasuma manayɔrɔ tun be kogo nunu jukɔrɔla la k'o lamini.

²⁴Cɛɛ nin y'a fɔ ne ye ko: «Yan ye tobilikɛyɔrɔw le ye, mɔgɔ minw be Alabatoso baara kɛ, olu bena jama ka sarakaw tobi o yɔrɔ la.»