Read dyu Ezekiyɛli ka kitabu 47 Bible Online

Ezekiyɛli ka kitabu 47 - dyu bible

Ezekiyɛli ka kitabu 47

¹ O kɔ, cɛɛ nin segira ni ne ye Alabatoso donda la. Ne ye jii woyotɔ ye ka bɔ soo daa jukɔrɔla la ka taga kɔrɔn faan fɛ, bari soo ɲasinnin tun be kɔrɔn fɛ. Jii nin tun be bɔra Alabatoso worodugu ɲafan fɛ, ka sɔrɔ ka tɛmɛ sarakabɔyɔrɔ worodugu faan fɛ.

²Cɛɛ nin bɔra ni ne ye ni kɔgɔdugu ɲafan donda ye ka munumunu a kɔfɛla la ka taga se kɔrɔn ɲafan donda ma. Jii tun be woyora daa nin worodugu faan fɛ.

³Cɛɛ tagara kɔrɔn fɛ dɔɔni, sumanikɛjuru tun b'a bolo, a ye mɛtɛrɛ kɛmɛ duuru suma. O kɔ, a y'a kɛ ne ye jii tigɛ, jii tun be se ne senkuruw ma.

⁴A ye mɛtɛrɛ kɛmɛ duuru suma tugu k'a kɛ ne y'a tigɛ. Jii tun be se fɔɔ ne kunbiri ma. A ye mɛtɛrɛ kɛmɛ duuru suma tugu, k'a kɛ ne y'a tigɛ. Jii tun be se fɔɔ ne cɛɛ la.

⁵A ye mɛtɛrɛ kɛmɛ duuru suma tugu. Jii tun ka dun o yɔrɔ la fɔɔ ne ma se k'a tigɛ, bari jii tun cayara, mɔgɔ tun be se ka nɔnni a kɔnɔ. Mɔgɔ tun te se ka jii nin tigɛ fewu.

⁶A ye ne ɲininga ko: «Adamaden, i ye nin ye wa?» O kɔ, a kɔsegira ni ne ye bada la.

⁷Ne sera yen tuma min na, ne ye yiri caaman ye bada la a faan fila la.

⁸A y'a fɔ ne ye ko: «Jii nin be woyo ka taga kɔrɔn fɛ mara la, ka taga lɛkɛnɛ na ka taga don *Kɔgɔji Fariman na. N'a donna kɔgɔji nin kɔnɔ, jii nin be saniya.

⁹Jilafɛn sifaw bɛɛ bena balo jii nin kɔnɔ. Jigɛ caaman bena sɔrɔ a kɔnɔ. A be woyo ka taga yɔrɔ o yɔrɔ, kɔgɔji be saniya. Baji nin be se yɔrɔ o yɔrɔ, a be kɛ sababu ye fɛɛn be balo o yɔrɔ la.

¹⁰Mɔnikɛlaw bena lɔ jida la. K'a ta Angɛdi fɔɔ ka taga se Ɛngilayimu, o bena kɛ jɔɔ layɔrɔ ye. Jigɛ sifa caaman bena sɔrɔ o yɔrɔ la i n'a fɔ Kɔgɔjiba jigɛw.

¹¹Nga dalanw ni jii lɔyɔrɔ minw be kɔgɔji gɛrɛfɛ, olu jii tena diya, u bena kɛ kɔgɔ yɔrɔw ye.

¹² Yiri denta sifaw bɛɛ bena sɔrɔ baa nin daa la, a faan fila la. U furaburu tena ja, u deen tena ban. U be deen kɛ kalo o kalo, bari baji be bɔ yɔrɔ senuman kɔnɔ ka na u ɲigi. U deenw bena mɔgɔw balo, u furaburu bena kɛ furaw ye.»

¹³Matigi, Masaba ko: «Aw bena jamana min tilan Isirayɛli deen tan ni fila kɔmɔgɔw cɛ ka kɛ u niyɔrɔ ye, o daanw filɛ nin ye. Yusufu niyɔrɔ bena kɛ fila ye.

¹⁴Jɛnkulu kelen kelen bɛɛ niyɔrɔ ka kan ka kɛ kelen ye. Ne ye layidu ta, ka n daa di aw bɛmaw ma ko ne bena jamana nin d'u ma minkɛ, jamana nin bena kɛ aw ta ye.

¹⁵«Ayiwa, jamana daan filɛ nin ye: Kɔgɔdugu ɲafan daan be daminɛ Kɔgɔjiba ma, ka tɛmɛ Etilɔn sira fɛ, fɔɔ ka taga se Sedadi ma,

¹⁶ka tɛmɛ ka se Amati ni Berotayi ani Sibarayimu ma, min be Damasi ni Amati mara cɛma, ka tɛmɛ Aseritikɔn, min be Oran daan faan fɛ.

¹⁷Ayiwa, jamana daan bena bɔ Kɔgɔji daa la ka taga fɔɔ Asariyena. Damasi ni Amati mara bena sɔrɔ a kɔgɔdugu ɲafan fɛ. O bena kɛ jamana kɔgɔdugu ɲafan daan ye.

¹⁸A kɔrɔn fɛ daan bena tɛmɛ Oran ni Damasi cɛ. Zurudɛn baji bena kɛ a daan ye ka tɛmɛ Galaadi mara ni Isirayɛli jamana cɛ, fɔɔ ka se kɔrɔn fɛ kɔgɔji ni Tamari ma. O bena kɛ a kɔrɔn fɛ daan ye.

¹⁹A worodugu ɲafan daan be bɔ Tamari fɔɔ ka taga se Meribakadɛsi jiyɔrɔ ma. Ezipiti kɔɔ bena kɛ a daan ye fɔɔ ka ta'a bila Kɔgɔjiba la. O bena kɛ a worodugu ɲafan daan ye.

²⁰A tileben fɛ daan ye Kɔgɔjiba ye, ka bɔ worodugu ɲafan daan na fɔɔ ka taga se Lebowamati. O bena kɛ a tileben fɛ daan ye.

²¹«Aw ka jamana tilan aw ni ɲɔgɔn cɛ ka kɛɲɛ ni Isirayɛli deen tan ni fila kɔmɔgɔw ye.

²²Aw k'a tilan ka lonanw sɔn, minw sigira aw cɛma ka deenw sɔrɔ. Aw k'u jati i n'a fɔ dugulenw. U ka kan ka niyɔrɔ sɔrɔ n'aw ye Isirayɛlidenw cɛma.

²³Ni lonan sigira Isirayɛli ka deen nunu kɔmɔgɔ minw cɛma, lonan nin niyɔrɔ be bɔ olu fɛ. Ne Matigi, Masaba le ko ten.